Aprelin 1-də Bakıda Azərbaycan Respublikasının
Prezidenti yanında Dövlət İdarəçilik Akademiyası (DİA)
ilə Rusiya Federasiyası Prezidenti yanında Xalq
Təsərrüfatı və Dövlət Qulluğu Akademiyasının (RXTDQA)
Şimal-Qərb İdarəçilik İnstitutu arasında əməkdaşlıq
haqqında memorandum imzalanmışdır.
Memorandumu DİA-nın rektoru, akademik Urxan Ələkbərov və
RXTDQA-nın Şimal-Qərb İdarəçilik İnstitutunun direktoru,
iqtisad elmləri doktoru, professor, Rusiya
Federasiyasının I dərəcəli həqiqi dövlət məsləhətçisi
Vladimir Şamaxov imzalamışlar.
DİA-dan AzərTAc-a bildirmişlər ki, sənəddə akademiyalar
arasında elmi-pedaqoji əməkdaşlıq, təcrübə, müəllim və
tələbə mübadiləsi, hər iki ölkənin milli maraqlarına
cavab verən birgə fəaliyyətin təşkili və s. nəzərdə
tutulmuşdur. Memorandum təhsilin keyfiyyətinin
yüksəldilməsinə, dövlət quruculuğu, dövlət və sosial
idarəetmə sistemi üçün yüksək ixtisaslı kadrların
hazırlanmasına, həmçinin dostluq münasibətlərinin və
multikulturalizm təcrübəsinin inkişaf etdirilməsinə
istiqamətlənmişdir.
Akademik Urxan Ələkbərov demişdir ki, DİA-nın Elmi
Şurası Azərbaycan alimi, professor Fuad Məmmədova
"İdarəetmə mədəniyyəti. Xarici ölkələrin təcrübəsi"
fundamental əsərinə görə Azərbaycan Dövlət Mükafatının
verilməsi barədə qərar qəbul etmişdir.
Professor Vladimir Şamaxov RXTDQA-nın Şimal-Qərb
İdarəçilik İnstitutunun bu qərarı dəstəklədiyini və
bununla əlaqədar olaraq Azərbaycan Respublikasının Baş
naziri Artur Rasizadəyə ünvanlanmış məktubunu
akademiyaya təqdim etmişdir.
Məktubda azərbaycanlı alimin xidmətlərinin layiqincə
qiymətləndirilməsinə və onun bundan sonrakı
fəaliyyətinin RXTDQA-nın Şimal-Qərb İdarəçilik İnstitutu
ilə Azərbaycan Respublikasının Prezidenti yanında Dövlət
İdarəçilik Akademiyası arasında qarşılıqlı faydalı
münasibətlərin inkişafında sanballı töhfə olacağına inam
ifadə edilmişdir. |