"Sınaq qiymətləndirilməsinin müəllimlərə böyük faydası
olacaq"
Səadət
VEYSOVA,
Bakı Avropa liseyinin fizika müəllimi, əməkdar müəllim
Məlum olduğu kimi, son günlərdə təhsil ictimaiyyətinin,
ümumiyyətlə, bütün cəmiyyətin diqqət mərkəzində olan
müəllimlərin sınaq qiymətləndirilməsi məsələsi hər kəsin
müzakirə obyektinə çevrilib.
Sözün düzü, bəzi müəllimlərin bununla bağlı
narahatlığına heç cür haqq qazandıra bilmirəm. Bu,
sadəcə qiymətləndirmədir. Hər bir müəllimin ixtisası
üzrə bilik səviyyəsinin, innovativ metodlarla, yeni
kurikulumlarla işləmək bacarığının, təlim prosesində
şagirdləri ilə canlı, səmimi ünsiyyətdə olmaq
qabiliyyətinin yoxlanılmasıdır. Yəni, pedaqoji fəaliyyət
üçün zəruri olan amillərdir və müasir dövrdə hər bir
müəllim öz işini bu meyarlara əsasən qurmalıdır. Ona
görə də peşəsinin vurğunu olanlar, işinə məsuliyyətlə
yanaşanlar, tədris etdiyi fənni şagirdlərinə
sevdirməyə, dərindən mənimsətməyə çalışanlar, bir sözlə,
əsl müəllim adına layiq olanlar təhsil nazirinin bu
təşəbbüsünü bəyənir və dəstəkləyirlər.
Fikirləşirəm ki, fəaliyyətlərinin ən zəif həlqəsini
öyrənmək, hansı istiqamətdə daha çox çətinlik çəkdiyini
müəyyən edərək öz üzərində işləmək baxımından sınaq
qiymətləndirməsinin müəllimlərə böyük faydası olacaq.
Hesab edirəm ki, sınaqdan sonra müəllimlərin
peşəkarlığının artırılması və təkmilləşdirilməsi
istiqamətində çox mühüm tədbirlər həyata keçiriləcəkdir.
Buna misal olaraq istiqamətlər üzrə treninqlərin
təşkili, müəllimlərin ildə bir dəfə, ancaq yayda deyil,
bütün tədris ili ərzində müntəzəm olaraq treninqlərdə
iştirakı, bu işə peşəkar təlimçilərin cəlb edilməsi,
yaxşı işi ilə tanınan müəllimlərin qabaqcıl iş
təcrübəsinin yayılması, beynəlxalq təcrübənin
öyrənilməsi və s. göstərmək olar. Yəqin ki,
mütəxəssislər bununla bağlı öz sözlərini deyəcəklər.
İnanıram ki, görülən işlər son nəticədə müəllimlərin
biliyinin artırılmasını və pedaqoji ustalığının
səviyyəsinin yüksəlməsini təmin edəcəkdir.
"Diaqnoz vaxtında düzgün qoyulanda müalicəni uğurla başa
çatdırmaq olar"
Əminə
SƏFƏROVA,
Bakıdakı 6 nömrəli məktəb-liseyin Azərbaycan dili və
ədəbiyyat müəllimi,
"Ən yaxşı müəllim" müsabiqəsinin qalibi, "Tərəqqi"
medallı
Təhsil naziri Mikayıl Cabbarovun 6 may 2014-cü il
tarixli əmrinə əsasən bu günlərdə Bakı şəhərinin bütün
dövlət ümumtəhsil müəssisələrində çalışan müəllimlərin
bilik və səriştəsinin sınaq qiymətləndirilməsi
aparılacaqdır. Bu xəbəri ilk öncə məktəbimizin direktoru
Gülşən Orucovadan eşitdik. O, müəllimlərlə söhbətində bu
yoxlamanın təhsil sahəsində çox önəmli hadisə olduğunu
vurğuladı. Mövzu ətrafında gedən müzakirələr zamanı
kollektivimizin üzvləri də bu tədbiri müsbət
qarşıladıqlarını bildirdilər.
Məncə, bu işi hər bir müəllim müsbət qarşılamalı,
fəaliyyətindəki geriliyi aradan qaldırmağa hökmən səy
göstərməlidir. Ulu öndər Heydər Əliyev vaxtilə demişdir:
"Öz üzərində işləməyən müəllim yaxşı müəllim ola
bilməz".
Hər bir insan yeni dəblə geyinməyi xoşlayır. Libasımızı
dəyişdiyimiz kimi, təfəkkürümüzü də, işimizə olan
münasibəti də dəyişməyi bacarmalıyıq. "Azərbaycan
Respublikasında təhsilin inkişafı üzrə Dövlət
Strategiyası"nda təhsilalanların fərdi xüsusiyyətlərini
nəzərə alan innovativ təlim metodları və texnologiyaları
vasitəsilə təhsilin məzmununun səmərəli mənimsədilməsini
təmin edən yüksək nüfuzlu təhsilverənin
formalaşdırılması əsas hədəflərdən biri kimi
müəyyənləşdirilib. Mənə belə gəlir ki, müəllimlərin
peşəkarlıq səviyyəsinin daim yüksəldilməsini, müəllim
peşəsinin nüfuzunun artırılmasını, müəllimin karyera
inkişafı və fəaliyyətinin stimullaşdırılmasını təmin
edən yeni sistemin yaradılması üçün diaqnostik
yoxlamanın keçirilməsi labüddür.
Hər müəllim bu sınaqdan alnıaçıq çıxmaq üçün var qüvvəsi
ilə çalışmalı, heç bir uğursuzluq onu ruhdan
salmamalıdır. Diaqnoz vaxtında düzgün qoyulanda
müalicəni uğurla başa çatdırmaq olar. Mən bütün
həmkarlarıma uğurlar arzulayıram.
"Bu sınaq müəllimlərin özünü təsdiq etməsi üçün gözəl
fürsətdir"
Təranə
ƏLİYEVA,
Respublika İncəsənət Gimnaziyasının ibtidai sinif
müəllimi,
"Ən yaxşı müəllim" müsabiqəsinin qalibi
Bildiyimiz kimi, müəllimlərin peşəkarlıq səviyyəsinin
diaqnostikasını aparmaq məqsədilə sınaq
qiymətləndirilməsi keçiriləcək. Aydındır ki, bu,
peşəkarlıq səviyyəsi aşağı olan müəllimlərin müəyyən
edilməsindən sonra onların öz işinə məsuliyyətlə
yanaşmasını, üzərlərində ciddi işləməsini təmin edən
tədbirlərin həyata keçirilməsi, eləcə də təhsilin
keyfiyyətinin yüksəlməsinə xidmət edəcək.
Müəllimlərin sınaq qiymətləndirilməsi attestasiyaya
hazırlıq məqsədi güdür və çox gözəl bir addımdır. Mən
təhsil nazirinin müvafiq əmrini alqışlayıram. Çünki
müəllimlərin özünü təsdiq etməsi üçün bu gözəl
fürsətdir. Belə ki:
- sınaq qiymətləndirməsi nəticəsində peşəkar və
qeyri-peşəkar müəllimlərin səviyyəsi üzə çıxacaq;
- valideynlər, sözün əsl mənasında, yaxşı müəllimi aşkar
edə biləcək;
- müəllimlərin əməyi stimullaşdırılacaq;
- müəllimlərin repetitorluq etməsinə ehtiyac qalmayacaq.
Demək istərdim ki, özünə, savadına, peşəkarlığına
güvənən müəllimlər hər kəsin qabiliyyətinin üzə çıxması
üçün bu istiqamətdə müəyyən işlərin görülməsini çoxdan
arzulayırdılar.
Ümid edirəm ki, sınaq qiymətləndirməsi çox obyektiv
keçiriləcək, peşəkar müəllimlərimizin qabiliyyəti üzə
çıxacaq və onlar öz layiqli qiymətlərini alacaqlar. Bu
yolda peşəsinin bilicisi olan hər bir müəllimə uğurlar
arzulayıram.
"Müəllimlərin arasında yaxşı mənada rəqabət yaranacaq"
Təranə
ƏLİYEVA,
Bakıdakı 20 nömrəli məktəb-liseyin ingilis dili
müəllimi,
iki dəfə "Ən yaxşı müəllim" müsabiqəsinin qalibi
Sirr deyil ki, aramızda 45 dəqiqəni başa vurmaqla öz
işini bitmiş hesab edən, uzun illər boyu təlim
prosesini eyni metodla aparan, pedaqoji təcrübəsində heç
bir dəyişiklik etmədən fəaliyyət göstərən müəllimlərimiz
də var.
Buna görə də mən müəllimlərin sınaq
qiymətləndirilməsinin keçirilməsinə çox normal
yanaşıram. Hesab edirəm ki, bu istiqamətdə hansısa
formada müəyyən tədbirlərin keçirilməsinin vaxtı çoxdan
çatmışdır.
Yeri gəlmişkən, bir məsələyə də toxunmaq istərdim. Bəzən
elə olur ki, müəllim öz təcrübəsində yenilikləri tətbiq
edir, dərslərini interaktiv təlim metodlarına əsasən
qurur və s. Amma bütün bunları formal olaraq yerinə
yetirir, işin mahiyyətini başa düşmür. Mən çoxsaylı
müşahidələrimə əsasən bu qənaətə gəlmişəm ki, müəllimin
nəzəri cəhətdən hər şeyi öyrənməsi hələ onun gözəl
pedaqoq olmasına dəlalət etmir. Yəqin ki, sınaqdan
sonra həyata keçiriləcək tədbirlər, görüləcək işlər belə
müəllimlərin öz üzərində işləməsində, peşəsinin
bacarıqlı mütəxəssisi kimi formalaşmasında mühüm rol
oynayacaq.
Cəmiyyətdə hər bir sahədə olduğu kimi, təhsildə də
rəqabət olmalıdır. Ümid edirəm ki, bu sınaq
qiymətləndirməsi təhsil sahəsində yeni bir mərhələnin
başlanğıcı olacaq, yaxşılar layiqli qiymətlərini alacaq,
digərləri isə onlara baxıb daha səmərəli işləməyə
çalışacaqlar. Bu, müəllimlərin arasında yaxşı mənada
rəqabətin yaranmasına, son nəticədə isə təhsilin
keyfiyyətinin artmasına səbəb olacaq, şagirdlərdə
müəllimlərə inam yaranacaq.
"Hər kəs layiq olduğu dəyəri almalı və olduğu kimi
tanınmalıdır"
Qənirə
ƏMİRCANOVA,
Bakıdakı 190 nömrəli tam orta məktəbin Azərbaycan dili
və ədəbiyyat müəllimi,
pedaqogika üzrə fəlsəfə doktoru, əməkdar müəllim
Bugünki təhsildən müəllim, şagird və valideynlər çox şey
gözləyirlər. 20 illik pedaqoji təcrübəsi olan müəllim
kimi deyə bilərəm ki, öz işinin ustası olan
müəllimlərlə yanaşı, bilik və bacarığını lazımi
səviyyədə tətbiq edə bilməyən müəllimlər də yox deyil.
Bu məqamı da sınaq qiymətləndirməsi üzə çıxaracaq.
Məktəblərimiz də on il əvvəlki məktəblər deyil.
Dövlət Strategiyasında təhsil sahəsində insan
resurslarının müasirləşməsi tələbi nəzərdə tutulur. Bu
da, öz növbəsində, innovativ təlim metodlarının
tətbiqini vacib edir. Burada məqsəd "Azərbaycan
Respublikasında təhsilin inkişafı üzrə Dövlət
Strategiyası"na uyğun olaraq təhsilin məzmununun
səmərəli mənimsənilməsini təmin edən yüksək
nüfuzlu təhsilverənləri formalaşdırmaq,
yetişdirməkdir. Bunun üçün də müəllimlərin peşəkarlıq
səviyyəsinin daim yüksəlməsi, əlavə təlim
ehtiyaclarının müəyyənləşdirilməsi və
ixtisasartırmada müvafiq təlim-tədris
proqramlarının seçilməsinin təmin edilməsi çox
vacibdir. Nəticədə məqsəd müəllimin karyera inkişafı
və fəaliyyətinin stimullaşdırılmasını təmin edən yeni
sistemin yaradılmasını təşkil etməkdir. Bax budur
Təhsil Nazirliyinin mövqeyi və məramı: hər kəs
layiq olduğu dəyəri almalı və olduğu kimi
tanınmalıdır. Müəllimlik elə bir peşədir ki, bu peşə
sahibləri həmişə axtarışda olmalıdır. Əgər müəllim
öz üzərində işləmirsə, dərslərini zamanın tələbinə
uyğunlaşdırmırsa, şəxsiyyətyönümlü tərbiyədən söhbət
gedə bilməz. Əslində sınaq qiymətləndirmə bir
diaqnozdur və hesab edirəm ki, belə yanaşma
düzgündür, çünki idarəçilik məharəti iki ünsürdən -
ədalətlə cəzalandırmaqdan və ədalətlə təltif
etməkdən ibarətdir.
"Sınaq qiymətləndirilməsini inkişafyönümlü layihə kimi
dəyərləndirirəm"
Sevinc
ƏLİYEVA,
Bakı Modern Məktəbinin ibtidai sinif müəllimi,
"Ən yaxşı müəllim" müsabiqəsinin qalibi
Müəllimlərin hazırlığının ilkin diaqnostikası məqsədini
daşıyan sınaq qiymətləndirilməsi, şübhəsiz ki, təhsilin
keyfiyyətinin artırılması istiqamətində atılan mühüm
addımlardandır. Bu sınaq müəllimlərin öz zəif
cəhətlərini öyrənmələrinə, bilik və peşəkarlıqlarının
artırılmasına xidmət edir. Digər tərəfdən,
qiymətləndirmənin nəticəsindən asılı olaraq
müəllimlərin xüsusi kurslara göndərilməsi onların təlim
prosesini günün tələbləri səviyyəsində aparmasında
mühüm rol oynayacaqdır.
Sınağın indiki dövrdə böyük əhəmiyyət daşıyan
sosial-iqtisadi tərəfini də unutmaq olmaz. Söhbət, təbii
ki, müəllim əməyinin qiymətləndirilməsindən gedir.
Qiymətləndirmədə yüksək nəticə göstərmiş müəllimlərin
əməyinin rəğbətləndirilməsi nəzərdə tutulmuşdur ki, bu
da sosial vəziyyətlərinin yaxşılaşdırılmasına xidmət
etməklə yanaşı, həm də onların öz peşə bacarıqlarını,
bilik və səriştələrini artırmaqda stimul rolunu
oynayacaqdır.
Sınaq qiymətləndirilməsini inkişafyönümlü layihə kimi də
dəyərləndirmək olar, çünki bu müəllimlərin hazırlıq
səviyyəsinin, bütövlükdə məktəb işinin inkişafına xidmət
edir. Yaxşı müəllim olmaq üçün isə daim axtarışda olaraq
öyrənmək, öyrənməyi bacarmaq, öyrənərək öyrətmək
lazımdır.
Hazırladı: Hicran ƏKBƏROVA,
"Azərbaycan müəllimi" |