|
Azərbaycan Tibb Universitetində Şimali Kiprdən olan
qonaqlarla görüş keçirilib.
Universitetdən bildiriblər ki, Şimali Kiprin "British
University of Nicosia"nın rektoru, professor Cem Birol
və doktor Ersan Berkselin iştirak etdikləri görüşdə
ATU-nun ümumi işlər üzrə prorektoru Natiq Əliyev təhsil
müəssisəsinin fəaliyyəti, klinikaları, burada tədrisin
təşkili haqqında məlumat verib. Qeyd olunub ki, hazırda
universitetin 4 klinikası, 7 fakültəsi, 74 kafedrası
mövcuddur. ATU-da 17 ölkədən olan 800-dən artıq əcnəbi
tələbə təhsil alır. Onların əksəriyyətini türkiyəli
tələbələr təşkil edir.
Professor Cem Birol da, öz növbəsində, rəhbərlik etdiyi
"British University of Nicosia" barədə danışıb. Bildirib
ki, bu universitet ötən il yaradılıb. Artıq "British
University of Nicosia" bir sıra beynəlxalq təhsil
müəssisələri ilə əməkdaşlıq əlaqələri qurub.
Doktor Ersan Berksel universitetdəki sağlamlıq
fakültəsinin fəaliyyətindən söz açaraq ATU-nun bu
sahədə təcrübəsi ilə tanış olmaq arzusunda olduğunu
bildirib. Qeyd edib ki, "British University of Nicosia"nın,
həmçinin tibb sahəsində magistratura təhsili vermək
niyyəti də var və burada azərbaycanlı tələbələrə xüsusi
güzəştlər yaradıla bilər.
Görüşdə Azərbaycan Tibb Universiteti ilə "British
University of Nicosia" arasında gələcək əməkdaşlıq
əlaqələri ilə bağlı müzakirələr aparılıb. Qərara alınıb
ki, növbəti görüşlər üçün əməkdaşlıq haqqında memorandum
layihəsi hazırlansın.
Hicran ƏKBƏROVA,
"Azərbaycan müəllimi" |
