Azərbaycan Respublikasının Prezidenti İlham Əliyevin
tapşırığı ilə həyata keçirilən "Ölkəmizi tanıyaq"
maarifləndirici tur-aksiyaya qoşulan Cəlilabad və
Biləsuvar məktəbliləri avqustun 27-də Şəmkir və Göygöl
rayonlarında olublar.
Şəmkirə gələn şagirdləri rayon icra hakimiyyətinin
nümayəndələri, təhsil və mədəniyyət işçiləri
qarşılayıblar. Rayonla tanışlığa orta əsr Şəmkir
qalasından başlayan məktəblilərə məlumat verilib ki,
Böyük İpək Yolu üstündə yerləşən bu qədim qala 2007-ci
ildə AMEA-nın Arxeologiya və Etnoqrafiya İnstitutu
əməkdaşlarının ərazidə apardıqları qazıntılar zamanı
aşkar edilib. Alimlərin araşdırmalarından aydın olub ki,
şəhər ərəb, Bizans, Hülakü və Atabəylərdən sonra Rusiya
qoşunlarının hücumuna məruz qalıb və dağıdılıb.
Orta əsr Şəmkir qalasının dağıntıları qarşısında xatirə
şəkli çəkdirən məktəblilər sonra Heydər Əliyev və
Gənclər mərkəzlərində, bayraq muzeyində, abidələr və
istiqlal parklarında, XVIII əsr alman kilsəsində olublar.
Şəmkirlə tanışlıqdan sonra şagirdlər Göygölə səfər
ediblər. Burada mehribanlıqla qarşılanan məktəblilər
tur-aksiyanı Heydər Əliyev parkından başlayıblar. Parkda
Heydər Əliyev, Gənclər və Uşaq Əyləncə mərkəzləri,
həmçinin qapalı və üstüaçıq idman meydançaları fəaliyyət
göstərir ki, bu da gənclərin asudə vaxtlarını səmərəli
keçirmələri üçün geniş imkanlar açır.
Məktəblilər parkın ərazisini gəzdikdən sonra alman
Viktor Klaynın mənzil-muzeyinə baxıblar.
Tur-aksiyadan razı qalan Cəlilabad şagirdlərindən ibarət
qrupun rəhbəri, rayon təhsil şöbəsinin metodisti Əminağa
İsbarov deyib ki, dövlətimizin başçısı təhsilin
inkişafına, onun maddi-texniki bazasının
möhkəmləndirilməsinə və təhsil işçilərinin sosial
vəziyyətinin yaxşılaşdırılmasına diqqət və qayğı
göstərdiyi kimi, şagirdlərin asudə vaxtlarının səmərəli
təşkilini də vacib məsələ kimi diqqətdə saxlayır .
"Ölkəmizi tanıyaq" maarifləndirici tur-aksiyası buna
bariz nümunədir. Üç gündür ki, maraqlı ekskursiyalar
keçirilir, bölgənin tarixi yerləri, maddi-mədəniyyət
abidələri, eləcə də müasir tikililəri ilə məktəblilər
tanış oldular. Biz də, şagirdlər də bu turdan böyük zövq
aldıq. Buna görə ölkəmizin rəhbərinə minnətdarıq.
Şakir CƏFƏROV,
"Azərbaycan müəllimi" |