|
Təhsil Problemləri İnstitutu və "Smart Teshnologies"
şirkəti tərəfindən təşkil edilmiş "Təhsildə interaktiv
texnologiyalar-2014" müsabiqəsinin nəticələrinə dair
seminar keçirilib.
Məlum olduğu kimi, bir neçə ay əvvəl Təhsil Problemləri
İnstitutu və DYMO/Mimio (ABŞ) şirkətinin Azərbaycandakı
rəsmi nümayəndəliyi - "Smart Technologies" şirkəti
ümummilli lider Heydər Əliyevin anadan olmasının 91
illiyinə həsr olunmuş "İnteraktiv texnologiyalar və
müasir təhsil-2014" mövzusunda beynəlxalq elmi-praktik
konfrans çərçivəsində müsabiqə elan etmişdi. "Təhsildə
interaktiv texnologiyalar - 2014" adı ilə keçirilən
müsabiqədə respublikanın 5 şəhər və 23 rayonundan 315
nəfər müəllim 17 fənn üzrə 308 işlə iştirak edib.
Müsabiqəyə ən çox Bakı şəhəri ( 219) və Şəki rayonundan
(36) iş təqdim olunub.
Seminarda müsabiqənin finalına vəsiqə qazanmış 12 və
fərqlənmiş 12 işin müəllifləri, eyni zamanda müsabiqəyə
qoşulan digər müəllimlər də iştirak edib. Tədbirdə
müsabiqədə iştirak edən interaktiv rəqəmsal dərs
resursları nümayiş etdirilərək ekspertlər tərəfindən
təhlil edilib. Müəllimlər ekspertlərlə birlikdə
müsabiqəyə təqdim edilən tədris resurslarını müzakirə
ediblər. Bu vəsaitlərdəki ekspertlər tərəfindən nəzərə
çatdırılan yaradıcı və metodik nailiyyətlər, eləcə də
mövcud olan qüsurlar müəllimlər arasında geniş fikir və
təcrübə mübadiləsinə səbəb olub.
Qeyd etmək lazımdır ki, DYMO/Mimio şirkətinin
Azərbaycandakı rəsmi nümayəndəliyi tərəfindən
respublikamızda ilk olaraq 2010-cu ildə interaktiv
tədrisə aid www.edu.mimio.az təhsil saytı yaradılıb
ki, bu portalda müasir tədris prosesi üçün yararlı
olan, müəllimlər, eyni zamanda şirkət tərəfindən
hazırlanmış interaktiv multimedia resursları -
interaktiv dərs vəsaitləri mütəmadi olaraq
yerləşdirilir. Hazırda
www.edu.mimio.az saytında üç yüzdən artıq interaktiv
multimedia dərs resursu yerləşdirilib.
Təşkil olunan seminarlar da, ümumimilkdə, müəllimlər
üçün faydalı işın davamı kimi düşünülüb. Bu istiqamətdə
tədbirlərin təşkilində məqsəd interaktiv lövhələrdən
istifadə etməklə yeni təlim texnologiyaları ilə işləyən
təşəbbüskar müəllimlərin təcrübəsinin öyrənilib
yayılması və bütövlükdə pedaqoji kadrların
peşəkarlığının yüksəldilməsindən ibarətdir. Müsabiqəyə
təqdim olunan bütün interaktiv dərs materialları
adıçəkilən təhsil portalında yerləşdiriləcək. Müəllim və
ekspertlərin birgə əməkdaşlığı nəticəsində interaktiv
rəqəmsal dərs məlumat bazası zənginləşəcək və hər bir
müəllim bu tədris resurslarından bəhrələnərək
dərslərində istifadə edə biləcək. Müsabiqənin
nəticələrinə dair seminarların gələcəkdə də davam
etdirilməsi nəzərdə tutulub.
Hicran ƏKBƏROVA,
"Azərbaycan müəllimi" |
