İyulun 18-də Bakıda "PAŞA Bank" və "British Council"
-Azərbaycan təşkilatının birgə təşkil etdikləri
"Gələcəyə təşəbbüs" ənənəvi yazı müsabiqəsi qaliblərinin
mükafatlandırılma mərasimi keçirilib. Tədbirdə "PAŞA
Bank"ın korporativ kommunikasiyalar departamentinin
direktoru Sona Abbasova çıxış edərək müsabiqənin
nəticələri barədə məlumat verib.
Qeyd olunub ki, Azərbaycanın müxtəlif
universitetlərindən yüzə yaxın namizədin yazı işləri
münsiflər heyəti tərəfindən qiymətləndirilib. İqtisadi
inkişafla bağlı mövzuları əhatə edən yazılarda ölkənin
gələcək inkişafına dair müxtəlif yönümlü, orijinal
fikirlər öz əksini tapıb. Bu il iştirakçıların
müsabiqəyə daha məsuliyyət və səylə yanaşmaları
nəticəsində keyfiyyətli yazıların sayı artıb və
müsabiqədə daha rəqabətli mühit yaranıb.
Münsiflər heyətinin qərarı ilə Qafqaz Universitetinin
tələbələri Aysel Soltanlı və Toğrul İsmayılov,
Azərbaycan Dövlət İqtisad Universitetinin tələbələri
Zeynəb Dadaşova və Firəngiz Ağayeva, "ADA"
Universitetinin tələbəsi Ruqiyyə Qəhrəmanlı müsabiqənin
qalibi olublar. Onlar Böyük Britaniyanın nüfuzlu London
Kral Kollecində biznes üzrə yay kurslarında iştirak
edəcəklər.
Müsabiqədə fərqlənən digər iştirakçılara da dəyərli
hədiyyələr və sertifikatlar təqdim olunub.
Yusif ƏLİYEV,
"Azərbaycan müəllimi" |