|
"ADA" Universitetində məktəb direktorlarının "Orta
məktəb direktorluğunda liderlik bacarıqları və dünya
təcrübəsi" mövzusunda birinci forumu keçirilmişdir.
"ADA" Universitetinin kommunikasiya departamentindən
AzərTAc-a bildirmişlər ki, forumun açılış mərasimində
"ADA" Universitetinin rektoru, səfir Hafiz Paşayev və bu
təhsil müəssisəsinin tədris işləri üzrə prorektoru
doktor Patrik Kvin iştirak etmişlər.
Forumda "ADA" Universitetinin Dəqiq və Humanitar Elmlər
İnstitutunun dekanı, doktor Vəfa Kazdal "ADA"
Universitetinin təhsil modeli: nəyi və nə üçün
bölüşürük?" mövzusunda çıxış etmişdir.
İştirakçılar "ADA" Universitetinin dərəcə proqramları və
təhsil imkanları ilə tanış olmuşlar.
Forum çərçivəsində ABŞ-ın nüfuzlu Miçiqan Dövlət
Universitetinin nümayəndəsi, doktor Barbara Markle
"Şimali Amerikanın təhsil sistemində yeni yanaşmalar:
direktorluqda menecerlikdən liderliyə doğru" mövzusunda
çıxış etmiş, məktəblərin düzgün idarəedilməsi haqqında
fikirlərini bölüşmüşdür.
Təhsil üzrə məsləhətçi Asif Cahangirov "Məktəb
direktorları təhsil islahatlarında aparıcı rol oynayan
şəxslər qismində" mövzusu üzrə danışmışdır.
Sonra suallar cavablandırılmışdır. |
