Azərbaycanın
elmi və pedaqoji ictimaiyyətinə ağır itki üz vermişdir.
Fizika sahəsində tanınmış alim, Azərbaycan Respublikası
Prezidentinin fərdi təqaüdçüsü, əməkdar elm xadimi,
Dövlət mükafatı laureatı, Azərbaycan Milli Elmlər
Akademiyasının həqiqi üzvü, fizika-riyaziyyat elmləri
doktoru, Bakı Dövlət Universitetinin kafedra müdiri,
professor Bəhram Mehrəli oğlu Əsgərov 2014-cü il martın
12-də ömrünün 81-ci ilində vəfat etmişdir.
Bəhram Əsgərov 1933-cü il oktyabr ayının 5-də Tovuz
rayonunun Əhmədabad kəndində anadan olmuşdur. Orta
məktəbi bitirdikdən sonra 1952-1957-ci
illərdə Azərbaycan Dövlət Universitetinin fizika
fakültəsində ali təhsil almışdır. O, 1957-ci ildə fizika
ixtisası üzrə aspiranturaya daxil olaraq, 1960-cı ildə
SSRİ Elmlər Akademiyasının Leninqrad şəhərində yerləşən
Yarımkeçiricilər İnstitutunun aspiranturasını
bitirmişdir.
Əmək fəaliyyətinə 1960-cı ildən etibarən Azərbaycan
Elmlər Akademiyasının Fizika İnstitutunda başlayan
Bəhram Əsgərov 1966-cı ilədək həmin institutda kiçik
elmi işçi və böyük elmi işçi vəzifələrində çalışmışdır.
O, 1966-cı ildən Azərbaycan Dövlət Universitetinin
dosenti, 1972-ci ildən isə professoru idi. Bəhram
Əsgərov 1971-ci ildə universitetdə qurduğu bərk cisimlər
fizikası kafedrasına ömrünün sonunadək rəhbərlik etmiş,
1994-2004-cü
illərdə Bakı Dövlət Universitetinin elmi işlər üzrə
prorektoru və rektor əvəzi işləmişdir.
Bəhram Əsgərov 1962-ci ildə Leninqrad şəhərində
namizədlik və 1971-ci ildə doktorluq dissertasiyalarını
müdafiə etmiş, 1972-ci ildə professor elmi adını
almışdır. O, 2001-ci ildə Azərbaycan Milli Elmlər
Akademiyasının müxbir üzvü, 2007-ci ildə isə həqiqi üzvü
seçilmişdir.
Akademik Bəhram Əsgərov uzun illər ərzində zəngin
elmi-pedaqoji fəaliyyəti ilə ölkəmizdə elmin və təhsilin
inkişafına töhfələr vermişdir. Onun Azərbaycanda fizika
sahəsində aparılan tədqiqatların əsas istiqamətlərinin
müəyyənləşməsində mühüm xidmətləri vardır. Bərk cisimlər
fizikasına dair kompleks araşdırmalarında tanınmış alim
yarımkeçiricilərdə termomaqnit hadisələrinin kvant
nəzəriyyəsinin əsasını təşkil edən yeni metodlar təklif
etmiş, kinetik effektlər nəzəriyyəsi ilə bağlı bir çox
məsələlərin həlli üzərində ardıcıl çalışaraq onların
geniş şərhini verməyə müvəffəq olmuşdur. Alimin gəldiyi
qənaətlər həmişə aktuallığı, fundamental-nəzəri və
tətbiqi əhəmiyyəti ilə səciyyələnmişdir.
Bəhram Əsgərov elmi yaradıcılığını özünün səmərəli
pedaqoji fəaliyyəti ilə ahəngdar şəkildə uzlaşdırırdı.
O, Bakı Dövlət Universitetində qırx ildən artıq bir
müddətdə yüksəkixtisaslı kadrların hazırlanması üçün
bilik və bacarığını əsirgəmədən böyük qüvvə sərf
etmişdir. Onun rəhbərliyi ilə 10-dan artıq fəlsəfə və
elmlər doktoru yetişdirilmişdir. Alimin çoxillik
zəhmətinin məhsulu olan silsilə araşdırmalarının
nəticələri ölkəmizdə və onun hüdudlarından kənarda çap
edilmiş 150-yə yaxın elmi əsərdə, 5 monoqrafiyada və bir
sıra dərsliklərdə əksini tapmışdır. Mötəbər beynəlxalq
forumlarda o, Azərbaycan elmini layiqincə təmsil
etmişdir.
Akademik Bəhram Əsgərovun elmi və pedaqoji fəaliyyəti
daim yüksək qiymətləndirilmişdir. O, 1974-cü ildə
Azərbaycan Respublikasının Dövlət mükafatına layiq
görülmüş, 2000-ci ildə Azərbaycanda elmin inkişafındakı
xidmətlərinə görə "Əməkdar elm xadimi" fəxri adını
almış, 2004-cü ildə müstəqil Azərbaycan Respublikasının
ali mükafatlarından olan "Şöhrət" ordeni ilə təltif
edilmişdir.
Tanınmış alim, mahir pedaqoq və səmimi insan Bəhram
Mehrəli oğlu Əsgərovun xatirəsi onu tanıyanların
qəlbində hər zaman yaşayacaqdır.
Allah rəhmət etsin!
İlham Əliyev, Artur Rasizadə, Oqtay Əsədov, Ramiz
Mehdiyev,
Elçin Əfəndiyev, Hacıbala Abutalıbov, Akif Əlizadə,
Fatma Abdullazadə,
Mikayıl Cabbarov, Arif Mehdiyev, Akif Hacıyev, Arif
Paşayev, Abel Məhərrəmov |