|
 Bu
günlərdə Paris Təhsil Assosiasiyasının vitse-prezidenti
xanım An Mari Polonun dəvət məktubuna əsasən Təhsil
Problemləri İnstitutunun direktoru Qulu Novruzov,
direktor müavini Ənvər Abbasov, aparıcı elmi işçisi
Gülbəniz Camalova və tərcüməçi, fransız dili üzrə elmi
müxbir İffət İsayeva Fransada səfərdə olublar.
Nümayəndə heyəti Fransanın Azərbaycandakı səfirliyinin
vasitəçiliyi ilə təhsil sahəsində əməkdaşlıq etmək üçün
əvvəlcədən planlaşdırılmış səfər çərçivəsində Paris
Təhsil Assosiasiyası (CİLAROM), Dijon Təhsil
Tədqiqatları İnstitutu (İREDU) və Sevr Beynəlxalq
Pedaqoji Araşdırmalar Mərkəzi (CİEP) ilə işgüzar
görüşlər, təhsilin bir neçə istiqaməti və tədqiqat
sahələri ilə bağlı əməkdaşlıq etmək üçün müzakirələr
təşkil olundu.
Paris Təhsil Assosiasiyasının vitse-prezidenti xanım An
Mari Polonun Fransa təhsil sistemi, fənn proqramlarının
xüsusiyyətləri və hazırlanması, pedaqoji tədqiqatların
aparılması qaydaları və s. məsələlərlə bağlı təqdimatı
dinlənilib və fikir mübadiləsi aparılıb. Müzakirədə
Fransa təhsilinin özəllikləri, əldə olunmuş nailiyyətlər
və bu sahədə pedaqoji araşdırmaların rolu, təhsil
sahəsində irəliləyişlərin əldə olunması məqsədilə
müvafiq tədqiqatların aparılmasına və bunun müştərək
yerinə yetirilməsinə, digər birgə fəaliyyət
tədbirlərinin həyata keçirilməsinə ehtiyac olması barədə
fikirlər söylənilib.
Sevr Beynəlxalq Pedaqoji Araşdırmalar Mərkəzində xanım
Dominik Fuçikin koordinatorluğu ilə Təhsildə Əməkdaşlıq
Departamentində proqramlar üzrə məsul şəxs xanım Lisa
Bidanova, Qiymətləndirmə və Sertifikatlaşdırma
Departamenti üzrə müavin cənab Sebastien Jorj, Dil
tədrisi proqramları (DİLF, DELF, DALF) üzrə məsul şəxs
xanım Mari Rouss, proqramlar üzrə məsul şəxs xanım Anna
Polevkanın koordinatorluğu ilə direktor müavini cənab
Roje Filon, Sevr Beynəlxalq Təhsil Elmi Məcmuəsinin (RİES)
redaktor müavini xanım Mari-Jose Sanselm, Dil və
ünsiyyət departamentinin məsul şəxsi cənab Stefan
Dutrölan, Avropa Birliyi proqramları üzrə məsul şəxs
xanım Amandin Vogt ilə görüşlər keçirilib. Bu
görüşlərdə Fransada 2000-ci ildən etibarən nəticəyönümlü
sistemin yaradılması, şəxsiyyətin inkişafını izləməyə
imkan verən kompetensiyaların hazırlanması və onun
tətbiqinə başlanması müzakirə obyektinə çevrilib. Eyni
zamanda, şagirdin mənimsəməsində şüurlu qavramaya
üstünlük verilməsi, idrak fəallığının artırılması və
dəyərlərə keyfiyyət göstəricisi kimi yanaşılması, bundan
əlavə, yeni qiymətləndirmə sisteminə keçilməsi barədə
də müzakirələr aparılıb. Müzakirələr zamanı məktəb
proqramlarının hazırlanması, qiymətləndirmə
mexanizmlərinin yaradılması, müxtəlif fənlər, o
cümlədən fransız dilinin tədrisi üzrə konkret
tədbirlərin hazırlanıb həyata keçirilməsi, müəllim
kadrlarının keyfiyyətinin yüksəldilməsi, 850 müəllifi
ehtiva edən xüsusi jurnalın nəşr olunaraq yayılması, ən
başlıcası, institutun 70% özünümaliyyələşdirmə sistemi
ilə işləməsi barədə məsələlər ətrafında fikir mübadiləsi
aparılıb, bu sahədə əlaqələrin qurulması imkanlarından,
milli qiymətləndirmə sahəsində fəaliyyətlərdən danışılıb.
Gələcəkdə bu sahələrdə əməkdaşlığın yaranmasının
mümkünlüyü və onun həyata keçirilməsi mexanizmləri
barədə təkliflər irəli sürülüb.
Nümayəndə heyəti həmçinin Dijon şəhərində yerləşən
Burgony Universiteti və onun nəzdindəki Təhsil
Tədqiqatları İnstitutunda (İREDU) təhsilin iqtisadiyyatı
üzrə professor cənab Tiyeri Şövalye, beynəlxalq
əlaqələr üzrə məsul şəxs cənab Jak Murdok,
universitetlərarası əməkdaşlıq və proyektlərin
hazırlanması departamentinin məsul şəxsi cənab Bernar
Alteim və Erasm proqramları üzrə məsul şəxs xanım
Christin Görnar ilə görüşərək, onların fəaliyyətləri ilə
tanış olub və Təhsil Problemləri İnstitutunun
araşdırdığı problemlərlə bağlı müştərək tədqiqatların
aparılması haqqında ümumi rəyə gəliblər.
Fransa səfəri çərçivəsində aparılan müzakirələrin
nəticəsi olaraq əməkdaşlıq üçün təkliflər paketi
hazırlanmış, bağlanacaq müqavilənin ilkin layihə
variantı tərtib edilmişdir. Gələcəkdə birgə fəaliyyətin
təşkili üçün aşağıdakı məsələlərin nəzərə alınması
təklif olunub:
Xüsusi resurslardan və intellektual potensialdan
istifadə edərək qarşılıqlı elmi-tədqiqatların, elmi-metodik
məsləhətçilik və informativ fəaliyyətin həyata
keçirilməsi.
Azərbaycanda və Fransada müştərək seminar və təlimlərin
təşkili.
Təhsil menecerlərinin ixtisasının artırılması və təlimi
ilə bağlı müştərək öyrədici seminar və treninqlərin
təşkili.
Tədris proqramlarının və təlim metodikalarının
yeniləşdirilməsi istiqamətində islahatyönümlü
fəaliyyətləri əhatə edən elmi-tədqiqat işlərinin birgə
təşkili və aparılması.
Beynəlxalq təşkilatların maliyyələşdirdiyi təhsillə
bağlı beynəlxalq layihələrdə birgə iştirak.
Pedaqoji kadrların, o cümlədən elmi işçilərin
ixtisasının artırılması məqsədilə təhsil əlaqələrinin
qurulması və birgə fəaliyyətin təşkili.
Müəllim standartlarının hazırlanması məqsədilə
qarşılıqlı təcrübə mübadiləsinin təşkili, standartların
hazırlanması və tətbiq olunması.
Təhsil Problemləri İnstitutunun nümayəndə heyətinin
Fransaya səfəri iki ölkə arasında elmi-pedaqoji
əməkdaşlığın başlanğıcı kimi dəyərləndirilir və
gələcəkdə onun inkişaf etdirilməsi nəzərdə tutulur.
Gülbəniz CAMALOVA,
pedaqogika üzrə fəlsəfə doktoru, dosent |
