|
 Bunlar
Balakən rayonu humanitar və texniki təmayüllü liseyin
ötən dərs ilində əldə etdiyi uğurların tam olmayan
siyahısıdır. Məhz bu uğurlarına görə liseyin adı ilboyu
bir sıra rəsmi sənədlərdə və mətbuatda yaxşı mənada
hallanıb.
Məsələn, bu ilin martında keçirilən respublika fənn
olimpiadalarının finalında Balakən rayonu humanitar və
texniki təmayüllü lisey bütövlükdə bəzi şəhər və
rayonlara nəsib olmayan yüksək nəticə göstərib: üç qalib
və iki həvəsləndirici yer. Belə ki, liseyin XI sinif
şagirdi Samirə Qasımova respublika fənn olimpiadalarında
Azərbaycan tarixi fənni üzrə I yeri tutub. XI sinif
şagirdi Rəvan Əliyev və X sinif şagirdi Tanrıqulu
Vəliyev isə həmin fənn üzrə II nəticə göstəriblər.
Liseyin daha iki yetirməsi - XI sinif şagirdi Aytac
Əfəndiyeva və IX sinif şagirdi Rəsul Nəbiyev müvafiq
olaraq riyaziyyat və fizika fənlərindən həvəsləndirici
4-cü yeri tutublar. Nəticədə haqlı olaraq liseyin adı
Təhsil Nazirliyinin 16 may 2014-cü il tarixli
"2013-2014-cü dərs ilində keçirilmiş məktəblilərin fənn
olimpiadalarının nəticələri barədə" əmrində bu kütləvi
bilik yarışının yekun turunda müsbət nəticələri qeyd
olunan şəhər, rayon və məktəblərin sırasında çəkilib.
Təhsil Nazirliyinin "Ümumtəhsil məktəblərinin
məzunlarının qızıl və gümüş medalla təltifi haqqında" 11
avqust 2014-cü il tarixli əmrində də Balakənin adı beş
dəfə yer alıb. Çünki rayon üzrə 5 nəfər təhsildə xüsusi
nailiyyətlərinə görə qızıl medalla təltif olunub.
Onlardan üçü humanitar və texniki təmayüllü liseyin
məzunudur. Bunlar Samirə Qasımova, Könül Rüstəmova və
Aytac Əfəndiyevadır. Fikrimizcə, bir bölgə məktəbi üçün
bu çox yüksək göstəricidir. Bu baxımdan lisey ölkənin ən
yaxşı ümumtəhsil müəssisələri ilə bir sırada durur.
Və nəhayət, 2013-2014-cü dərs ilində liseyi bitirmiş
məzunlardan 6 nəfəri TQDK-nın ali və orta ixtisas
təhsili müəssisələrinə keçirdiyi qəbul imtahanlarında
600-dən çox bal toplayıb. Qızıl medalçı Samirə Qasımova
654 balla Qafqaz Universitetinə dünya iqtisadiyyatı
ixtisası üzrə, Sevda Mustafayeva 639 balla Dövlət Gömrük
Komitəsinin Akademiyasına hüquq ixtisası üzrə, Aygül
Hacıyeva 634 balla Azərbaycan Tibb Universitetinə, qızıl
medalçı Könül Rüstəmova 624 balla Azərbaycan Dillər
Universitetinə, Kərimət Şəkiliyeva 610 balla BDU-ya,
Tamara Nəbiyeva isə 604 balla ADU-ya qəbul olunub.
Ümumiyyətlə isə, builki qəbul kampaniyası lisey üçün
bütövlükdə uğurlu olub. Liseyin 58 məzunundan 56-sı
qəbul imtahanlarında iştirak edib və 44-ü tələbə adını
qazanıb. Məzunlardan biri Türkiyənin nüfuzlu ali
məktəblərindən birinə, 22 nəfəri isə ölkəmizin ali
məktəblərinə dövlət sifarişli ixtisaslara qəbul olub. 8
məzun 500-600 bal arasında nəticə göstərib.
Sadalananlar heç də liseyin ötən dərs ilində əldə etdiyi
uğurların hamısı deyil. Bu qabaqcıl təhsil ocağının
şagirdləri ilboyu istər rayon, istərsə də respublika
miqyaslı bilik yarışlarında, intellektual oyunlarda fəal
iştirak edib. Məsələn, liseyin "Xəmsə" komandası eyni
adlı televiziya intellektual yarışmasında zona turunda
qalib olub və 2013-cü ilin dekabrında Naxçıvan şəhərində
uğurla çıxış edib.
Təhsil Nazirliyinin müvafiq əmri ilə keçirilən "Nə?
Harada? Nə zaman?" intellektual yarışmasında iştirak
edən rayonun məktəbli gənclərdən ibarət komandasının
üzvlərinin əksəriyyətini də məhz humanitar və texniki
təmayüllü liseyin şagirdləri təşkil edir. Xatırladaq ki,
komanda bu intellektual oyunun zona yarışlarında I yeri
qazanaraq Quba rayonunda keçirilən respublika turunda II
yeri tutub.
Bütün bunlar, eləcə də bu kiçik yazıda qeyd edə
bilmədiyimiz digər uğurlar, ilk növbədə, liseydə çalışan
yüksək peşəkarlığa malik pedaqoji kollektivin, bu
kollektivi səriştə ilə qarşıya qoyulmuş hədəflərə
istiqamətləndirən liseyin direktoru Şaban Abdullayevin
gərgin zəhmətlərinin nəticəsidir.
Möhtərəm Prezidentimizin müvafiq sərəncamı ilə keçirilən
"Ən yaxşı ümumtəhsil məktəbi" müsabiqəsinin ilk
qaliblərindən (2007-2008-ci dərs ili) olan liseyin
müəllimlərindən Rasim Orucov "Əməkdar müəllim" fəxri
adına layiq görülüb, direktor Şaban Abdullayev və
biologiya müəllimi Nəcibə Dibirova isə səmərəli
fəaliyyətlərinə görə "Tərəqqi" medalı ilə təltif
olunublar.
Sentyabrda fəaliyyətə başlamasının 20 illiyini qeyd
edəcək liseydə hazırda yeni dərs ilinə geniş hazırlıq
işləri görülür. Qazanılan uğurların səbəbləri təhlil
olunur, onların daha da artırılması üçün yollar aranır.
Ölkəmizdə həyata keçirilən təhsil islahatlarında,
"Azərbaycan Respublikasında təhsilin inkişafı üzrə
Dövlət Strategiyası"nda qarşıya qoyulmuş strateji
hədəflərin əldə olunmasında yaxından və fəal iştirak
edən humanitar və texniki təmayüllü liseyin kollektivi
yeni dərs ilində daha səmərəli çalışmaq, uğurlarını
artırmaq əzmindədir.
Yusif ƏLİYEV,
"Azərbaycan müəllimi" |
