|
Bolqarıstanın Plovdiv şəhərində keçirilən - qadınlar
arasında şahmat üzrə 15-ci Avropa şəxsi çempionatı başa
çatıb. Yarış İsveçrə sistemi üzrə keçirilib və 11 turdan
ibarət olub. Çempionatda 26 ölkədən 115 şahmatçı (63
qrossmeyster) iştirak edib. Azərbaycan Şahmat
Federasiyasından aldığımız məlumata görə, yarışda
ölkəmizi 10 şahmatçı, o cümlədən qrossmeysterlər- Gülnar
Məmmədova (2331), Türkan Məmmədyarova (2205), beynəlxalq
ustalar Xəyalə Abdulla (2233), Səbinə İbrahimova (2218),
Nərmin Kazımova (2180), FİDE ustaları Nərmin Xələfova
(2191), Günay Məmmədzadə (2182), həmçinin Aytən Amrayeva
(2065), Nərmin Məmmədova (2019) və Nərmin Söyünlü (1936)
təmsil ediblər.
Sonuncu turda Türkan Məmmədyarova və çempionatın
favoritlərindən biri sayılan, Rusiya təmsilçisi Nataliya
Poqonina qarşılaşması həmyerlimizin xeyrinə başa çatıb.
Beləliklə, Türkan 6.5 xal toplayaraq çempionatın 22-ci
pilləsində qərarlaşıb. Gülnar Məmmədova eyni xalı
toplasa da 29-cu yeri tutub. Xəyalə Abdulla, Günay
Məmmədzadə, Səbinə İbrahimova, Nərmin Kazımova və Aytən
Əmrayeva 6 xal, Nərmin Məmmədova və Nərmin Xələfova 4.5
xal, Nərmin Söyünlü isə 2.5 xal toplayıblar.
Çempion adını aktivinə 9 xal yazan Rusiya şahmatçısı
Valentina Qunina qazanıb. Çempionatda ilk 14 yeri tutan
şahmatçılar Dünya Kuboku uğrunda yarışda iştirak etmək
hüququ əldə ediblər. |
