|
 Böyüməkdə
olan gənc nəslin yay istirahətlərinin mənalı və səmərəli
təşkili, onların vətənə məhəbbət, dövlətçilik ruhunda
tərbiyəsi istiqamətində Səbail Rayon İcra Hakimiyyəti,
DİN Daxili Qoşunları və Azərbaycan Beynəlxalq Təhsil
Kompleksinin birgə layihəsinə yekun vurulub və layihə
əsasında təşkil olunan "Şahinlər" hərbi-vətənpərvərlik
təmayüllü düşərgədə yeniyetmələrin yay istirahəti başa
çatıb. Bu münasibətlə keçirilən təntənəli bağlanış
mərasimində qeyd olunub ki, rayonun Qarabağ müharibəsi
veteranları və əlillərinin, aztəminatlı və imkansız
ailələrin uşaqları, təhsildə və idmanda fərqlənən
şagirdlər, həmçinin "SOS-Azərbaycan" uşaq kəndində
tərbiyə alan, ümumilikdə 250-dən çox yeniyetmə düşərgədə
istirahət edib. Quba şəhərinin ən mənzərəli yerində
yerləşən Azərbaycan Beynəlxalq Təhsil Kompleksinin Quba
filialının ərazisində təşkil olunmuş
hərbi-vətənpərvərlik təmayüllü, ödənişsiz "Şahinlər" yay
istirahət düşərgəsində 2 həftə ərzində keçən mənalı və
yaddaqalan istirahət uşaqların xatirində silinməz izlər
buraxıb.
Səbail Rayon İcra Hakimiyyəti və Daxili Qoşunlar
tərəfindən istirahət üçün hər cür şərait yaradılan
düşərgədə şagirdləri gələcəkdə hərbi xidmətə layiqincə
hazırlamaq məqsədi ilə hərbi-səhra çadırı qurulmuş,
səhra mətbəxi yerləşdirilmiş, həyətdə Azərbaycan
xalqının ümummilli lideri Heydər Əliyevə, Silahlı
Qüvvələrin Ali Baş Komandanı, Azərbaycan Respublikasının
Prezidenti cənab İlham Əliyevə, ölkədəki ordu
quruculuğuna, Milli Qəhrəman Mübariz İbrahimova, Daxili
Qoşunların fəaliyyətinə, artıq 9-cu dəfə təşkil olunan
"Şahinlər" düşərgəsinin tarixinə həsr olunmuş stendlər
asılıb. Düşərgədə məşğələlərin hərbi nizamnaməyə uyğun
keçirilməsi uşaqların istirahətini daha da maraqlı və
yaddaqalan edib.
Uşaqların Qubanın görməli yerlərinə, meşələrə, rayonun
tarixi guşələrinə, o cümlədən Qubadakı Soyqırım
muzey-kompleksinə gəzintiləri təşkil olunub. İstirahətin
1 günü Daxili Qoşunlar tərəfindən hərbi-səhra
məşğələləri təşkil olunaraq gün ərzində şəxsi heyətin
yeməyi hərbi-səhra mətbəxi vasitəsi ilə verilib.
Məktəblilərin təlimləri Daxili Qoşunların Quba
şəhərindəki hərbi hissəsində keçib. Burada onlar hərbi
hissənin şəxsi heyətinin xidməti, yaşayış şəraiti, silah
və texnikası ilə yaxından tanış olub, xüsusi təyinatlı
bölüyün məşqlərinə qatılıblar.
Düşərgədə məktəblilərə Vətənimizin, xalqımızın
tarixindən bəhs edən müxtəlif mövzularda məşğələlər,
maraqlı görüşlər keçirilib, filmlər nümayiş olunub.
Düşərgənin bağlanışı ilə əlaqədar təşkil olunmuş
tədbirdə iştirak edən layihə təşkilatçıları Səbail
Rayon İcra Hakimiyyətinin başçısı Asif Əsgərov, DİN
Daxili Qoşunları komandanının müavini, general-mayor
Fəxrəddin Səmədov və digər qonaqlar uşaqların
istirahəti, burada onlar üçün yaradılmış şəraitlə
yaxından tanış olub, idman yarışlarında qalib gəlmiş bir
qrup şagirdə xatirə medalları və uşaqların tərbiyəsi
işlərində fərqlənmiş dəstə rəhbərlərinə və hərbiçilərə
qiymətli hədiyyələr təqdim ediblər.
Yeniyetmələr qonaqlar qarşısında hərbi keçid edib,
müxtəlif hərbi təlimlərdə və istirahət dövründə
öyrəndiklərini nümayiş etdiriblər.
Respublikamızın tanınmış incəsənət xadimləri və Daxili
Qoşunların hərbi orkestrinin iştirakı ilə keçirilən
konsertdə düşərgədə istirahət edən uşaqlar da öz
məharətlərini göstəriblər.
Yeniyetmələr və onların valideynləri istirahətin
təşkilatçılarına minnətdarlıqlarını bildiriblər.
Y.ƏLİYEV,
"Azərbaycan müəllimi" |
