|
 Naxçıvan
Özəl Universitetinin tarix ixtisasının III kurs
tələbələrinin Naxçıvan Dövlət Tarix Muzeyinə
ekskursiyası təskil edilib. Muzeyin elmi ekspozisiya
şöbəsinin müdiri Nərminə Allahverdiyeva muzeydə nümayiş
olunan eksponatlar barədə tələbələri ətraflı
məlumatlandırıb. Qeyd olunub ki, muzeydə 49000 eksponat
yer alıb, onlardan da 3000-i muzey ekspozisiyasında
qorunub saxlanılır. Eksponatlar arasında qədim dövrü
əhatə edən məişət əşyaları, əmək alətləri, məzarüstü
sənduqələr, orta əsrlər dövrünə aid milli geyimlərimiz,
tarixi memarlıq abidələrimiz, milli musiqi alətləri,
Azərbaycanın qədim dövlətçilik tarixini əks etdirən
eksponatlar, zərgərlik, xalçaçılıq nümunələri, XVIII
əsrin sonu XIX əsrin əvvəllərini əhatə edən Naxçıvan
ziyalıları haqqında materiallar yer alıb. Müasir dövrü
əhatə edən eksponatlar arasında isə 1941-1945-ci
illər müharibə veteranları haqqında, 20 Yanvar, Xocalı
faciəsini və 31 mart soyqırımını əks etdirən materiallar
maraq doğurur.
Onu da qeyd edək ki, muzeydə ulu öndər Heydər Əliyevin
həyat və fəaliyyətindən bəhs edən yüzlərlə eksponat
nümayiş etdirilir. Həmçinin ölkə başçısı İlham Əliyevin
Naxçıvan Muxtar Respublikasının yaradılmasının 90 illiyi
ilə əlaqədar imzaladığı sərəncama əsasən muzey
ekspozisiyasında "Naxçıvan Muxtar Respublikası 90" adlı
sərgi də nümayiş etdirilir. Sərgidə həmçinin muxtar
respublikada istehsal olunan bir neçə sənaye məhsulları
nümunələri də yer alıb.
Nuray ƏSGƏROVA |
