Javascript DHTML Drop Down Menu Powered by dhtml-menu-builder.com

ARXİV

22 Avqsut 2014 - №32

 

"Ölkəmizi tanıyaq" maarifləndirici tur-aksiyaları davam edir

 

Böyütmək üçün şəkili seçinAzərbaycan Respublikasının Prezidenti İlham Əliyevin tapşırığına əsasən, ölkəmizin tarixinin, mədəniyyətinin, adət-ənənələrinin, müstəqillik illərində əldə edilmiş nailiyyətlərinin dərindən öyrənilməsi məqsədilə müxtəlif şəhər və rayonlarda yaşayan gənclərin digər bölgələrə "Ölkəmizi tanıyaq" devizi ilə maarifləndirici tur-aksiyaları davam edir. Aksiya çərçivəsində ölkə gəncləri Naxçıvan, Gəncə, Lənkəran, Şəki, Quba, Qusar, Xaçmaz, Şamaxı, İsmayıllı, Qəbələ və digər bölgələrdə qədim tarixi, mədəniyyət abidələri, Heydər Əliyev mərkəzləri, tarix-diyarşünaslıq muzeyləri, gənclər mərkəzləri, Bayraq meydanları, rəsm qalereyaları və s. obyektlərlə tanış olurlar. 

Zərdab rayonunun ümumtəhsil məktəblərinin IX-XI sinif şagirdlərindən ibarət qrup avqustun 19-da təntənəli mərasimlə İsmayıllı-Qəbələ-Şəki marşrutu üzrə ekskursiyaya yola salınıb.

Mərasimdə çıxış edənlər Prezident İlham Əliyevin tapşırığı ilə "Ölkəmizi tanıyaq" devizi altında keçirilən maarifləndirici tur-aksiyalar çərçivəsində reallaşan bu səfərin yay tətili günlərində şagirdlər tərəfindən böyük sevinc və minnətdarlıqla qarşılandığını, Azərbaycanı, onun ayrı-ayrı bölgələrini yaxından tanımaq imkanı qazanmaq baxımından xüsusi əhəmiyyət daşıdığını vurğulayıblar. Tur-aksiya iştirakçıları yolasalma mərasiminə gələnlərin xeyir-duası ilə Zərdab şəhərindəki Heydər Əliyev parkının qarşısındakı meydandan onlar üçün ayrılmış xüsusi avtobusla İsmayıllı rayonunun Lahıc qəsəbəsinə yola düşüblər.

Tur-aksiyanın bələdçisi, Yarməmmədbağı kənd tam orta məktəbinin direktoru Kamal Soltanov bildirib ki, 4 gün davam edən tur-aksiyanın proqramı çox zəngin olub. Burada məktəblilər nəinki şən və mənalı istirahət edib, həm də respublikamızın qədim tarixə malik üç bölgəsi ilə ətraflı tanış olublar. İsmayıllı, Qəbələ və Şəkinin tarixi abidələri, zəngin muzeyləri, turizm obyektləri onlarda unudulmaz təəssürat yaradıb.

***

Avqustun 19-da Ağcabədi şəhərinin mərkəzi meydanında rayon rəhbərliyinin, təhsil işçilərinin və valideynlərin iştirakı ilə bu rayonun məktəblilərindən ibarət qrupun İsmayıllı-Qəbələ-Şəki marşrutu üzrə "Ölkəmizi tanıyaq" maarifləndirici tur-aksiyasında iştirak etmək üçün yola salınması mərasimi keçirilib. Tədbirdə çıxış edənlər dövlət başçısının tapşırığına əsasən təşkil olunan aksiyanın əhəmiyyətini yüksək qiymətləndirərək, məktəblilərə səfərlərinin xoş və mənalı keçməsini arzulayıblar.

Qeyd edilib ki, "Ölkəmizi tanıyaq" maarifləndirici tur-aksiyası məktəblilərin dünyagörüşünün artmasında, onların Vətənimizi daha yaxşı tanımasında və sevməsində böyük əhəmiyyət kəsb edir.  İsmayıllı, Qəbələ və Şəki rayonlarına yola düşən ağcabədili məktəblilər 4 gün ərzində tarix və mədəniyyət abidələri ilə, bölgələrdə həyata keçirilən sosial-iqtisadi inkişafla, Vətənimizin səfalı yerləri ilə yaxından tanış olacaqlar. Uşaqların sevincinin hədd-hüdudu yoxdur. Onların bu səfərdən ən xoş və unudulmaz təəssüratlarla dönəcəklərinə inam ifadə olunub. Yuxarı Qiyamədinli kənd tam orta məktəbinin IX sinif şagirdi Qəmər Hacıyeva tur-aksiyada iştirak etdiyinə görə çox sevindiyini bildirib. Qeyd edib ki, qədim tarixə malik Şəki şəhərini görmək, tarixi abidələri ilə tanış olmaq çoxdankı arzum idi. Eyni zamanda, İsmayıllı və Qəbələ rayonlarının gözəlliklərini, səfalı yerlərini görəcəyəm.

Ağcabədi şəhərindəki 4 nömrəli tam orta məktəbin IX sinif şagirdi Kərəm İsmayılov isə fikirlərini belə ifadə edib: "Şagird dostlarımla ölkəmizin gözəl yerlərini gəzməyə gedirik. Vətənimizin gözəllikləri, tarixi abidələri barədə televiziyada gördüklərimizi, kitablardan oxuduqlarımızı və eşitdiklərimizi özümüz görəcəyik. Bu səfər bizə çox şey verəcək. Bunun üçün tur-aksiyanın təşkilatçılarına minnətdarlığımı bildirirəm".

Tur-aksiyada iştirak edəcək şagird və müşayiətçilər ulu öndər Heydər Əliyevin Ağcabədi şəhərinin mərkəzi meydanındakı abidəsini ziyarət etdikdən sonra İsmayıllı-Qəbələ-Şəki marşrutu üzrə yola düşüblər.  

***

 "Ölkəmizi tanıyaq" tur-aksiyası çərçivəsində İsmayıllı-Qəbələ-Şəki marşrutu ilə hərəkət edən İmişli və Beyləqan məktəbliləri ekskursiyanın növbəti günündə, avqustun 18-də Şəkinin tarixi məkanları və görməli yerləri ilə tanış olub, muzeylərə baş çəkiblər.

Azərbaycan memarlığının nadir incilərindən olan Şəki xanlarının sarayı ilə tanışlıq məktəblilərə daha xoş təsir bağışlayıb. Qonaqların diqqətinə çatdırılıb ki, bu saray XVIII əsrə aid nadir tarix-memarlıq abidəsidir. Sarayın həyətindəki yaşı 500-ə çatan qoşa Xan çinarlar məktəblilərin böyük marağına səbəb olub.

Tur-aksiyanın iştirakçıları sonra "Yuxarıbaş" Tarix və Memarlıq Qoruğunun ərazisində yerləşən Şəki Tarix-Diyarşünaslıq Muzeyini ziyarət ediblər. Məlumat verilib ki, 1925-ci ildən fəaliyyət göstərən bu muzeydə 5 minə yaxın eksponat saxlanılır. İmişli və Beyləqan məktəblilərindən ibarət qruplar daha sonra qoruğun ərazisində fəaliyyət göstərən "Sənətkarlar evi"nə baş çəkiblər. Onlar burada şəkili sənətkar, məşhur şəbəkə ustası Hüseyn Hacımustafazadənin emalatxanasında olublar. Məktəblilərin diqqətinə çatdırılıb ki, qədim Şəki torpağı əsrlər boyu sənətkarlar məskəni olub. Şəki sənətkarlığından söhbət düşəndə, şübhəsiz, şəbəkə sənəti xüsusi qeyd olunur.

Bu sənətin incəliklərindən bəhs edən usta Hüseyn məlumat verib ki, şəbəkədə ağacdan hazırlanan ayrı-ayrı hissələr bir-birinə keçirilir və bənd edilir. Bu zaman yapışqan, mismar və digər bərkidici materiallardan istifadə olunmur. Bildirilib ki, şəbəkə Azərbaycanın bütün bölgələrində geniş yayılsa da ən incə, zərif və gözəl şəbəkə məhz Şəki xanlarının sarayındadır. Sadə şəbəkənin bir kvadratmetrinə 5 min xırda detal düşdüyü halda, Xan sarayındakı pəncərə şəbəkələrinin hər kvadratmetrinə 14 min detal və rəngli şüşə düşür. Vurğulanıb ki, usta Hüseyn özü Şəki xanları sarayının yenidən bərpasında yaxından iştirak edib.

Məktəblilər şəbəkə ustasının hazırladığı əl işlərinə böyük heyranlıqla tamaşa ediblər.

Sonra məktəblilər qoruğun ərazisindəki Yay teatrında şəhər mədəniyyət və turizm şöbəsinin təşkil etdiyi maraqlı konsert proqramını izləyib, doyunca rəqs ediblər.

XVIII əsrin sonu-XIX əsrin əvvəllərində inşa edilən "Yuxarı Karvansaray" mehmanxana kompleksi ilə tanışlıq da İmişli və Beyləqan məktəblilərinin ürəyincə olub. Bildirilib ki, Şərq memarlığı üslubunda tikilən bu tarixi abidə hazırda mehmanxana kimi fəaliyyət göstərir.

Məktəblilər həmin gün Şəkinin digər tarixi yerlərinə də baş çəkiblər, şəhərin görməli yerləri ilə tanış olublar.

 ***

Azərbaycan Respublikasının Prezidenti İlham Əliyevin tapşırığına əsasən "Ölkəmizi tanıyaq" devizi ilə keçirilən maarifləndirici tur-aksiya çərçivəsində İmişli və Beyləqan rayonlarından olan 80 məktəblidən ibarət iki qrup avqustun 17-də qədim və müasir Qəbələ ilə tanış olub. Şagirdlərin Qəbələ ilə tanışlığı "Tufandağ" Qış-Yay Turizm İstirahət Kompleksindən başlayıb. Şagirdlərə kompleks  barədə ətraflı məlumat verilib. Şagirdlər kanat yolu ilə dağların zirvəsinə qalxaraq Qəbələ şəhərini, ətrafdakı gözəl mənzərəni seyr edib, xatirə şəkli çəkdiriblər.

Sonra tarix-diyarşünaslıq muzeyinə gələn məktəblilər Qafqaz Albaniyasının paytaxtı olmuş Qəbələnin tarixi, mədəniyyəti və etnoqrafiyası haqqında məlumat əldə ediblər. Bildirilib ki, muzeyin əsas fondunda Qəbələnin 2500 illik tarixini əks etdirən 12 mindən çox tarixi və elmi əhəmiyyətə malik eksponat mühafizə olunur.

Heydər Əliyev Mərkəzini ziyarət edən şagirdlər burada ulu öndərin həyatını və siyasi fəaliyyətini əks etdirən fotoşəkil və sənədlərlə tanış olublar.

"Beltmann" piano fabrikində istehsal prosesi ilə yaxından tanışlıq zamanı tur-aksiyanın iştirakçılarına müəssisə barədə ətraflı məlumat verilib.

Nic qəsəbəsinə gələn şagirdlər buradakı "Cotari" alban kilsəsinə böyük maraqla baxıb,  Çuxur Qəbələ kəndində qədim Qəbələ şəhərinin xarabalıqları və ərazidə aparılan arxeoloji qazıntıların nəticələrini seyr ediblər. 

Niyazi RƏHİMOV,
Şakir CƏFƏROV,
"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov