|
 Mayın
22-də Azərbaycan Müəllimlər İnstitutunda "Müəllim
hazırlığının müasir problemləri: texnologiya, təhsil və
inkişaf" mövzusunda III Beynəlxalq elmi konfrans işə
başlayıb.
Konfransda təhsil nazirinin müavini Ceyhun Bayramov,
Azərbaycan Müəllimlər İnstitutunun rektoru Aqiyə
Naxçıvanlı, Fransanın ESPE Versal Akademiyası, De
Serj-Pontuaz Universitetinin rektoru Jan-Pyer Şevalye,
Hindistanın KSTİ Universitetinin professoru Satyendra
Patnaik, Avstriyanın Krems Müəllim Hazırlığı
Universitetinin professoru Andreas Vessenbak,
Avstriyanın təhsil sahəsində beynəlxalq əməkdaşlıq üzrə
Avstriya Agentliyinin nümayəndəsi Karin Doegl, Rusiya,
Ukrayna, Gürcüstan ali məktəblərinin, elmi-tədqiqat
institutlarının tanınmış alimləri, eləcə də ölkəmizin
müxtəlif ali təhsil müəssisələrinin, Azərbaycan Milli
Elmlər Akademiyasının təmsilçiləri iştirak ediblər.
İlk öncə konfrans iştirakçıları institutun nəzdində
fəaliyyət göstərən Heydər Əliyev Mərkəzini ziyarət edib
və ulu öndərin büstü önünə əklil qoyublar.
Azərbaycan Müəllimlər İnstitutunun rektoru Aqiyə
Naxçıvanlı konfransı giriş sözü ilə açaraq iştirakçıları
salamlayıb, konfransın mövzusunun aktuallığından,
müəllim hazırlığının müasir problemləri üzrə qəbul
olunmuş məruzələrin müzakirəsinin əhəmiyyətindən
danışıb. Rektor bildirib ki, konfransda Dövlət
Strategiyasının həyata keçirilməsi ilə bağlı qarşıda
duran vəzifələr və onların həlli yolları, beynəlxalq
təcrübəyə uyğun, müasir tələblərə cavab verən müəllim
hazırlığı sisteminin formalaşması, yeni təlim
texnologiyaları və informasiya vasitələrindən
professional səviyyədə istifadə yolları, idarəetmə
sisteminin təkmilləşdirilməsi, pedaqoji kadr təminatı
məsələlərinə dair müzakirələr aparılacaqdır.
Beynəlxalq elmi konfransın plenar iclasında çıxış edən
təhsil nazirinin müavini Ceyhun Bayramov sürətlə inkişaf
edən Azərbaycanda təhsil sisteminin insan kapitalının
inkişafı çağırışlarına cavab verməsi istiqamətində yeni
hədəflərin müəyyənləşdirilməsinə və təhsilin keyfiyyət
göstəricilərinin Avropa standartlarına
uyğunlaşdırılmasına ehtiyac duyulduğunu bildirib. Bu
baxımdan ölkə Prezidenti cənab İlham Əliyevin imzaladığı
"Azərbaycan Respublikasında təhsilin inkişafı üzrə
Dövlət Strategiyası" mühüm əhəmiyyət kəsb edir. Həmin
konseptual sənəddə ölkəmizdə beynəlxalq standartlara
cavab verən təhsil sisteminin inkişaf istiqamətləri,
başlıca hədəfləri dəqiq şəkildə müəyyənləşdirilib və
təhsil işçiləri qarşısında yeni, məsul vəzifələr
qoyulub. Strategiyanın məqsədi ölkədə səriştəli
təhsilverənlərə, ən yeni texnologiyalara əsaslanan
infrastruktura malik, keyfiyyət nəticələri və
əhatəliliyinə görə dünya ölkələri sırasında qabaqcıl
mövqe tutan təhsil sistemini yaratmaqdır.
Azərbaycanda müəllim hazırlığı, ixtisasartırma və
müəllimlərin işə qəbulu sahəsində aparılan islahatlara
diqqət çəkən nazir müavini hazırda bu prosesə
respublikamızın aparıcı mütəxəssislərinin və beynəlxalq
ekspertlərin cəlb olunduğunu söyləyib. Təhsil Nazirliyi
tərəfindən ümumtəhsil məktəblərinə müəllimlərin işə
qəbulu sahəsində beynəlxalq təcrübəyə uyğun yeni
mexanizmin tətbiqinə başlanılıb. Bu mexanizmin üstünlüyü
ondan ibarətdir ki, müəllim kadrlarının seçilməsi və
yerləşdirilməsi elektron müraciət, elektron imtahan,
elektron yerləşdirmə vasitəsilə həyata keçirilir.
Nazir müavini qeyd edib ki, Azərbaycanda təhsil
infrastrukturunun əsaslı şəkildə yeniləşdirilməsi,
məzmun islahatları, yeni nəsil dərsliklərin, yeni
qiymətləndirmə sisteminin tətbiqi sahəsində əldə olunmuş
nailiyyətlər təhsilin keyfiyyətinə təsir edən başlıca
amillərdir. Müəllimlərin peşəkarlığının artırılmasına
nail olmadan təhsil sahəsində uğurlu nəticələr əldə
etmək mümkün deyil. Daim yeni biliklər əldə etmək
həvəsi, öyrənmək və özünü təkmilləşdirmək səyləri,
mənəvi inkişaf müəllimin əsas xüsusiyyətləri olmalıdır.
Bütün bunlar müəllimlərin peşəkarlıq səviyyəsinin
yüksəldilməsi istiqamətində beynəlxalq təcrübəyə uyğun
yeni mexanizmlərin tətbiqini zəruri edir.
Bu tədbirin müəllim hazırlığı sahəsində mövcud
problemlərin müzakirəsi və perspektiv inkişaf
istiqamətlərinin müəyyənləşdirilməsi baxımından faydalı
olacağına əminliyini ifadə edən təhsil nazirinin müavini
konfransın işinə uğurlar arzulayıb.
Daha sonra Fransanın ESPE Versal Akademiyası, De
Serj-Pontuaz Universitetinin rektoru Jan-Pyer Şevalye,
Hindistanın KSTİ Universitetinin professoru Satyendra
Patnaik, Avstriyanın Krems Müəllim Hazırlığı
Universitetinin professoru Andreas Vessenbak,
Avstriyanın təhsil sahəsində beynəlxalq əməkdaşlıq üzrə
Avstriya Agentliyinin nümayəndəsi Karin Doegl çıxış
ediblər.
Günün ikinci yarısında konfrans öz işini bölmə
iclaslarında davam etdirib.
III Beynəlxalq elmi konfrans mayın 24-də başa
çatacaqdır. |
