|
 Azərbaycan
karateçiləri Türkiyənin Ərzurum şəhərində 11-ci
Beynəlxalq "Palandökən" turnirindən yüksək nəticə ilə
dönürlər. Əsasən yeniyetmə və gənclərdən ibarət seçmə
komandalarımızın bir neçə üzvü, həmçinin müxtəlif
regionları təmsil edən klub idmançılarının ümumi
nəticəsi ilə Azərbaycan 25 ölkə arasında 2-ci pilləyə
yüksəldi. 120 klubu təmsil edən 2100-dən artıq
idmançının qatıldığı nüfuzlu yarışda ilk pilləni Türkiyə
tutdu. Üçüncü yerin mükafatı isə İran idmançılarına
təqdim edildi.
Turnirin komanda kumite yarışlarında erməni idmançılarla
tatamiyə çıxan karateçilərimiz rəqiblərinin üzərində
parlaq qələbə qazanıblar. Böyüklərdən ibarət seçmə
komandanın üzvləri Pənah Abdullayev və Əli Cəfərov
rəqibə heç bir şans vermədən 7:0 hesablı qələbələrlə
komandamıza və onu dəstəkləyən böyük auditoriyaya gözəl
anlar yaşadıblar. Komandanın heyətində həmçinin Yusif
Əliyevlə Vüsal İsrafilov da yer alıb.
Görüşdən dərhal sonra pərt vəziyyətə düşən ermənilər
yarış zalını tərk ediblər.
Kumite yarışlarında əməkdar məşqçilər Anar Abdullayev və
Şahin Xudaverdiyevin çalışdırdığı seçmə komandanın
üzvlərindən 14-15 yaşlı yeniyetmələr Murad Hacızadə (+70
kq), 16-17 yaşlı gənclərdən Ülvi Qurbanov (-61 kq) və
Fəridə Əliyeva (+59 kq) turnirin qalibi oldular. 17-18
yaşlı gənclər komandasının və Daxili İşlər Nazirliyinin
İdman Cəmiyyətinin (DİN İC) üzvü Hüseyn Alıyev (-61 kq)
gümüş medala, 14-15 yaşlı yeniyetmələr Hümmət Baxşəliyev
(-52 kq) və Fidan Teymurova (-47 kq), eləcə də Ruslan
Cəfərzadə (-76 kq) və Aytac Əliyeva (-53 kq) bürünc
mükafata sahib oldular. Böyüklər arasında milli
komandanın üzvü Əli Cəfərov çempion oldu. Hakim
haqsızlığı bu dəfə də idmançılarımızın daha yüksək
nəticə göstərməsinə imkan vermədi. Ancaq buna baxmayaraq
karateçilərimiz dünyada liderlərdən olduqlarını bir daha
rəqiblərinə nümayiş etdirdilər.
Kumite yarışlarında paytaxt və regionları təmsil edən
bir neçə klubun, o cümlədən "Sərhədçi" İdman Klubundan
(məşqçilər Yavər Hüseynov və Vüqar Kərimov) Elçin
Quliyev 1-ci (10-11 yaşlılar), Elvin Cavadzadə 2-ci
yeri, "Araz" klubundan (məşqçiləri Vüsal İsrafilov və
Siyavuş Bayramov) Samir Salahov (11-12 yaşlılar, -45kq)
1-ci, İmdad Tanrıverdiyev isə 3-cü sıranı, "Qaraqaplan"
klubundan (məşqçi Cahangir Babayev) Seyidəli Novruzov
(18 yaşlı gənclər, -68 kq) 2-ci yeri, "Qızıl əlcək"
klubundan (məşqçi Mais Mədətov) Azər Əhmədovla (11-12
yaşlılar, -45 kq) Əvəzağa Səfərov (8-10 yaşlılar, -35
kq), həmçinin DİN İC-nin üzvü Emin Məcidov (məşqçi Elnur
Əsədov) 3-cü pilləni tutdular.
Komanda kumite yarışlarında 11-12 yaşlılar arasında
"Qaraqaplan" klubunun yetirmələri Süleyman Novruzov,
Rəvan Bağırov, Telman Yusifov və İmdad Tanrıverdiyev,
"Qızıl əlcək" klubundan Ruslan Qafarlı, Azər Əhmədov,
Samir Salahov və Məcid Zeynalov, həmçinin böyüklər
arasında Əli Cəfərov, Pənah Abdullayev, Vüsal İsrafilov
və Yusif Əliyev 3-cü yerə layiq oldular. Yarışı idarə
etmək üçün 120-dən artıq hakim arasında ölkəmizi 2
hakimimiz təmsil edib.
Kişilərdən ibarət komandamız ermənistanlı rəqiblərini
böyük üstünlüklə məğlub etdi. Karateçilərimizin bu
qələbəsi yarış zalında möhtəşəm qələbə əzmi ilə müşayiət
olundu. Növbəti yarış 12-13 sentyabr tarixlərində
paytaxtımızda V "Baku Open" beynəlxalq turniri olacaq.
Rəşad RAMAZANOĞLU,
"Azərbaycan müəllimi" |
