|
Təhsil Nazirliyinin elan etdiyi "İctimai təşəbbüslərin
dəstəklənməsi" müsabiqəsində Zaqatala rayon Humanitar
fənlər gimnaziyasının informatika müəllimi Bahar
İsmayılovanın qalibi olduğu Təhsil Nazirliyinin
maliyyələşdirdiyi, RTŞ dəstəyi ilə "Zaqatala rayonunda
"İnnovativ müəllimlər" qrupunun yaradılması və onların
köməyi ilə müəllimlərin yeni təlim metodlarının tətbiqi
faizinin yüksəldilməsi" layihəsi 4-cü aydır ki, uğurla
həyata keçirilir.
Rayonun hər məktəbindən bir-iki müəllim olmaqla müxtəlif
fənn müəllimlərindən, tədris işləri üzrə direktor
müavinlərindən ibarət iki qrupa Z.Əliyeva adına liseydə
şənbə və bazar günləri təlimlər keçirilir. Təlimlər
layihə rəhbəri, respublikanın əməkdar müəllimi, UNİCEF,
Təhsil Nazirliyi və "Mədəd" MMC birgə layihəsi əsasında
"Ümumi orta təhsil səviyyəsi üzrə yeni fənn
kurikulumlarının tətbiqi və fəal təlim" və digər
təlimlər üzrə təlimçi Bahar İsmayılova, "Süheyl-Kreo"
təşəbbüs qrupunun üzvü, Zaqatala Tədris Mərkəzinin
direktoru Cavanşir Ağayev tərəfindən aparılır.
İştirakçılar təlimlər zamanı nümunəvi inteqrativ dərslər
nümayiş etdirir, elektron təhsil vəsaitləri
hazırlayırlar. Artıq "İnnovativ müəllimlər" qrupu
yaradılmış və fəaliyyətə başlamışdır. Hazırlanan
elektron tədris vəsaitlərindən bir neçəsi
www.biaz.ucoz.net
saytında yerləşdirilmişdir. İştirakçılar işlədikləri
məktəblərin müəllimlərinə də nümunəvi, inteqrativ
dərslər üçün icmallar, elektron tədris vəsaitləri (ETV)
hazırlamaqda kömək edirlər.
Azərbaycan Müəllimlər İnstitutunun Zaqatala filialında
da əsasən III, IV qrup tələbələrindən ibarət "İnnovativ
tələbələr" qrupu yaradılmışdır. Qrupun üzvləri müxtəlif
tələbə elmi-tədqiqat işləri aparır, müəllimləri ilə
birgə layihə üsulundan istifadə etməklə müxtəlif
mövzularda hazırladıqları təqdimat, buklet və
bülletenlərdən mühazirə və seminarlarda, pedaqoji
praktika zamanı istifadə edirlər. Təlimin sonunda
nümunəvi dərs icmallarından ibarət broşür hazırlanacaq
və Azərbaycan Təhsil Problemləri İnstitutunun "Kurikulum
mərkəzi"nə təqdim ediləcəkdir. Hazırlanan elektron
təhsil vəsaitləri isə
www.biaz.ucoz.net
saytında açılacaq yeni bölmədə yerləşdiriləcəkdir.
Bakı Modern Məktəbi, Z.Əliyeva adına lisey, Bakı Avropa
liseyi, Xəzər Enerji Mərkəzinə, tədris-təcrübə məqsədli
ezamiyyə təşkil olunması nəzərdə tutulmuşdur. Təlimin
sonunda AMİ Zaqatala filialında konfrans keçiriləcək.
|
