İyulun 9-da Sumqayıt Dövlət Universitetində "Beynəlxalq
əməkdaşlıq şöbəsinin formalaşdırılması və inkişaf
strategiyasının müqayisəli təhlili" mövzusunda təqdimat
mərasimi keçirilib.
Mərasimdə SDU-nu Avropa, MDB və Azərbaycan
universitetləri sırasında təmsil edən professor Nigar
İsgəndərova çıxış edərək layihə barəsində açıqlama
verib. Qeyd edib ki, biz Sumqayıt Dövlət Univesiteti
Avropanın UNİVİA layihəsində tərəfdaş universitet
qismində iştirak edir, layihənin müəllifi və
koordinatoru Azərbaycan Dövlət İqtisad Universitetidir.
Layihənin adı: universitetlərdə beynəlxalq əlaqələr üzrə
qurumların idarə olunması, inkişafı və
təkmilləşdirilməsidir. Bu böyük layihədə Avropadan
İtaliyanın Boloniya Universiteti, İspaniyanın Santyaqo
de Kompostella Universiteti, İngiltərənin Varvik
Universiteti, MDB ölkələrindən Kiyev Dövlət İqtisad
Universiteti, Poltava İqtisad və Ticarət Universiteti,
Qırğızıstan Dövlət İqtisad Universiteti, Tacikistanın
Xocand Dövlət Universiteti, Tacikistan Sahibkarlıq və
Xidmət Universiteti, Azərbaycandan isə Bakı Dövlət
Universiteti, Sumqayıt Dövlət Universiteti, Gəncə Dövlət
Universiteti, Naxçıvan Dövlət Universiteti tərəfdaş
universitetlər qismində iştirak edirdi.
N.İsgəndərova bildirdi ki, Sumqayıt Dövlət
Universitetinin bu layihədə rəhbəri olaraq iyun ayında
keçirilən iki günlük seminarda iştirak edib. Hər bir
iştirakçı universitet öz layihəsini təqdim etdi. Bu
layihənin həyata keçirilməsində əsas məqsəd
universitetin beynəlxalq əlaqələrini genişləndirmək,
tələbə, müəllim, professor heyətinin mübadiləsini təşkil
etmək, birgə elmi tədqiqat layihələrini həyata keçirmək,
elmi konfranslar, simpoziumlar keçirməkdir. Əsas diqqət
tələbə mübadiləsinə yönələcək. Qeyd edildi ki, Sumqayıt
Dövlət Universitetində 2006-cı ildən Əcnəbi Tələbələr
üçün Hazırlıq Mərkəzi fəaliyyət göstərir. Bu illər
ərzində Hazırlıq Mərkəzində Türkiyə, Rusiya, İran,
Suriya, Koreya, Çin, İsrail və başqa ölkələrdən
tələbələr hazırlıq kurslarını keçməklə həm Azərbaycan
dilini öyrəniblər, həm də bakalavr və magistr
pilləsində təhsillərini davam etdirirlər.
Təqdimatın sonunda SDU-nun rektoru Elxan Hüseynov çıxış
edərək layihədə irəli sürülən məsələlərə münasibətini
bildirib.
Mətbuat xidməti |