|
 Fevralın
1-də Xırdalan şəhərində Abşeron rayonu gənclərinin
ümumrayon toplantısı keçirilib. Tədbir iştirakçıları
öncə ulu öndərin Xırdalan şəhərinin mərkəzində - Heydər
Əliyev parkında ucaldılmış möhtəşəm heykəli önünə əklil
qoydular.
Toplantını giriş sözü ilə rayon gənclər və idman
idarəsinin rəisi Əsgər Əmirəliyev açdı. Ulu öndərin
xatirəsi bir dəqiqəlik sükutla yad edildikdən sonra
Dövlət himni ifa olundu. Ə.Əmirəliyev qeyd etdi ki, hər
il 2 fevralın Gənclər Günü kimi respublikamızda yüksək
səviyyədə qeyd olunması artıq ənənə halını almışdır.
Heydər Əliyev xalqın təkidli tələbi ilə ikinci dəfə
hakimiyyətə qayıtdıqdan sonra Azərbaycan dövlətinin
taleyüklü məsələləri ilə məşğul olduğu bir vaxtda
Azərbaycan gəncliyini də unutmadı. Bu gün ulu öndər
Heydər Əliyevin əsasını qoyduğu siyasi kursun, o
cümlədən dövlət gənclər siyasətinin ölkə Prezidenti
cənab İlham Əliyev tərəfindən uğurla davam etdirildiyi
qeyd edildi.
Gəncləri təbrik üçün söz Abşeron Rayon İcra
Hakimiyyətinin başçısı Zakir Fərəcova verildi. Z.Fərəcov
bildirdi ki, ümummilli lider ölkəmizə rəhbərlik etdiyi
müxtəlif illərdə hər bir işdə gənclərə arxalanmış və
onların enerjisini düzgün istiqamətə yönəltmişdir. O,
böyüməkdə olan gənc nəslə qayğını həmişə ön plana
çəkmişdir. Ulu öndərin ideyaları bu gün sürətlə
reallaşmaqdadır. Azərbaycanın hər yerində istifadəyə
verilən sağlamlıq, istirahət və idman kompleksləri gənc
nəslin xoşbəxt gələcəyinə xidmət edir.
Sonra rayonun ictimai-mədəni həyatında fəallıq göstərən
bir qrup gəncə RİH başçısı tərəfindən fəxri fərmanlar
verildi.
Toplantıda Abşeron Rayon İcra Hakimiyyəti başçısının
müavini İradə Gülməmmədova Prezident İlham Əliyev
tərəfindən bugünkü gəncliyə göstərilən qayğıdan, onların
nəinki respublikamız daxilində, həm də onun
hüdudlarından kənarda müasir tələblərə cavab verə
biləcək kadrlar kimi yetişmələri üçün həyata keçirilən
genişmiqyaslı layihələrdən söz açdı.
Daha sonra çıxış edənlər rayonda gənclərə göstərilən
diqqət və qayğıdan söz açdılar, cənab Prezident İlham
Əliyevin həyata keçirdiyi gənclər siyasətinin rayonda
uğurla icra olunduğunu söylədilər.
Tədbirin sonunda Abşeronun bədii özfəaliyyət kollektivi
maraqlı proqramla çıxış etdi.
Rəna ƏSGƏROVA,
Xırdalan şəhər 3 nömrəli məktəb-liseyin müəllimi
|
