|
Bu günlərdə Rusiyanın Tümen şəhərində cüdo üzrə
beynəlxalq turnir keçirilib. Azərbaycan Cüdo
Federasiyasından aldığımız məlumata görə, 40 ölkədən 330
cüdoçunun iştirak etdiyi yarışda komandamız 14 idmançı
ilə mübarizə aparıb.
Turnirin ilk günündə cüdo üzrə yığma komandamız bürünc
medal qazanıb. 60 kq çəki dərəcəsində mübarizə aparan
İlqar Müşkiyev ilk görüşdə qazaxıstanlı Qusman
Kirqizbayevə qalib gəlsə də, 1/4 finalda Rusiya cüdoçusu
Robert Mşvidabadzeyə məğlub olub. Bürünc medal uğrunda
təsəlliverici görüşə çıxan cüdoçumuz əvvəlcə
özbəkistanlı Şərafəddin Lütfullayevi, sonra isə Rusiya
təmsilçisi Savvi Karakizidini məğlub edərək bürünc
medala sahib çıxıb. Turnirin son günündə isə təmsilçimiz
Elmar Qasımov (100 kq) komandamıza qızıl medal
qazandırıb.
Finala qədər inamla irəliləyən cüdoçumuz qızıl medal
uğrunda yarışda Kanada idmançısı Kayl Reyes ilə
qarşılaşıb. Həlledici mərhələdə kanadalı rəqibindən
üstün olan Elmar Qasımov fəxri kürsünün ən yüksək
pilləsinə qalxaraq ölkəmizi layiqli təmsil edib.
Ümumilikdə bir qızıl və bir bürünc medal qazanan yığma
komandamız bu nəticə ilə beşinci yeri tutub.
Rəşad RAMAZANOĞLU,
"Azərbaycan müəllimi" |
