Ölkəmizdə təhsilin inkişafına töhfələr verən,
təhsil islahatlarının həyata keçirilməsində
fəallıq göstərən müəllimlər çoxdur. Dövlətimiz
belə müəllimlərin əməyini daim diqqət mərkəzində
saxlayır və layiqincə qiymətləndirir. Ölkə
Prezidenti cənab İlham Əliyev tərəfindən hər il
onlarla müəllimə "Əməkdar müəllim" fəxri adı və
"Tərəqqi" medalı verilir. Eyni zamanda möhtərəm
Prezidentimizin sərəncamı ilə artıq 7 ildir ki,
"Ən yaxşı müəllim" müsabiqəsi keçirilir və bu
müsabiqələrin nəticəsi olaraq hər il 100 nəfər
müəllim böyük məbləğdə pul mükafatı alır.
Qəzetimizin bu nömrəsindən başlayaraq belə
müəllimləri oxucularımıza təqdim edirik. |
|
Aygün
MƏCİDOVA,
Bakı Avropa Liseyinin ibtidai sinif müəllimi
1964-cü ildə Bakıda anadan olub. 1987-ci ildə
Bakı Dövlət Universitetinin mexanika-riyaziyyat
fakültəsini bitirib, 1998-ci ildə isə ADPU-da
ibtidai metodika üzrə yenidənhazırlanma kursunu
keçib. 2006-cı ildə Təhsil Nazirliyi tərəfindən
"Azərbaycan Respublikası qabaqcıl təhsil işçisi"
döş nişanı ilə təltif olunub. 2008-ci ildə "Ən
yaxşı müəllim" müsabiqəsinin qalibi olub.
2010-cu ildə Azərbaycan Respublikası
Prezidentinin sərəncamı ilə "Əməkdar müəllim"
fəxri adına layiq görülüb. 2011-ci ildə Təhsil
Nazirliyinin Fəxri fərmanı ilə
mükafatlandırılıb. ADPU-nun doktorantıdır. 1
monoqrafiya, 50 kitab (dərsliklər, tədris
vəsaitləri, metodik vəsaitlər, didaktik
materiallar, test tapşırıqları), 34 məqalə
(7-si xaricdə ) və 3 tezisin (1-i xaricdə), 4
fənn üzrə 16 adda kitabın hazırlanmasında layihə
rəhbəri kimi iştirak edib. Təhsil Nazirliyinin
formativ qiymətləndirmənin aparılması
mexanizminin hazırlanması üzrə işçi qrupunun
üzvüdür. Bundan başqa, Təhsil Nazirliyi
tərəfindən keçirilən bir çox layihə və
treninqlərdə iştirak edib. 2012-ci ildə Təhsil
Nazirliyinin Milli qiymətləndirmə üzrə keçirilən
monitorinqində işçi qrupunun üzvü, 2013-cü ildə
Təhsil Nazirliyinin "Məktəb icması" layihəsinin
işçi qrupunun, 2013-cü ildə ibtidai siniflərdə
qiymətləndirmə vasitələrinin hazırlanması
layihəsinin rəhbəri, 2014-cü ildə Azərbaycan
Respublikası Təhsil Nazirliyi ilə Dünya Bankı
tərəfindən aparılan milli qiymətləndirmə
tədqiqatları və digər qiymətləndirmə layihələri
çərçivəsində qiymətləndirmə vasitələrinin
hazırlanması üzrə məsləhətçisidir.
|
|
Aygün
MİKAYILOVA,
Bakı Avropa Liseyinin Azərbaycan dili və
ədəbiyyat müəllimi
1973-cü ildə Bakıda anadan olub. 1996-cı ildə
Azərbaycan Dövlət Pedaqoji Universitetinin
filologiya fakültəsini bitirib. Azərbaycan
Respublikası Prezidentinin 25 sentyabr 2008-ci
il tarixli, 3062 nömrəli sərəncamı ilə "Əməkdar
müəllim" fəxri adı ilə təltif edilib.
Şagirdlərindən Prezident təqaüdçüsü, 600-dən çox
bal toplayan, olimpiada və beynəlxalq müsabiqə
qalibləri var. 1999-cu ildən etibarən
Azərbaycan dili və ədəbiyyat dərsliklərinin
metodiki rəyçisi, 2010-cu ildən isə 8 və 9-cu
siniflər üçün Azərbaycan dili dərsliyinin
həmmüəllifidir. 1998-ci ildən müxtəlif
təlimlərdə iştirak edib və bir çox sertifikatlar
alıb.
|
|
Rahilə
ƏLİYARZADƏ,
Bakı Avropa Liseyinin İKT üzrə direktor müavini
1973-cü ildə Bakıda anadan olub. 1996-cı ildə
Azərbaycan Dövlət Neft Akademiyasının
avtomatlaşdırılmış idarəetmə sistemləri
fakültəsini bitirib. Azərbaycan Respublikası
Təhsil Nazirliyinin Elektron Tədris Resursların
Qiymətləndirilməsi Şurasının üzvüdür. 2009-cu
ildə Azərbaycan Respublikası Prezidentinin
müvafiq sərəncamı ilə "Əməkdar müəllim" fəxri
adına layiq görülüb. Bundan başqa, Azərbaycan
Respublikası Prezidentinin sərəncamına əsasən
2007-2008-ci tədris ilində keçirilmiş "Ən yaxşı
müəllim" müsabiqəsinin qalibidir. 2009-cu ildə
"Microsoft" şirkəti və Təhsil Nazirliyinin birgə
keçirdiyi "İnnovativ müəllimlər" müsabiqəsinin,
2008-ci ildə isə Azərbaycanda təhsilin
inkişafına kömək məqsədilə Təhsil Nazirliyi,
"Ultra", "İntel", "Microsoft", "HP", "Siveco",
"Mədəd" şirkətlərinin birgə həyata keçirdikləri
"Elektron məktəb" və "Təhsilin elektron
idarəedilməsi" pilot layihələri çərçivəsində
qalibidir. "Azərbaycanın gənc kompüter
istedadları - 2007" müsabiqəsində şagirdləri
yüksək nailiyyətlər əldə etdiyinə görə Təhsil
Nazirliyinin Fəxri fərmanı ilə təltif olunub.
Bir çox beynəlxalq konfransların iştirakçısıdır.
İKT sahəsində keçirilən treninqlərdə təlimçi
kimi fəaliyyət göstərir.
|
|
Xumar
ƏHMƏDBƏYLİ,
Bakı Avropa Liseyinin biologiya müəllimi
1962-ci ildə Bakıda anadan olub. 1985-ci ildə
M.V.Lomonosov adına Moskva Dövlət
Universitetinin biologiya fakültəsini bitirib.
2007-ci ildə Təhsil Nazirliyinin Kollegiyasının
müvafiq qərarı ilə "Azərbaycan Respublikası
qabaqcıl təhsil işçisi" döş nişanı ilə təltif
olunub. Azərbaycan Respublikası Prezidentinin 19
avqust 2008-ci il tarixli Sərəncamı ilə
2007-2008-ci tədris ilində keçirilmiş "Ən yaxşı
müəllim" müsabiqəsinin qalibi olub, Azərbaycan
Respublikası Prezidentinin 3 oktyabr 2011-ci il
tarixli Sərəncamı ilə isə "Əməkdar müəllim"
fəxri adına layiq görülüb. Elmi jurnallarda çap
olunmuş bir sıra məqalələrin müəllifidir. Bundan
başqa, "Biologiya" (10, 11-ci sinif)
dərsliklərinin (T.Mikayılov, Y.Seyidli,
Q.Quliyev, Ş.Mahmudov, X.Əhmədbəyli) tərcüməçisi
və müəlliflərindən biridir. "Biologiya" (6-cı
sinif) dərsliyinin (Y.Seyidli, X.Əhmədbəyli,
N.Əliyeva) həmmüəllifi və tərcüməçisidir.
Yetirmələrindən bir çoxu Prezident təqaüdçüsü və
600-dən çox bal toplayaraq respublikamızın,
eləcə də dünyanın nüfuzlu ali təhsil
müəssisələrinə daxil olub. Bundan başqa, bir çox
layihələrdə və treninqlərdə fəal iştirak edib.
|
Niyazi
RƏHİMOV,
"Azərbaycan müəllimi" |