|
 Aprelin
16-da Azərbaycan Dillər Universitetində Milli Televiziya
və Radio Şurasının üzvü, "Kaspi" Təhsil Mərkəzinin və
"Kaspi" qəzetinin təsisçisi, tanınmış şairə, filologiya
üzrə fəlsəfə doktoru Sona Vəliyevanın yaradıcılıq gecəsi
keçirilib. Tədbirdə şairənin qələm dostları, ADU-nun
rektoru, Milli Məclisin deputatı, professor Səməd
Seyidov, ali təhsil ocağının professor-müəllim heyəti və
tələbələr iştirak ediblər.
Yaradıcılıq gecəsinin təşkilatçısı ADU-nun Azərbaycan
dili və ədəbiyyatı kafedrasının müdiri, professor Fəridə
Səfiyeva çıxış edərək şairənin yaradıcılığı haqqında
tədbir iştirakçılarına geniş məlumat verib. Qeyd
olunub ki, Sona Vəliyeva azərbaycançılıqla bağlı ən
mükəmməl əsərlərdən birinin müəllifidir. F.Səfiyeva
"Kaspi" qəzeti və "Kaspi" Təhsil Mərkəzinin layihəsi
əsasında İstanbulda nəşr olunmuş "Hüseyn Cavid.
Əsərləri" kitabından danışaraq onu yüksək
qiymətləndirib. O, oxucuların Sona Vəliyevanı maarifçi,
alim, şair, dövlətini və xalqını çox sevən ziyalı bir
qadın kimi tanıdıqlarını bildirib. Şairənin
yaradıcılığının, elmi işlərinin və peşə fəaliyyətinin
vahid bir sistem təşkil etdiyi və bu sistemin bütövlükdə
azərbaycançılıq ideologiyasına xidmət göstərdiyi diqqətə
çatdırılıb. Kafedra müdiri azərbaycançılıq
ideologiyasının əsas tədqiqatçılarından və yorulmaz
təbliğatçılarından olan Sona xanımın "Azərbaycançılıq
ideologiyasının təşəkkülü və tarixi inkişaf yolu"
əsərinin azərbaycançılığın təbliği sahəsində özünəməxsus
rolu olduğunu xüsusi vurğulayıb. Sona Vəliyevanın
yaradıcılığı ilə tanışlığının əsas məqamlarına toxunan
gecənin təşkilatçısı tədbirin təşkilinə göstərdiyi
dəstəyə görə ADU-nun rektoru, Milli Məclisin deputatı,
professor Səməd Seyidova təşəkkürünü bildirib.
Sonra şairənin həyat və yaradıcılığından bəhs edən
videoçarx nümayiş olunub. Onun özü və əsərləri haqqında
qələm yoldaşlarının dediyi dəyərli fikirlər
səsləndirilib. Filologiya və jurnalistika fakültəsinin
I-III kurs tələbələrinin iştirakı ilə keçirilən
yaradıcılıq gecəsində bildirilib ki, Sona Vəliyeva
şeiri ictimai hadisə sayır. Qeyd olunub ki, onun
şeirlərini hissiz, həyəcansız oxumaq qeyri-mümkündür.
Şairənin "Arazbarı" kitabı öz ruhunu, iç dünyasını əks
etdirir. Bu kitabda toplanmış şeirlərdə Vətən sevgisi və
vətəndaşlıq mövqeyi, torpaq həsrəti, hisslərimizin,
duyğularımızın, adət-ənənələrimizin, gündəlik
həyatımızda rastlaşdığımız hadisələrin qeyri-adi yozumu,
ən əsası uca Tanrıya və onun yaratdığı insana, təbiət
gözəlliklərinə irfani eşq oxucunun qəlbini riqqətə
gətirir. Şairənin qələmindən çıxan hər bir şeir insanı
düşünməyə vadar edir. Azərbaycanın parçalanması, Güney -
Quzey ayrılığı, Qarabağ ağrısı Sona Vəliyevanın
yaradıcılığında ana xətt kimi keçir.
Həzin bir ovqat üzərində köklənən, kövrək duyğularla
müşayiət olunan yaradıcılıq gecəsində tələbələr
şairənin sözlərinə bəstələnmiş mahnılar ifa ediblər,
müxtəlif mövzularda yazdığı şeirlərdən parçalar
söyləyiblər. Tələbələrin hazırladıqları ədəbi-bədii
kompozisiya "Cəngi" sədaları altında Azərbaycan
bayrağının səhnəyə gətirilməsi ilə başa çatıb.
Sonda Sona Vəliyeva çıxış edərək tədbirin təşkilində
əməyi keçənlərə minnətdarlığını bildirib.
Yaradıcılığının əsas xüsusiyyətlərindən söz açan Sona
Vəliyeva Azərbaycan xalqının öz dilini və
mədəniyyətini bütün assimilyasiya basqılarından
qoruyaraq bu günə kimi yaşada bildiyini söyləyib.
Bildirib ki, dil millətin var olmasında ən mühüm
ünsürdür. Sona Vəliyeva Azərbaycan dilinin qorunub
saxlanılmasının, azərbaycançılıq ideyasının
müstəqilliyimizin bərpasından sonra ümummilli lider
Heydər Əliyev tərəfindən daha da inkişaf etdirilərək
yalnız Azərbaycan Respublikasının deyil, bütövlükdə
dünya azərbaycanlılarının ideologiyası səviyyəsinə
yüksəldiyini xüsusi vurğulayıb.
Samirə KƏRİMOVA,
"Azərbaycan müəllimi" |
