Bu
dünyada hər kəs ona verilən ömür payını bir cür yaşayır.
Elə buna görə də "mənalı ömür", "şərəfli ömür"
ifadələri yaranıb. Bəziləri yalnız özləri üçün yaşayaraq
bu ömrü istədikləri, bacardıqları kimi başa vursalar da,
başqaları hər günün qədrini bilərək yaşadıqları üçün
məsuliyyət daşıyır, bəzən özlərini unudaraq cəmiyyətə,
insanlara xeyir verməyə çalışırlar. Belələrindən biri də
Rafiq müəllimdir.
Rafiq Babalı oğlu Nəbiyev 1950-ci ildə Ağdaş rayonunun
Orta Ləki kəndində anadan olub. 1956-cı ildə bu kənddə I
sinfə gedən Rafiq Orta Ləki kənd səkkizillik, sonra isə
Ləki qəsəbə orta məktəbini əla qiymətlərlə başa vurub.
O, Babalı kişinin ailəsində böyüyən 10 uşaqdan ən böyüyü
olub. Lakin bütün çətinliklərə, kənd yerində təsərrüfat
işlərinin çoxluğuna baxmayaraq savada, biliyə böyük önəm
verən valideynləri onun təhsildən yayınmasına razı
olmayıb, yaxşı oxuması üçün əllərindən gələni
əsirgəməyiblər. Öz növbəsində, Rafiq də təhsil aldığı
illərdə həmişə yüksək bilik və qabiliyyəti ilə
fərqlənərək özündən kiçik bacı və qardaşlarına yaxşı
nümunə olub.
1966-cı ildə imtahanları uğurla verən R.Nəbiyev
V.İ.Lenin adına Azərbaycan Pedaqoji İnstitutunun (indiki
ADPU) riyaziyyat fakültəsinə qəbul olunub. 1970-ci ildə
institutu bitirən gənc Orta Ləki məktəbində riyaziyyat
müəllimi kimi pedaqoji fəaliyyətə başlayıb.
Müəllim o vaxt böyük uğur qazana bilir ki, tədris etdiyi
fənni şagirdlərinə sevdirməyi bacarır. Daim axtarışlar
aparırsa, fənnini sevdirmək üçün yollar, üsullar arayıb
öyrənirsə, onda o müəllimin nüfuzu da olur, fənni də
sevilir. Rafiq müəllim də öz üzərində daim işləyib,
təkmilləşməyə can ataraq əlavə ədəbiyyatlar axtarıb-tapıb,
dərs dediyi şagirdlərinə riyaziyyatı sevdirməyə çalışıb.
İstedadlı şagirdləri üzə çıxararaq onlarla əlavə
məşğələlər keçib, yetirmələrinin bu elmin sirlərinə
dərindən bələd olması üçün bütün qüvvəsini səfərbər edib
və nəticədə zəhməti öz bəhrəsini verib. Çox keçmədən
Rafiq müəllimin şagirdləri riyaziyyat üzrə
olimpiadalarda fərqlənərək uğurlar qazanmağa başlayıblar.
Bunun nəticəsində R.Nəbiyev rayonun riyaziyyat fənni
üzrə olimpiada komissiyasının sədri seçilib.
İşlədiyi az müddət ərzində o, qayğıkeş, eyni zamanda
zabitəli, təmkinli, təlim-tərbiyəsi ilə məşğul olduğu
şagirdlərinin savadları, həyatda öz fəaliyyətləri ilə
xalqa, millətə, el-obaya gərəkli övladlar olmasına
çalışan müəllim kimi tanınıb. Öz bacarığı, işgüzarlığı,
qayğıkeşliyi, ən başlıcası isə məsuliyyəti sayəsində
çalışdığı kollektivdə, yaşadığı kənddə, eləcə də Ağdaş
əhalisi arasında böyük nüfuz qazanıb.
Belə yüksək insani keyfiyyətləri və qabaqcıl pedaqoji
təcrübəsi nəzərə alınan Rafiq Nəbiyev 1977-ci ildə Ləki
qəsəbə orta məktəbinə direktor təyin olunub. Çox gənc,
27 yaşında olmasına baxmayaraq o, 1500 nəfərdən artıq
şagird və müəllim kontingenti olan təhsil müəssisəsinə
bacarıqla rəhbərlik edib. İki il burada işlədikdən sonra
təkcə rəhbəri olduğu pedaqoji kollektivin deyil, rayonun
bütün təhsil ictimaiyyətinin xüsusi hörmətini qazanan
Rafiq müəllim 1979-cu ildə Maarif, Ali Məktəb, Elmi
İdarə İşçiləri Həmkarlar İttifaqı Ağdaş Rayon
Komitəsinin sədri kimi məsul bir vəzifəyə irəli çəkilib.
1981-1983-cü illərdə Ağdaş Rayon Partiya Komitəsində
siyasi maarif kabinetinin məsləhətçisi işlədiyi zaman
büronun qərarı ilə partiya məktəbinə göndərilən
R.Nəbiyev burada təhsilini fərqlənmə diplomu ilə başa
vurub.
Uzun illər ayrı-ayrı təhsil müəssisələrinə -
1983-1993-cü illərdə Yuxarı Ləki kənd orta məktəbinə,
1996-2000-ci illərdə Ağdaş Kənd Təsərrüfatı Texnikumuna,
2003-2006-cı illərdə Ağdaş internat məktəbinə rəhbərlik
edən Rafiq müəllim bu vəzifələrin məsuliyyətini
dərindən dərk edərək öz işinin öhdəsindən layiqincə
gəlib. 2006-cı ildən bu günədək Təhsil İşçiləri Azad
Həmkarlar İttifaqı Ağdaş Rayon Komitəsinin sədri
vəzifəsində işləyən R.Nəbiyev özü təlim-tərbiyə
prosesində iştirak etməsə də, pedaqoji fəaliyyət
göstərməsə də bu sahədə çalışanların dərd-sərinə
yarımağı, onlara hər cür qayğı və diqqət göstərməyi
özünün vəzifə borcundan daha artıq, həm də mənəvi borcu
sayır.
Qeyd etmək lazımdır ki, Rafiq müəllimin fədakar əməyi,
bacarıqlı təhsil işçisi kimi qazandığı nailiyyətlər
diqqətdən kənarda qalmayıb, 2010-cu ildə Azərbaycan
Təhsil İşçiləri Azad Həmkarlar İttifaqı Respublika
Komitəsinin fəxri fərmanı və Təhsil Nazirliyinin
"Qabaqcıl təhsil işçisi" döş nişanına layiq görülüb.
2013-cü il isə R.Nəbiyevin yaddaşında çox əlamətdar
hadisə ilə iz qoyub. O, ölkə Prezidenti cənab İlham
Əliyevin sərəncamı ilə "Tərəqqi" medalı ilə təltif
edilib.
Gözəl ailə sahibi olmaqdan əlavə, həm də qarşısına
həmişə yaxşı, xeyirxah insanlar çıxdığına görə özünü
həyatda xoşbəxt sayan Rafiq müəllim təhsil aldığı
məktəbin direktoru Məmməd Qədirovu, riyaziyyatı ona
sevdirən Böyükağa müəllimi, tələbəlik illərində ən yaxın
dostu Surət Məmmədovu minnətdarlıqla xatırlayır.
Müəllimliyi şərəfli peşə sayan Rafiq Nəbiyev 45 illik
fəaliyyətində riyaziyyat müəllimi işlədiyi illərdə xalqa
daha çox xeyir verdiyini düşünür, həmin illəri həyatının
ən parlaq dövrü hesab edir. Bizimlə söhbətində son bir
ildə təhsil sahəsində baş verən yeniliklərə də
münasibətini bildirən R.Nəbiyev müəllimlərin işə qəbulu,
onların peşəkarlıq səviyyəsinin yoxlanılması,
məktəblərdə neqativ hallara qarşı mübarizənin
gücləndirilməsi, 6 yaşı tamam olmamış istedadlı
uşaqların vaxtından əvvəl I sinfə qəbulu və digər
məsələlərlə bağlı görülən işləri müsbət
dəyərləndirdiyini vurğuladı.
Hicran ƏKBƏROVA,
"Azərbaycan müəllimi" |