|
Tələbə Qəbulu üzrə Dövlət Komissiyasının (TQDK) verdiyi
məlumata görə, bu gün respublikanın bir sıra şəhər və
rayonlarının orta ümumtəhsil müəssisələrinin 9 və 11-ci
siniflərində təhsil alan şagirdlər üçün
mərkəzləşdirilmiş qaydada buraxılış imtahanları
keçiriləcəkdir.
İmtahanlar Naxçıvan MR, Lənkəran, Astara, Masallı, Lerik,
Yardımlı, Cəlilabad, Biləsuvar, Şirvan, Hacıqabul,
İmişli, Saatlı, Sabirabad, Salyan, Neftçala, Füzuli,
Beyləqan və Xocavənddə ümumilikdə 84 imtahan mərkəzində
aparılacaqdır.
Bu imtahanlarda ümumilikdə 47547 şagirdin imtahan
verəcəyi gözlənilir.
Həmin imtahanlarda iştirak edəcək şagirdlər "imtahana
buraxılış vərəqəsi"ni İnternet vasitəsilə çap edib
götürmək imkanı əldə ediblər. Buraxılış vərəqəsi ilə
yanaşı onlara "Yaddaş kitabçası"ndan çıxarış da təqdim
olunub.
Həmin gün saat 10-da IX sinif şagirdləri, 15-də isə XI
sinif şagirdləri öz biliklərini nümayiş etdirəcəklər.
İyunun 13-də keçirilən 9-cu siniflərin buraxılış
imtahanında Naxçıvan MR-də 4115, Lənkəranda 2167,
Astarada 1264, Masallıda 2374, Lerikdə 737, Yardımlıda
888, Cəlilabadda 2599, Biləsuvarda 1559, Şirvanda 1002,
Hacıqabulda 807, İmişlidə 1309, Saatlıda 1185,
Sabirabadda 2301, Salyanda 1680, Neftçalada 906,
Füzulidə 936, Beyləqanda 1134, Xocavənddə isə 72 nəfər
9-cu sinif şagirdinin imtahanda iştirakı nəzərdə tutulur.
11-ci siniflərin buraxılış imtahanında isə Naxçıvan MR-də
4211, Lənkəranda 1640, Astarada 1001, Masallıda 1466,
Lerikdə 472, Yardımlıda 687, Cəlilabadda 1648,
Biləsuvarda 1156, Şirvanda 668, Hacıqabulda 595,
İmişlidə 1145, Saatlıda 735, Sabirabadda 1743, Salyanda
1152, Neftçalada 675, Füzulidə 691, Beyləqanda 784,
Xocavənddə isə 43 nəfər 11-ci sinif şagirdinin imtahanda
iştirakı nəzərdə tutulur.
Həm 9-cu, həm də 11-ci siniflərin imtahanlarının idarə
edilməsi üçün ümumilikdə 192 imtahan rəhbəri, 2579
nəzarətçi müəllim ayrılıb.
Samirə KƏRİMOVA,
"Azərbaycan müəllimi" |
