|
Azərbaycan Dövlət İqtisad Universitetində (ADİU) TEMPUS
layihəsi çərçivəsində ilk təlim proqramı həyata
keçirilmişdir.
ADİU-dan AzərTAc-a bildirmişlər ki, "Universitetin
beynəlxalq əlaqələr şöbəsinin mövcud fəaliyyətinin
təhlili" mövzusunda təşkil olunan təlimdə TEMPUS
layihəsinin tərəfdaş universitetlərinin əməkdaşları
iştirak etmişlər.
Təlimdən əvvəl ADİU-nun beynəlxalq əlaqələr və
proqramlar üzrə prorektoru, dosent Şahin Bayramov
təlimin əsas məqsədinin tərəfdaş universitetlərdə
beynəlxalq əlaqələr şöbələrinin mövcud vəziyyətinin və
fəaliyyət mexanizminin təhlil edilməsindən, eləcə də
həmin şöbələrin inkişaf etdirilməsi istiqamətlərinin
müəyyən edilməsindən ibarət olduğunu diqqətə
çatdırmışdır. O, TEMPUS layihəsi çərçivəsində keçirilən
ilk təlimlərin layihənin uğurla icra olunmasına böyük
töhfə verəcəyini vurğulamışdır.
Təlim Böyük Britaniyanın Uorvik Universitetinin
beynəlxalq əlaqələr şöbəsinin müdiri Ceyms Kennedi
tərəfindən aparılmışdır. C.Kennedi bu sahənin aparıcı
eksperti kimi təlimin mövzusuna dair geniş və məzmunlu
təqdimatlar etmiş, öz zəngin təcrübəsini bölüşmüş və
təmsil etdiyi universitetin timsalında qabaqcıl Avropa
universitetlərində tətbiq olunan mütərəqqi modellərdən
bəhs etmişdir.
İki gün davam edən təlimdə iştirak edən Azərbaycan,
Ukrayna, Qırğızıstan və Tacikistan nümayəndələri təmsil
etdikləri ali məktəblərin beynəlxalq əlaqələr
şöbələrinin mövcud vəziyyətinə və fəaliyyət
prinsiplərinə dair fikirlərini bölüşmüşlər. |
