|
"Biz çalışmalıyıq ki, gənclərimiz Azərbaycan xalqına xas
olan mənəvi, milli ənənələr əsasında tərbiyə
edilsinlər".
Heydər ƏLİYEV,
ümummilli lider
Azərbaycan Respublikasının Prezidenti İlham Əliyevin
təşəbbüsü və göstərişi ilə son vaxtlar
məktəbli-gənclərin hərtərəfli inkişafına və
dünyagörüşünün zənginləşməsinə stimul yaradan müxtəlif
layihələr həyata keçirilir. Belə layihələrdən biri də
Azərbaycan Respublikasının Prezidenti yanında Bilik
Fondunun sentyabrın əvvəllərindən start götürən "İlboyu
bilik" layihəsi çərçivəsinlə həyata keçirilən
"Qardaşlaşmış məktəblər" proqramıdır. İlk mərhələdə 15
sentyabr - "Bilik günü"nədək 20 rayonun hərəsindən bir
məktəb layihəyə cəlb olunsa da bu hərəkatın gələcəkdə
respublikanın bütün bölgələrini əhatə etməsi nəzərdə
tutulub.
Layihənin əsas məqsədi müstəqil Azərbaycanın tərəqqisi,
cəmiyyətimizin maariflənməsi işində yardımçı olmaq,
yeniyetmə və gənclərin elmi-texniki, sosial-iqtisadi,
ekoloji, humanitar biliklərə yiyələnməsinə dəstək
vermək, dövlətçilik, vətənpərvərlik ideyalarının və
ümummilli lider Heydər Əliyevin banisi olduğu
azərbaycançılıq məfkurəsinin daha dərindən öyrənilməsi
və yayılmasına, məktəblilərin ölkəmizin bütün
guşələrində geniş vüsət alan quruculuq, abadlıq işləri
ilə daha yaxından tanış olmasına, bölgələrimizin tarixi,
mədəniyyəti, məişəti və etnoqrafiyasına dair biliklərə
yiyələnməsinə yardımçı olmaqdır.
Layihəyə qoşulan məktəbli sövqi-təbii olaraq yaşıdları
ilə yaxınlaşıb-doğmalaşacaq, özünün heç də tək
olmadığını, bu məmləkətin bir vətəndaşı kimi üzərinə
məsuliyyətli bir vəzifə düşdüyütü dərk edəcək və onu
ləyaqətlə yerinə yetirməyə çalışacaq.
"Qardaşlaşmış məktəblər" proqramının iştirakçısı kimi
Bakı şəhəri, Səbail rayonu, O.Mirzəyev adına 190 nömrəli
tam orta məktəb Şəki şəhəri 7 nömrəli tam orta məktəblə
dostluq yaradır. Bu görüşə xüsusi hazırlaşan
şagirdlərimizin vətənimiz haqqında hazırladıqları slayd
və müxtəlif təqdimatların bir ünvanı, bir məkanı var:
Azərbaycan.
Proqram çərçivəsində ilboyu təşkil olunacaq
ekskursiyalar, "dəyirmi masa"lar, disputlar,
intellektual yarışmalar Azərbaycan tarixini və
mədəniyyətini daha yaxından öyrənməyə şərait yaradacaq.
Nəticədə məktəblərin birgə tədbirlər keçirməklə
yaxınlaşması, qardaşlaşması təmin olunacaq, gənclərə
kommunikativ, təşkilati bacarıq, vərdişlər aşılanacaq.
Öz əhatə dairəsini genişləndirib ən ucqar kəndlərdə
yaşayan məktəblinin də bu layihədə iştirakını təmin
etmək əsas məqsəddir: heç kəs kənarda qalmayacaq, hər
kəs azərbaycanlı kimi doğulub böyüdüyü, tərbiyə aldığı
üçün fəxr edəcək.
Q.ƏMİRCANOVA,
Bakıdakı 190 nömrəli tam orta məktəbin direktor əvəzi,
əməkdar müəllim |
