|
Bolqarıstanın Samokov şəhərində keçirilən yeniyetmə
güləşçilərin Avropa çempionatında çıxışını başa vuran
yunan-Roma güləşi üzrə yığma komandamızın üzvləri Vətənə
qayıtmışlar.
AzərTAc xəbər verir ki, güləşçilərimizi Heydər Əliyev
Beynəlxalq Aeroportunda azarkeşlər, media nümayəndələri
və Azərbaycan Güləş Federasiyasının rəsmiləri
qarşılamışlar.
Çempionatın son iki günündə mübarizə aparan yunan-Roma
güləşçilərimiz 2 qızıl və 1 bürünc medal qazanmışlar.
Çempionatda 50 və 69 kiloqram çəki dərəcələrində finala
yüksələn güləşçilərimiz Nanjinqdə keçiriləcək
yeniyetmələrin II Olimpiya Oyunlarına 2 lisenziyanı da
təmin etmişlər.
Yığma komandamızın böyük məşqçisi Nurəddin Rəcəbov
demişdir ki, çempionata ciddi hazırlaşmışdıq. Əsas
məqsədimiz yeniyetmələrin II Olimpiya Oyunlarına
lisenziyalar qazanmaq idi. Buna da nail olduq.
Federasiya rəhbərliyi tərəfindən hazırlıqlarımız üçün
maksimum şərait yaradılmışdı. Bildiyiniz kimi, Avropa
çempionatlarında yunan-Roma güləşi yarışları daha gərgin
keçir. Biz də əsas məqsədimiz olan Olimpiya
lisenziyalarını qazanmaqla etimadı doğrultmağa çalışdıq.
Qarşıda bizi dünya çempionatı və Olimpiya Oyunları
gözləyir. Çalışacağıq ki, orada da qızıl medallar
qazanmaqla xalqımızı sevindirək.
"Nanjinq-2014"ə vəsiqəni qızıl medalla qazanan Cabbar
Nəcəfov və İslambek Dadov həm Avropa çempionu olduqları,
həm də Olimpiya Oyunlarına lisenziya qazandıqları üçün
sevindiklərini bildirmiş, Olimpiada da eyni uğuru
təkrarlamağa çalışacaqlarını qeyd etmişlər. |
