|
Naxçıvan Dövlət Universitetində Naxçıvan Muxtar
Respublikası Ali Məclisində 2013-cü ilin yekunları və
qarşıda duran vəzifələrə dair müşavirəyə həsr olunmuş
yığıncaq keçirildi.
NDU-nun rektoru, biologiya elmləri doktoru, professor
Saleh Məhərrəmov yığıncaqda "Naxçıvan Muxtar
Respublikasında 2013-cü ilin yekunları və Naxçıvan
Dövlət Universitetinin qarşısında duran vəzifələr"
mövzusunda məruzə etdi. Bildirildi ki, Naxçıvan Muxtar
Respublikası Ali Məclisinin sədri Vasif Talıbovun
müşavirədəki çıxışında ötən il ərzində sosial
iqtisadiyyat, elm, təhsil sahəsində əldə olunan
nailiyyətlərdən, Heydər Əliyev ideyalarının sədaqətlə
davam etdirilməsi ilə əhalinin rifah halının
yüksəldilməsinə, milli-mədəni tərəqqiyə nail
olunmasından bəhs olunmuşdur. Müşavirədə regionda təhsil
quruculuğu, yüksək ixtisaslı mütəxəssis yetişdirilməsi
sahəsində qazanılan müvəffəqiyyətlərə, mövcud
problemlərə və qarşıda duran vəzifələrə də
toxunulmuşdur.
Rektor NDU-da tədrisin keyfiyyətinin yüksəldilməsi,
elektron universitet yaradılması, distant təhsilə
keçilməsi, zəruri tələbat olan yeni ixtisasların
açılması, beynəlxalq əməkdaşlığın inkişafı, tələbə
mobilliyinin artırılması, informasiya-kommunikasiya
texnologiyaları vasitələrindən, fənn kabinetləri və
müasir tədris laboratoriyalarından səmərəli istifadə
istiqamətində görülən işlərdən danışdı. Rektor İnternet
üzərindən dərslərin keçirilməsi, tədrisdə əyanilikdən və
müasir texnologiyalardan istifadə, dünyəvi təcrübənin
mənimsənilməsi və tətbiqi ilə əlaqədar müşavirədə qeyd
olunan nöqsanlara toxundu, onların aradan qaldırılması
üçün görüləcək işlərdən danışdı.
Yığıncaqda universitetin arxiv işi və muzeyşünaslıq
kafedrasının müdiri, tarix üzrə fəlsəfə doktoru Məmməd
Əliyev "Muxtar respublikada aparılan humanitar siyasət
və qarşıda duran vəzifələr", mühasibat uçotu və maliyyə
kafedrasının müdiri, dosent Teymur Abbasov
"İqtisadiyyatın inkişafının Naxçıvan modeli", baytarlıq
kafedrasının müdiri, baytarlıq üzrə fəlsəfə doktoru
Yunis Qasımov "Naxçıvan Muxtar Respublikasının aqrar
sektorunda qarşıda duran vəzifələr" mövzularında
məruzələr etdilər.
Mehriban SULTAN,
NDU-nun Mətbuat
şöbəsinin müdiri |
