|
Bakıdakı 229 nömrəli tam orta məktəbdə dahi şair Nizami
Gəncəvinin yaradıcılığına həsr olunmuş tədbir keçirildi.
Tədbirin aparıcıları Nizaminin yalnız Azərbaycan
ədəbiyyatında deyil, dünya ədəbiyyatında müstəsna yer
tutan bir şair olduğunu vurğulayaraq qeyd etdilər ki,
onun əsərləri biz gəncləri vətənə sevgi, böyüklərə
hörmət ruhunda tərbiyə edir.
Böyük şairin yaradıcılığına müraciət edən şagirdlər
"Xəmsə"dən bir neçə səhnəcik göstərdilər. Nizaminin ilk
irihəcmli əsəri olan "Sirlər xəzinəsi"nin qəhrəmanlarını
canlandıran yuxarı sinif şagirdləri Cavid, Banu, Lamiyə
və Samir öz rollarını məharətlə ifa etdilər. Ofelya,
Afaq, İbrahim, İlkarə və Cəfər "Xosrov və Şirin"
əsərindən parçanı səhnədə canlandırmaqla Nizami dövrü
üçün müstəsna dərəcədə mütərəqqi bir ideya olan qadın
azadlığı problemini qoyduğunu göstərə bildilər.
Dahi şairin "Leyli və Məcnun" əsərindən parçalar
şagirdlərin ifasında təqdim olundu. "İsgəndərnamə"də
qoyulmuş bəşəri problemlər, yaradılmış monumental
obrazlar bu əsərin əbədi yaşayacağına və baş qəhrəmanın
amal və arzularının da onu əbədi yaşadacağına zəmanət
verdiyi qeyd edildi. Bildirildi ki, "Yeddi gözəl"
əsərində Nizaminin soy-kök etibarı ilə özünün də mənsub
olduğu türklərə böyük məhəbbəti və rəğbəti aydın ifadə
edilmişdir. Bu əsərdən parçalar səhnələşdirən məktəbin
şagirdləri əminliklə vurğuladılar ki, Nizami Gəncəvi
yaradıcılığı heç zaman onların yaddaşlarından
silinməyəcək. Şagirdlərdən Lamiyənin ifa etdiyi "Sarı
gəlin" rəqsi alqışlara səbəb oldu.
Böyük şairin həyat və yaradıcılığından söhbət açan
məktəbin direktoru Fəridə Bağırova tədbirin təşkilində
fəallıq göstərmiş müəllimlərə təşəkkürünü bildirdi.
Rəşad ZİYADOV,
"Azərbaycan müəllimi" |
