|
Aprelin 16-da DAAD-ın Almaniyada yerləşən baş ofisinin 2
əməkdaşı və ekspert kimi cəlb edilmiş 4 alman professor
"Avropa hüququ" ixtisası üzrə "ikili diplom"
magistratura proqramının qiymətləndirilməsi məqsədilə
Bakı Dövlət Universitetində olublar. Qonaqları qəbul
edən rektor, akademik Abel Məhərrəmov proqramla bağlı
fikirlərini bölüşüb, onun əhəmiyyətindən danışıb. Rektor
ötən il proqramın ilk 6 məzununa BDU-nun və Almaniyanın
Vürsburq Universitetinin diplomlarının verildiyini də
xüsusilə qeyd edib.
"Avropa hüququ" ixtisası üzrə təhsil alan tələbələr,
eyni zamanda müəllimlər və hüquq fakültəsinin rəhbərliyi
ilə görüşdüklərini deyən qonaqlar proqramın tətbiqindən
razı qaldıqlarını bildirib və gələcəkdə onun
səmərəliliyinin artırılması istiqamətində bəzi təkliflər
səsləndiriblər.
Qeyd edək ki, 2011-ci ilin sentyabr ayından etibarən
Bakı Dövlət Universitetində "Avropa hüququ" ixtisası
üzrə Almaniyanın Vürsburq Universiteti ilə birlikdə DAAD
təşkilatının maliyyə dəstəyilə "ikili diplom"
magistratura proqramı fəaliyyət göstərir. Tədris ingilis
və alman dillərində aparılır. Alman tərəfi bu proqramda
iştirak edən tələbələr üçün intensiv alman dili kursları
və Almaniyada təcrübə təşkil edir. Proqrama uyğun
olaraq, alman professorları Avropa mülki hüquq ənənəsi,
Avropa dövlət yardımı hüququ, Avropa anti-inhisar hüququ
üzrə mühazirələr oxuyub, hüquq fakültəsinin müəllimi
Məhəmməd Quluzadə Vürsburq Universitetində açıq mühazirə
keçirib.
BDU-nun Mətbuat və informasiya şöbəsi |
