|
 Azərbaycanın
istedadlı yazıçısı, eyni zamanda tələbələrinin sevimli
müəllimi olan İsmayıl Şıxlı həmişə deyərdi ki, dünyada
bütün peşələr gözəl və gərəklidir. Lakin bir peşə də var
ki, bütün insanlar bu və ya digər dərəcədə o peşə
sahiblərinə borcludurlar. Bu, müəllimlik peşəsidir.
Çünki gələcək nəslin necə insan, necə vətəndaş olacağı
məhz müəllimlərdən asılıdır. Məktəblərimizdə bu
məsuliyyəti dərk edən, gələcək nəslə bilikləri dərindən
mənimsədən, eyni zamanda onları cəmiyyətin layiqli
vətəndaşları kimi yetişdirən pedaqoqlarımız çoxdur.
Onlardan biri ilə tanış olun: Təhsil Nazirliyinin
tabeliyindəki İ.Hacıyev adına "Tərəqqi"
texniki-humanitar liseyinin dil-ədəbiyyat müəllimi
Mahniyar Tanrıverdiyeva
Hər insan ürəyində öz dünyasını qurur. Bu dünya insanın
arzu və ümidlərindən, xəyal və düşüncələrindən yaranır.
Mahniyarın xəyal dünyasında arzuladığı ömür yolu lap
uşaqlıqdan seçilmişdi. Mütaliəyə hədsiz dərəcədə aludə
olan bu qız üçün ədəbi əsərləri oxumaq, Azərbaycan və
dünya ədəbiyyatının ən nadir inciləri ilə tanış olmaq
böyük xoşbəxtlik demək idi. Elə buna görə də o, bütün
yaşıdları kimi illər keçdikcə hər dəfə bir peşə yiyəsi
olmaq eşqinə düşmədi. İlk və son qərarı bu oldu ki,
elmlərin içərisində ən maraqlısı ədəbiyyatdır, onu
başqalarına sevdirməyi bacarmaq isə ən böyük səadətdir.
Mahniyar Məmməd qızı Tanrıverdiyeva 1964-cü ildə
Ermənistan Respublikası Meqri rayonunun Nüvədi kəndində
anadan olub. 1971-ci ildə Nüvədi kənd orta məktəbində
birinci sinfə gedən Mahniyar 1981-ci ildə həmin
məktəbin onuncu sinfini fərqlənmə ilə bitirib. 1981-ci
ildə Azərbaycan Dövlət Pedaqoji Universitetinin
filologiya fakültəsinə (keçmiş V.İ.Lenin adına
Azərbaycan Pedaqoji İnstitutu) daxil olub. 1985-ci ilin
sentyabrında ilk dəfə Qafan rayonunun Oxtar kənd orta
məktəbində Azərbaycan dili və ədəbiyyat müəllimi kimi
sinfə qədəm qoysa da, ailə vəziyyəti ilə əlaqədar olaraq
1986-cı ilin noyabr ayından pedaqoji fəaliyyətini həmin
rayonun Kürülü kənd məktəbində davam etdirib. Məlum
hadisələrdən sonra 1989-cu ildə Bakıya köçən
M.Tanrıverdiyeva 1990-cı ildən Bakının Nərimanov
rayonundakı 66 nömrəli məktəbdə (2006-cı ildən Təhsil
Nazirliyinin tabeliyində "Tərəqqi" liseyi) işləməyə
başlayıb.
Mahniyar müəllim uzun illərdir ki, şagirdlərinə ana
dilimizin incəliklərini öyrədir, onları zəngin
ədəbiyyatımızın inciləri ilə tanış edir. Aydındır ki,
məktəblərdə dil-ədəbiyyat müəllimlərinin şagirdlərin
şəxsiyyət kimi formalaşmasında böyük rolu var. Belə ki,
ədəbiyyatın tədrisi yeniyetmə və gənclərin
milli-vətənpərvərlik ruhunda tərbiyəsinə, xalqımıza
məxsus mənəvi əxlaqi dəyərlərin aşılanmasına xidmət
edir. Bu məsuliyyəti başa düşən Mahniyar müəllim öz
işinin öhdəsindən bacarıqla gəlir. O, yaxşı başa düşür
ki, dərin bilik və metodik hazırlıq təlimdə yüksək
nəticələr əldə etmək üçün əsas şərtlər olsa da, əsl
müəllimlik istedadı hər bir şagirdə fərdi yanaşmağı
bacarmaqdan, onları şəxsiyyət kimi qəbul edərək
xarakterlərini öyrənməkdən ibarətdir.
Son illər ölkəmizdə təhsil sahəsində uğurla həyata
keçirilən islahatlar müəllimlərdən yüksək dərəcədə
peşəkar, eyni zamanda yaradıcı fəaliyyət tələb edir.
Mahniyar Tanrıverdiyeva da məhz belə müəllimlərdəndir.
O, qabaqcıl iş təcrübəsi və peşəkarlığı ilə seçilsə də
arxayınlaşmır, daim pedaqoji məharətini daha da
təkmilləşdirmək yollarını arayıb-axtarır, pedaqoji
innovasiyaları öyrənməyə can atır, şagirdlərinə dərin və
əhatəli bilik verməyə çalışır. Öz işini müasir təlim
metodlarının tətbiqi ilə quran Mahniyar müəllim tədris
prosesində informasiya-kommunikasiya texnologiyalarının
imkanlarından uğurla istifadə edir.
Gözəl ailə sahibi, iki övladın qayğıkeş anası olan
Mahniyar xanım şagirdlərinə də əsl ana məhəbbəti ilə
yanaşır, onların şəxsi həyatı ilə maraqlanır,
məsləhətlər verir, aralarında həmişə səmimi, məhrəm
münasibət yaratmağa çalışır. Gözəl insani keyfiyyətləri
ilə seçilən bu qadın, ümumiyyətlə, məktəbin bütün
müəllimlərinin hörmətini qazanıb. İşlədiyi təhsil
müəssisəsinin direktoru, əməkdar müəllim Məhbubə
Məmmədova bizimlə söhbətində onun barəsində dedi: "Biz
onu gözəl insan və savadlı pedaqoq kimi tanıyırıq.
Qabaqcıl iş təcrübəsi, bilik və bacarığı sayəsində
yüksək təlim keyfiyyəti əldə etməyə nail olur. Mahniyar
müəllimi həmkarları ilə yanaşı, şagirdləri də çox
sevir".
Müəllim əməyinin nə qədər əziyyətli olduğunu
bildiyimizdən Mahniyar Tanrıverdiyeva kimi öz işinin
vurğunu olan pedaqoqlarla rastlaşanda çox sevinirik və
ona gələcək fəaliyyətində uğurlar arzulayırıq.
P.S. Martın 1-də Mahniyar müəllimin 50 yaşı tamam olur.
Çalışdığı kollektivin üzvləri bu münasibətlə onu təbrik
edir, cansağlığı, şəxsi həyatında xoşbəxtlik, işlərində
yeni-yeni nailiyyətlər diləyirlər.
Hicran ƏKBƏROVA,
"Azərbaycan müəllimi" |
