ARXİV

4 İyul 2014 - №25

Beynəlxalq təhsil xəbərləri

İtaliyalı qadın 99 yaşında məktəbli attestatı aldı 

İtaliyalı  Françeska Kareddu  99 yaşında  məktəbli  attestatı  almağa müvəffəq olub. "Uçitelskaya qazeta"nın məlumatına əsasən F.Kareddu ailəsini  dolandırmaq məqsədilə məktəbi atmalı olub. Həm astma xəstəliyindən əziyyət çəkən anasına baxıb, həm də zeytun plantasiyasında işləyib.  Lakin o, bütün ömrü boyu təhsilini başa vurmaq barədə düşünüb. İndi isə 1915-ci il yanvarın 16-da ölkənin şimalındakı Sardiniya vilayətinin Nuoro şəhərində anadan olmuş Kardella öz arzusunu həyata keçirərək buraxılış imtahanı verib. İmtahan komissiyasının iştirakı ilə ona təntənəli şəkildə attestat təqdim ediblər. Mərasimdə onun 8 uşağı və çox sayda nəvəsi, nəticəsi iştirak edib. Çoxdan arzuladığı attestatı bir neçə dəfə öpən qoca sevincindən ağlayıb.

Təqaüdçü məzun italyan dili və riyaziyyat fənləri üzrə yazılı imtahanı yaxşı qiymətlə verib. O, indi tələbələrə imtahanlardan qorxmamağı məsləhət görür, baxmayaraq ki,  özü imtahandan qabaqkı gecə həyəcandan yuxulaya bilmədiyini etiraf edib.  Xatırladaq ki, ötən il amerikalı Odri Krebtri də 99 yaşında imtahan verərək məktəbli attestatı alıb.

Asiyanın ən yaxşı universitetlərinin reytinq cədvəli açıqlanıb 

Böyük Britaniyanın təhsil sahəsində aparıcı nəşrlərindən hesab olunan Times Higher Education (THE) dərgisi 2014-cü il üzrə Asiyanın ən yaxşı universitetlərinin reytinq cədvəlini açıqlayıb. Asiyanın 100 ən yaxşı universitetinin siyahısına Yaponiyanın Tokio Universiteti başçılıq edir.  Reytinq cədvəlində  Yaponiya 20, Çin 18  universitetlə təmsil olunub. Reytinqdə ilk ən yaxşı 10 yeri tutmuş ali məktəblər aşağıdakılardır: 1.Tokio Universiteti (Yaponiya), 2.Sinqapur Milli Universiteti (Sinqapur), 3.Honkonq Universiteti (Honkonq), 4.Seul Universiteti (Cənubi Koreya), 5.Pekin Universiteti (Çin), 6.Sinxua Universiteti (Çin), 7.Kiot Universiteti (Yaponiya), 8.Koreya Elm-Texnika İnstitutu-KAİST (Cənubi Koreya), 9.Honkonq Elm Texnologiya Universiteti (Honkonq), 10.Pohang Universiteti-Postech (Cənubi Koreya).

Reytinq 5 qrup - tədris, tədqiqat, elmi məqalələrdən sitat gətirilmə, innovasiya və iqtisadiyyata təsiri, beynəlxalq mobillik üzrə 15 kriteriya əsasında tərtib olunub. Budəfəki reytinq də son illərin tendensiyasını bir daha nümayiş etdirib: Asiya universitetləri ildən-ilə güclənir, ABŞ və Böyük Britaniyanın nüfuzlu universitetləri ilə rəqabət aparmağa çalışır. Təhlilçilər qeyd edirlər ki, Qərbdən fərqli olaraq təhsil və elmi tədqiqatlara qoyulan  investisiyaların həcmi Asiya ölkələrində ildən-ilə artır. Burada lider rolunda heç şübhəsiz Çin çıxış edir. Çində təhsilə ayrılan investisiyaların həcmi il ərzində 18 faiz artdığı halda, ABŞ-da aşağı düşməkdədir. Builki reytinqdə  Hindistanın da mövqeyi güclüdür. Bu ölkə təsadüfi deyildir ki, "ilin ulduzu" adlandırılıb. Ötən reytinqdə Hindistan 3 ali məktəblə təmsil olunmuşdusa, builki reytinqdə onların sayı 10-a (!) çatıb.

İsveç parlamenti xarici tələbələr üçün miqrasiya qaydalarını asanlaşdırır 

İsveç parlamenti xarici ölkələrdən olan tələbələr üçün miqrasiya qaydalarını asanlaşdıran qanun layihəsini bəyənib. Qanun əcnəbi tələbələrin ölkəyə  giriş-çıxış prosedurunun  sadələşdirilməsi   və beləliklə,  onların həyat  şəraitinin yaxşılaşdırılması məqsədini güdür. Dəyişikliklər tələbə, magistr və doktorantların  bu  ölkəyə gəlməsi, təhsil alması və işlə təmin olunması imkanlarını təmin edir.  Qüvvədə olan qanunvericiliyə əsasən, İsveçdə  4 il  müddətinə  işləmək icazəsi olan əcnəbi vətəndaş  5 il ərzində ölkə ərazisində  daimi yaşamaq izni almaq üçün ərizə verə bilər. Qəbul olunmuş son dəyişiklik  isə  bu müddətin  7 ilə qədər uzadılmasına imkan verir.  Bundan əlavə, 4 il doktorantura təhsili alan və bu ölkədə müvəqqəti yaşamaq izni olan əcnəbilər də 7 il  müddətində daimi yaşayış icazəsi almağa ümid edə bilərlər.

Xarici ölkədə təhsil və iş həyatı insanın yaradıcılıq qabiliyyətini artırır 

Fransa, Sinqapur və ABŞ-da  bir-birindən ayrılıqda  aparılmış  tədqiqatlar nəticəsində məlum olub ki, xarici ölkədə  təhsil  və  iş həyatı  insanın yaradıcılıq, intellektual qabiliyyətini artırır,  onun təfəkkürünə təsir edir. İnsan daha kompleksli və çevik düşünməyə başlayır.  Fransadakı tanınmış INSEAD biznes-məktəbin professoru Uilyam Meddaks, Sinqapur İdarəetmə Universitetinin professoru Ancela Lonq,  ABŞ-ın  Florida Universitetindən tədqiqatçı  alim Devid Terrio tərəfindən aparılmış araşdırmalar göstərib ki, xaricdə təhsil almış və digər mədəniyyətlərlə təmasda olmuş insanlar mürəkkəb situasiyalardan daha yaxşı baş çıxarmaq qabiliyyətinə malikdir.  Zəkalı və digər ölkələrin  mədəniyyətinə açıq olan insanlar  daha düzgün qərarlar qəbul edir. Bir qayda olaraq, ali məktəbi başa vurduqdan sonra da məhz bu cür tələbələr daha çox iş təklifi alırlar.  Tədqiqatçılar qeyd ediblər ki, beynəlxalq təcrübəyə malik,  müxtəlif mədəniyyətlərə uyğunlaşmış insanlar daha kreativ düşüncə nümayiş etdirir, problemlərin öhdəsindən daha yaxşı gəlir,  daha tez  yeni biznes qurur, xidmət sahəsində sürətlə irəliləyirlər.