|
 Cənubi
Afrikanın Keyptaun (Cape Town) şəhərində keçirilmiş
55-ci Beynəlxalq Riyaziyyat Olimpiadası (International
Mathematics Olympiad -IMO) azərbaycanlı məktəblilər
üçün də uğurlu olub. Azərbaycan Beynəlxalq Təhsil
Mərkəzinin keçmiş Gəncə liseyinin şagirdi Fərman
Dumanov olimpiadanın bürünc medalını qazanıb. Digər
təmsilçilərimiz Mustafa Abdullayev (Quba liseyi XI sinif),
İsmət Ağayev (Quba liseyi X sinif ), Fərid Həsənli (Mingəçevir
filialı X sinif), İsa Bayramov (Sumqayıt liseyi XI sinif),
Mehdi Məhərrəmov (Şirvan liseyi XI sinif - ötən il
Kolumbiyada keçirilmiş riyaziyyat olimpiadasında bürünc
medal qazanıb) olimpiadanın həvəsləndirici mükafatlarına
layiq görülüblər.
Fərman Dumanov
1997-ci il dekabrın 4-də Rusiya Federasiyasının Moskva
şəhərində anadan olub. İlk təhsilinə 2004-cü ildə Gəncə
şəhər 28 nömrəli tam orta məktəbdə başlayıb.
Dərslərindən həmişə yüksək qiymətlər alıb. Təhsil
aldığı illərdə həmişə dəqiq elmlərə, xüsusən riyaziyyat
və fizikaya böyük maraq göstərib.
"Medalı mənə
təqdim edəndə çox sevindim"
- 2010-cu ildə Azərbaycan Beynəlxalq Təhsil Mərkəzinin
keçmiş Gəncə liseyinə qəbul imtahanı verdim və VII
sinifdən başlayaraq bu təhsil ocağında təhsilimi davam
etdirdim. 2 il ərzində burada riyaziyyatdan
olimpiadalara hazırlaşdım. 2012-ci ilin sentyabrında
Bakıda riyaziyyat üzrə dünya komandasına qəbul imtahanı
verdim və 5-ci nəticə göstərərək komandaya üzv
seçildim. Keçən il yaşım çox olduğundan gənclərin
Balkan olimpiadasına gedə bilmədim. Bu ilin yanvarında
ilk dəfə Qazaxıstanda keçirilən olimpiadada iştirak
etdim. Amma təəssüf olsun ki, burada medal almağa cəmi
bir balım çatmadı. Daha sonra mayda Bolqarıstanda
keçirilən Balkan olimpiadasında ilk medalımı qazandım.
Son olimpiada isə iyul ayında Cənubi Afrika
Respublikasında keçirilən Beynəlxalq Riyaziyyat
Olimpiadası oldu. Bilirdim ki, olimpiada çox çətin
olacaq. Olimpiadanın açılış mərasimi çox əyləncəli oldu,
həyəcanım bir qədər azaldı. Ancaq axşam yenə də çox
narahat idim, lakin imtahan salonuna daxil olanda
sakitləşdim. İkinci gündən sonra hər şeyin yaxşı
olacağına inanırdım. Artıq bilik yarışında bürünc medala
layiq görüləcəyim dəqiqləşmişdi. Bu, mənim beynəlxalq
olimpiadalarda qazandığım ikinci bürünc medal idi.
Növbəti gün çox sevincli idim, həm də çox darıxırdım,
medalımı almaq istəyirdim. Nəhayət, vaxt yetişdi. Məni
səhnəyə dəvət etdilər. Medalı mənə təqdim edəndə çox
sevindim, bu hissləri sözlə ifadə etmək mümkün deyil.
Hər şey çox gözəl idi. Ertəsi gün Vətənə qayıtmaq üçün
yola çıxdıq. Şükürlər olsun ki, hər şey əla olmuşdu,
biz sağ-salamat vətənə gəldik.
Mən gələcəkdə təhsilimi Kanada və ya Türkiyədə davam
etdirmək istəyirəm. Ən böyük istəyim mexanika
mühəndisi olmaqdır. Xaricdə təhsil alıb savadlı
kadr kimi Vətənə dönmək və ölkəmə, xalqıma xidmət
göstərmək istərdim. Mənə bu uğurları qazanmaqda kömək
edən hər kəsə, xüsusilə də, biz olimpiadaçılara daim
böyük dəstək verən komanda rəhbərimiz Fuad Qarayevə
minnətdarlıq edirəm. Eyni zamanda, biz olimpiadaçıları
daima diqqətdə saxladığı üçün "Azərbaycan müəllimi"
qəzetinə də çox təşəkkür edirəm.
"Olimpiadanın
Təşkilat Komitəsi komandamızın çıxışını uğurlu hesab
etdi"
Komandamızın rəhbəri, şagirdlərimizin beynəlxalq
olimpiadaya hazırlaşmasında böyük əməyi olan Fuad
Qarayev:
- Məlum olduğu kimi, Azərbaycan Respublikası təhsil
nazirinin müvafiq əmrinə əsasən 8 nəfərdən ibarət
komandamız məktəblilərin 55-ci Beynəlxalq Riyaziyyat
Olimpiadasında iştirak edib. Cənubi Afrika
Respublikasının Cape Town şəhərində keçirilmiş bu
olimpiadada Azərbaycan məktəbliləri uğurla çıxış etdilər.
Komandamız bir bürünc və 5 həvəsləndirici mükafat (sertifikat)
qazandı. Olimpiadadan zəngin təəssüratlarla ayrıldıq.
Qeyd etmək istərdim ki, məktəblilərimizin fəallığı,
məsələlərin həllinə diqqət və məsuliyyətlə yanaşmaları
olimpiadanın Təşkilat Komitəsi tərəfindən yüksək
qiymətləndirildi. Təşkilat Komitəsi 100-dən çox ölkədən
550 şagirdin iştirak etdiyi bu bilik yarışında
komandamızın çıxışını uğurlu hesab etdi. Bir neçə kəlmə
də olimpiadanın əhəmiyyəti barədə danışmaq istərdim.
Cape Town Universitetinin vitse-prezidenti doktor Maks
Price olimpiadanın açılış mərasimindəki çıxışında CAR-ın
ilk dəfə ev sahibliyi etdiyi olimpiadanın əhəmiyyətindən
danışaraq dünyanın müxtəlif ölkələrindən olan gənc zəka
sahiblərinin qatıldığı 55-ci Olimpiadanın "Olimpiya
Riyaziyyat oyunları" adlandırılmasından bəhs etdi.
Olimpiadanın CAR-da keçirilməsinin ölkəsi üçün
qürurverici olduğunu bildirən vitse-prezident qeyd etdi
ki, ölkəni inkişaf etdirməyin ən yaxşı vasitələrindən
biri gənc riyaziyyatçıların inkişaf etdirilməsidir.
Afrikanın faktik olaraq riyazi təfəkkürün beşiyi
olduğunu söyləyən vitse-prezident riyaziyyat elminin
məhz Afrika qitəsində öz yetkinlik çağına yetişdiyini
bildirdi.
Sonda "Azərbaycan üçün elm naminə bütün dünya ilə
yarışmağa çalışdıq" deyən F.Qarayev təhsilimizin
inkişafına öz töhfələrini vermiş yetirmələri ilə fəxr
etdiyini bildirdi.
Oruc MUSTAFAYEV,
"Azərbaycan müəllimi" |
