Javascript DHTML Drop Down Menu Powered by dhtml-menu-builder.com

ARXİV

13 İyun 2014 - №22

 

Magistraturaya qəbul imtahanlarında ən yüksək nəticə göstərmiş tələbə

 

Bu günlərdə Tələbə Qəbulu üzrə Dövlət Komissiyasının magistraturaya qəbul imtahanlarının nəticələri ilə bağlı açıqladığı məlumata əsasən, Şəhla Səmədli ən yüksək bal toplayaraq respublika birincisi olub. Bakı Dövlət Universitetinin mexanika-riyaziyyat fakültəsinin tələbəsi olan bu gənc qız iki mərhələdə keçirilən qəbul imtahanlarında birinci mərhələdə 97 bal olmaqla, ümumilikdə 141 bal toplayıb.

Şəhla İlham qızı Səmədli 1993-cü il fevralın 1-də İsmayıllı şəhərində ziyalı ailəsində anadan olub. 1999-cu ildə İsmayıllı şəhər Eldar Məmmədov adına 3 nömrəli orta məktəbə birinci sinfə gedib. Ailənin digər övladları kimi, Şəhla da təhsil almağa başladığı ilk illərdən yüksək bilik səviyyəsi və hazırlığı ilə yaşıdlarından  həmişə seçilib. Peşəkar riyaziyyat müəllimi olan atası və ona dərs deyən qabaqcıl təcrübəyə malik müəllimləri sayəsində  tədris olunan bütün fənləri eyni dərəcədə sevib və dərindən mənimsəyib. Məhz bu səbəbdən Şəhla həmişə əla qiymətlərlə oxuyub və 2010-cu ildə orta məktəbi əlaçı kimi başa vurub. O, nə qədər bilikli olsa da heç vaxt arxayınlaşmayıb, atasının və digər müəllimlərinin köməyi ilə qəbul imtahanlarına çox ciddi hazırlaşıb.

Ali təhsil almaq üçün I ixtisas qrupunu seçən Şəhla imtahanda yüksək nəticə göstərməyə nail olaraq elə həmin il BDU-nun mexanika-riyaziyyat fakültəsinin tələbəsi adını qazanıb. Qeyd etmək lazımdır ki, sınaqlarda həmişə yüksək göstəricilər (682, 680, 670) əldə edən bu qız qəbul imtahanında 700 bal toplayacağına əmin olsa da  kiçik bir diqqətsizliyi  ucbatından onun biliyi 690 balla qiymətləndirilib.

Prezident təqaüdçüsü adına layiq görülən Şəhla bakalavr təhsili aldığı 4 il ərzində bu adı qorumağa çalışaraq həmişə əlaçı olub, daim biliyini artırmağa, elmləri dərindən öyrənməyə can atıb.

Şəhla deyir ki, mən təhsil aldığım illərdə ən yüksək nəticələrə nail ola bilmişəm. Lakin hamıdan fərqlənməyi qarşıma məqsəd kimi qoyduğumdan deyil, sadəcə, özümə borc bildiyim üçün yaxşı oxumuşam. Prezident təqaüdçüsü olandan sonra isə bu hissə çox böyük məsuliyyət də əlavə olunub. Fikirləşmişəm ki, hər addımımla bu adı layiqincə daşıdığımı sübut etməliyəm.

Hər bir sahədə qazanılan nailiyyət insanda ruh yüksəkliyi yaradır, daha yaxşı fəaliyyət göstərməyə həvəsləndirir. Yəqin ki, məhz buna görə Şəhla həyatının növbəti sınağında da böyük uğura imza atdı. Artıq o öz seçimini edib - magistr təhsilini optimallaşdırma və optimal idarəetmə ixtisası üzrə BDU-da alacaq. Riyazi analiz kafedrasının əməkdaşı, riyaziyyat üzrə fəlsəfə doktoru Mehriban Ömərova bizimlə söhbətində onun barəsində dedi:

- Mən Şəhlaya IV kursda ixtisas fənnindən dərs demişəm. O, çox qabiliyyətli, fitri istedada malik bir qızdır. Lakin bildikləri ilə heç vaxt kifayətlənmir, həmişə oxuyur, öyrənməyə çalışır, dərsdənkənar vaxtının demək olar ki, hamısını kitabxanada keçirir. Qrup nümayəndəsi kimi öz işinin öhdəsindən bacarıqla gəlir, yoldaşlarına hər bir məsələdə yardım etməyi özünə borc bilir. Universitetin ictimai işlərində də fəal iştirak edir.  Ən əsası isə odur ki, ağlı və tərbiyəsi ilə həm tələbələrin, həm də müəllimlərin böyük hörmətini qazanan bu qızda bütün insani keyfiyyətlər cəmlənib. Mən ona təhsilində olduğu kimi, gələcək  elmi fəaliyyətində də böyük nailiyyətlər qazanmağı arzulayıram və buna qəlbən inanıram.

Şəhlanın gələcəklə bağlı planları, arzuları çox böyükdür. O, təhsilini başa vurduqdan sonra  xalqına ləyaqətlə xidmət etmək  niyyətindədir. Bu yolda Şəhlaya uğurlar arzulayırıq. 

Hicran ƏKBƏROVA,
"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov