Javascript DHTML Drop Down Menu Powered by dhtml-menu-builder.com

ARXİV

29 Avqsut 2014 - №33

 

Beynəlxalq təhsil xəbərləri

 

Riyaziyyat üzrə ən yüksək mükafat almış ilk qadın

ABŞ-ın Stenford Universitetinin professoru Məryəm Mirzəxani riyaziyyat sahəsində ən nüfuzlu Filds mükafatına  layiq görülüb. O, riyaziyyatçılar üçün "Nobel" mükafatı hesab olunan fəxri adı   alan ilk qadın kimi tarixə düşüb. Mükafat  Məryəm  Mirzəxaniyə Seulda Cənubi Koreyanın ilk qadın prezidenti Park Qın He tərəfindən təqdim edilib.  37 yaşlı riyaziyyatçı-alim Harvard Universitetini bitirib.  Məryəm Mirzəxaninin  riyaziyyat  sahəsində  uğurları  hələ  çox  gənc yaşlarında  başlayıb.  O, 1994  və  1995-ci  illərdə çox  yüksək  balla  Beynəlxalq Riyaziyyat Olimpiadalarının qalibi olub. Filds mükafatından öncə o, 2013-cü ildə Amerika Riyaziyyat Assosiasiyasının mükafatını alıb. O, hazırda  riyaziyyatçılar arasında ən mürəkkəb məsələləri həll etməyə qadir olan  istedadlı  bir alim hesab edilir.  Məryəm Stenford Universitetinin rəsmi saytına  "Bu mənim üçün böyük şərəfdir. Əminəm ki, növbəti illərdə  bu  mükafatın qalibləri sırasında xanımların sayı daha çox olacaq" deyib.

Məryəm Mirzəxani 1977-ci ildə Tehranda anadan olub.  O, əvvəlcə   yazıçı olmaq istəyirdi.  Lakin orta  məktəbdə oxuyarkən riyaziyyat sahəsindəki uğurları onun gələcək həyatına tam dəyişib.  Tehrandakı  Şərif  Texnologiya Universitetini bitirən Məryəm  2004-cü ildə Harvard Universitetində riyaziyyat üzrə doktorluq elmi  dərəcəsi  alıb.  O,  ailəsi  ilə  Kaliforniya ştatının Palo Alto şəhərində yaşayır. Anhita adlı  kiçikyaşlı bir qızı var.

Riyaziyyat üzrə dünyanın ən yüksək mükafatı olan Filds mükafatı 1936-cı ildə kanadalı riyaziyyatçı Con Filds (John Fields) tərəfindən təsis edilib və hər dörd ildən bir yaşı 40-a çatmamış ən istedadlı riyaziyyatçılara (3-4 nəfər) verilir. Məryəm Mirzəxani hesab edir ki,  elmi mükafata layiq görülməsi gənc və istedadlı qadın riyaziyyatçılar üçün gözəl stimul olacaq.  Mükafat fondu 15 min Kanada dolları təşkil edir.

 

Rusiya Federasiyası 213 əcnəbi universitetin diplomunu tanıyır

Rusiya  Federasiyası dünyanın  23  ölkəsindən  213  əcnəbi  elm və təhsil müəssisəsinin verdiyi elmi dərəcələrin  tanınması  barədə qərar  qəbul  edib. "Uçitelskaya qazeta"nın məlumatına  əsasən,  bu barədə  RF  hökumət  başçısı Dmitri  Medvedev  sərəncam  imzalayıb.  Sərəncamda  diplomları  Rusiya ərazisində  tanınan  xarici  ölkələrin  ali məktəblərinin  adları  göstərilir.   Siyahıda  Kembric, Oksford,  Boloniya,  Harvard, Yel universitetlərinin, Massaçusets Texnologiya  İnstitutu  kimi  ali məktəblərin adları çəkilir.  Siyahıya  əsasən dünyada  məşhur olan 3 beynəlxalq reytinq sıralamasında - Dünya  universitetlərinin  akademik reytinq sıralaması (Academic Ranking of World Universities), QS Dünya universitetlərinin reytinq (QS World University Rankings), "Times"  dünya universitetlərinin reytinqi (The Times Higher Education World University Rankings) ilk 300 sırada yer almış universitetlər  daxil  edilib.  Yeni siyahıda  Çin  Xalq  Respublikası,  Cənubi  Afrika  Respublikasının   ali məktəbləri yer almayıb. Bu ölkələrlə  RF arasında  təhsil sənədlərinin və  elmi  dərəcələrin qarşılıqlı tanınmasına dair müqavilə imzalanmayıb.

 

Dünyada ilk onlayn-məktəb fəaliyyətə başlayır

Amerikada  dünyada  ilk onlayn-məktəb fəaliyyətə başlayır.  Sentyabrın ilk günlərindən məktəbə  birinci növbədə 79 şagird gedəcək.  Onlayn-məktəb  dövlət  statuslu olsa da (pulsuz təhsil)  bir sıra özəl maliyyə qurumları, şirkətlər   tərəfindən dəstəklənir  və  geniş  müstəqilliyə malikdir.   Fəaliyyəti  "Connections Academy" layihəsi  ilə tənzim olunan məktəb  "Pearson"  nəşriyyat  maqnatına məxsusdur.  Məktəb uşaqların yaşadıqları evlərdən təhsil müəssisəsinə çatdırılmasını, onların müvafiq kompüterlə və digər zəruru tədris materialları ilə təmin  olunmasını həyata keçirəcək.   Məktəbin rəhbərliyi hesab edir ki, tədrisin bu cür  növü  son vaxtlara qədər xəstəliyə  və  ya  idman məşğələlərinə görə dərs buraxmış şagirdlər  üçün  də məqbul variantdır.

 

Dünya universitetlərinin Şanxay reytinq cədvəli açıqlanıb

Dünya universitetlərinin  növbəti  Şanxay reytinq  cədvəli açıqlanıb.  "Uçitelskaya qazeta"nın məlumatına əsasən,  dünyanın ən yaxşı 500 ali məktəbinin reytinq cədvəlinə  ABŞ-ın  Harvard  Universiteti  liderlik edir.  Siyahıda 10 ən yaxşı universitet sırasında   Harvarddan əlavə, Stenford, Massaçusets Texnologiya İnstitutu, Kaliforniya Berkli Universiteti, Kembric Universiteti, Prinston Universiteti, Kaliforniya  Texnologiya  Universiteti,  Kolumbiya  Universiteti, Çikaqo Universiteti, Oksford  Universiteti yer alıb. M.V.Lomonosov adına Moskva  Dövlət  Universiteti  ötən ilki  reytinqlə müqayisədə  5 mövqe  geriləyərək  84-cü yerdə  qərarlaşıb.  Lakin MDU  təbiət elmləri və  riyaziyyat  üzrə  dünyada  51-75-ci yerdədir (riyaziyyat üzrə 26-cı, fizika 76-100-cü).  Qalan digər  elm sahələri üzrə MDU  ilk 200 -lükdən kənarda qalıb.  Şanxay reytinq cədvəli digər kriteriyalardan daha çox   "yüksək sitatgətirilmə əmsalı"na malik olan universitet alimlərinin sayını əsas götürür.  "Nature" və "Science"  kimi elmi yurnallarda  dərc  olunmuş məqalələrə, eləcə də  Nobel və ya Fild  (riyaziyyatçılar üçün)  laureatlarının sayına yüksək qiymət verilir.

 Oruc MUSTAFAYEV,
"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov