|
Azərbaycan Müəllimlər İnstitutunda (AMİ) "Davranış
pozuqluğu olan uşaqların inkişaf problemləri" mövzusunda
xarici mütəxəssislər tərəfindən təlim keçirilib. Uşaq
İnkişafı üzrə ictimai araşdırmalar mütəxəssisi, Los
Anceles, Kaliforniya ştatında Uşaq, Ailə və Sağlam
Ünsiyyət Mərkəzinin əməkdaşı Şarlen Coakim və norveçli
mütəxəssis, ailə və uşaq həkimi-məsləhətçi Stevn
Stonehaus tərəfindən keçirilmiş təlimdən əvvəl xarici və
yerli qonaqlar institutun nəzdində fəaliyyət göstərən
Heydər Əliyev Mərkəzini ziyarət ediblər.
AMİ-nin rektoru, professor Aqiyə Naxçıvanlı xarici
mütəxəssisləri qəbul edərək qonaqlara institut haqqında
məlumat verib, ölkəmizdə inklüziv təhsilin inkişafına
dövlət qayğısından danışıb. Rektor vurğulayıb ki,
Azərbaycan xalqının ümummilli lideri Heydər Əliyevin
hakimiyyətdə olduğu bütün dövrlərdə ölkədə təhsil, eləcə
də sağlamlıq imkanları məhdud olan şəxslərin təhsili
xüsusi əhəmiyyətə malik məsələlərdən biri olub. İnklüziv
təhsil hazırda Azərbaycan Respublikasının Prezidenti
cənab İlham Əliyevin də diqqət mərkəzindədir. Xarici
mütəxəssislərə institutda fəaliyyət göstərən İnklüziv
Təhsil Mərkəzində bu istiqamətdə görülən işlər,
keçirilən konfranslar, hazırlanan metodik vəsaitlər,
regionlarda aparılan təlimlər barədə ətraflı məlumat
verilib.
Qonaqlar da öz ölkələrinin bu sahəyə dair təcrübəsindən,
tədqiq etdikləri sahənin əhəmiyyətindən danışıblar.
Sonra Şarlen Coakim tərəfindən dörd saat davam edən
təlim keçirilib. Təlimdə institutun əməkdaşları və dəvət
olunmuş mütəxəssislər, o cümlədən SHAİB-in sədri,
professor Mayis Əliyev və təşkilatın layihə koordinatoru
Ülvi Əliyev, "Loqos" Uşaq İnkişaf Mərkəzinin rəhbəri
Təranə Məmmədova, mərkəzin mütəxəssisi Gülnarə
Məmmədova, "Ailə psixoloqu" psixoloji xidmət və təlim
mərkəzinin psixoloqu Südabə İsgəndərova və digər
qonaqlar da iştirak ediblər.
Təlimdə xüsusi qayğıya ehtiyacı olan uşaqların problemli
davranışlarından bəhs olunub, bu davranışları yaradan
səbəblər araşdırılıb, valideynlərin onlarla necə
davranmalı, necə danışmalı, problemləri necə korreksiya
etməli olduqları barədə fikir mübadiləsi aparılıb,
iştirakçılara problemli davranışlar barədə film nümayiş
etdirilib. Aparılan müzakirələr bu qənaətə gəlməyə imkan
verib ki, uşağın ən yaxın tərbiyəçisi, müəllimi valideyn
olmalıdır. Deməli, bu problemlər barədə birinci növbədə
valideynlərlə maarifləndirmə işi aparılmalıdır.
Tədbir zamanı xarici mütəxəssislər iştirakçıları
maraqlandıran sualları cavablandırıblar. Daha sonra
xarici qonaqlar institutda yaradılmış İnklüziv Təhsil
Mərkəzində görülmüş işlərlə yaxından tanış olublar.
Mətbuat və informasiya xidməti |
