Javascript DHTML Drop Down Menu Powered by dhtml-menu-builder.com

ARXİV

10 Oktyabr 2014 - №39

 

Cənubi Koreya ilə təhsil sahəsində əməkdaşlıq genişlənir

 

Böyütmək üçün şəkili seçinNaxçıvan Dövlət Universitetində son iyirmi ildə tədrisdə ən müasir texnologiyaların tətbiqi, distant təhsilə keçid, elektron universitet qurulması istiqamətində mühüm işlər görülmüşdür. Koreya Beynəlxalq Əməkdaşlıq Agentliyi (KOICA) ilə birgə həyata keçirilən "Naxçıvan Dövlət Universitetində elektron təhsil şəbəkəsi və rəqəmsal multimedia infrastrukturunun yaradılması" layihəsi də Azərbaycan ali məktəbləri içərisində ən irihəcmli layihə olmaqla bu sahədə atılan mühüm addımdır. 2012-ci ildə tərəflər arasında layihə ilə bağlı müqavilə imzalandıqdan sonra KOICA-nın Azərbaycandakı rezident nümayəndəsi xanım Kim Eun-sukun başçılığı ilə koreyalı mütəxəssislərdən ibarət qrup müxtəlif vaxtlarda Naxçıvan Dövlət Universitetinə ezam olunmuşdur. Universitetin rektoru, AMEA-nın müxbir üzvü Saleh Məhərrəmovun iştirakı ilə sistemin təqdimatı keçirilmiş, müzakirələr aparılmış, yerli mütəxəssislər məlumatlandırılmışdır. 2013-2015-ci illəri əhatə edəcək layihənin həyata keçirilməsinə KOICA tərəfindən  3500000 ABŞ dolları  həcmində vəsait ayrılmışdır. Layihə çərçivəsində universitet rəhbərliyi və işçiləri üçün iki dəfə təqaüd proqramı təşkil edilmişdir. Bu günlərdə NDU-nun rektoru, AMEA-nın müxbir üzvü Saleh Məhərrəmovun rəhbərliyi ilə nümayəndə heyəti Cənubi Koreyada olmuşdur.

Universitetin elmi işlər üzrə prorektoru, fizika üzrə fəlsəfə doktoru, dosent Mübariz Nuriyev, beynəlxalq əlaqələr üzrə prorektoru, riyaziyyat üzrə fəlsəfə doktoru Anar Kazımov, Həmkarlar İttifaqı Komitəsinin sədri, riyaziyyat üzrə fəlsəfə doktoru, dosent Elşən Məmmədov, Tədris şöbəsinin müdiri, tarix üzrə fəlsəfə doktoru, dosent Rafiq Rəhimovun iştirak etdiyi səfərdə məqsəd NDU-nun Təhsil İnformasiya Sisteminin idarəsi ilə bağlı bilikləri  möhkəmləndirmək, Koreyanın qabaqcıl universitetlərinin Təhsil İnformasiya Sistemi ilə tanış olmaq və ölkələrarası əməkdaşlığa töhfə verməkdən ibarətdir.

Birhəftəlik səfər çərçivəsində KOICA-nın baş ofisində qəbul zamanı Cənubi Koreya və KOICA ilə bağlı təqdimat keçirilmişdir. Görüş zamanı rektor, AMEA-nın müxbir üzvü Saleh Məhərrəmov Azərbaycanda elmin, təhsilin inkişafına göstərilən dövlət qayğısından danışmışdır. Qeyd olunmuşdur ki, Azərbaycanda milli təhsilin inkişafı, müasir texnologiyaların tədrisdə və təhsildə tətbiqi əsas strateji sahə hesab olunur, dövlətimiz tərəfindən daim diqqət mərkəzində saxlanılır. Rektor xatırlatmışdır ki, adıçəkilən layihə universitetdə uğurla yekunlaşmaq üzrədir. Hazırda Naxçıvana ezam olunan koreyalı mütəxəssislər portal, distant təhsil, akademik işlər üzrə sistemin və avadanlıqların quraşdırılması, əməliyyatlarla bağlı biliklərin öyrədilməsi, elektron təlim sistemi üçün kontentlərin hazırlanması ilə məşğuldurlar.

Təhsil İnformasiya Sisteminin inkişafı mövzusunda keçirilən treninq zamanı bu sahənin inkişafının baslıca istiqamətləri müzakirə olunmuş, bilik və təcrübə mübadiləsi aparılmışdır. NDU-nun beynəlxalq əlaqələr üzrə prorektoru, riyaziyyat üzrə fəlsəfə doktoru Anar Kazımovun universitetdə müasir informasiya-kommunikasiya texnologiyalarının tətbiqi, bu sahəyə göstərilən dövlət qayğısı və dəstəyi ilə bağlı prezentasiyası olmuşdur. Prezentasiyada universitetin İnformasiya-Kommunikasiya Texnologiyaları Mərkəzinin, elektron kitabxana və  müxtəlif internet mərkəzlərinin fəaliyyətləri, virtual əməkdaşlığın inkişafı məqsədilə onlayn bağlantılar, beynəlxalq videokonfrans və simpoziumların təşkili istiqamətində görülən işlər işıqlandırılmışdır.

Layihənin icraçı şirkəti "Donqvon CNS"-nin rəhbəri Mun-seo Park heyəti qəbul edərək layihənin Naxçıvan Dövlət Universitetində elektron təhsil şəbəkəsinin qurulması, onlayn təhsilin təşkili baxımından faydalı olacağına əminliyini bildirmiş, gələcək əməkdaşlıq məsələləri müzakirə olunmuşdur.

Nümayəndə heyəti Cənubi Koreyanın ali təhsil müəssisələrini ziyarət etmiş, buradakı ali təhsil sistemi, tədris prosesi ilə yaxından tanış olmuşlar. Səfər Kimçonq Universiteti ilə əməkdaşlığın möhkəmlənməsi baxımından da faydalı olmuşdur. Xatırladaq ki, Kimçonq Universiteti ilə əlaqələr  2010-cu ildə yaradılmış, 2011-ci ildə qarşılıqlı əməkdaşlıq haqqında müqavilə imzalanmışdır. Bu gün hər iki universitet arasında elmi təcrübə və tələbə mübadiləsi, səfərlər qarşılıqlı əlaqələr sahəsində aparılan səmərəli işin uğurlu davamıdır.  Rəsmi görüş zamanı rektor, xanım Sunq Ae Kanq Kimçonq Universiteti haqqında ətraflı məlumat vermişdir. Qeyd olunmuşdur ki, Naxçıvan Dövlət Universitetindən tərcümə (ingilis dili-Azərbaycan dili), hüquqşünaslıq, stomatologiya ixtisasları üzrə 3 nəfər birinci kurs tələbəsi 2012-2013-cü tədris ilinin ikinci semestrində tələbə mobilliyinə əsasən ali təhsillərini Koreyanın Kimçonq Universitetində davam etdirmişdir.

NDU-nun rektoru Saleh Məhərrəmov ölkələrarası əlaqələrin inkişafında elm, təhsil sahəsində tərəfdaşlığın rolundan danışmış, Naxçıvan Dövlət Universitetinin beynəlxalq əməkdaşlığında dost, tərəfdaş olan Kimçonq Universiteti ilə əməkdaşlığın bundan sonra da davamlı olmasını arzulamışdır.

Naxçıvanlı qonaqlar universitetdə müasir texnologiyalarla təchiz olunmuş,  xüsusi səliqə-sahmana malik  auditoriyalarda olmuş, koreyalı tələbələrlə görüşmüşlər.

Koreya Kiber Universitetində rektor, professor Choong Soon Kim heyəti qəbul edərkən dünyada ilk kiber universitet  olan bu ali təhsil ocağının Koreya Chungang Təhsil Vəqfi (KCEF) altında Koreya Universiteti ilə birlikdə fəaliyyət göstərdiyini, Koreya ali məktəbləri sırasında birinci onluğa daxil olduğunu bildirmişdir. Saleh Məhərrəmov Azərbaycanda, o cümlədən Naxçıvan Muxtar Respublikasında elektron hökumət və elektron universitet quruculuğu, elm və təhsilin müasir informasiya-kommunikasiya texnologiyalarının tətbiqi vasitəsilə inkişaf etdirilməsi istiqamətində görülən işlər barədə məlumat vermişdir. Görüşdə universitetlərarası əməkdaşlığın inkişafı ilə bağlı təkliflər səsləndirilmişdir.

Cənubi Koreyanın POSCO poladtökmə şirkəti ilə tanışlıq, buradakı ağır səneyinin müasir texnologiyalar hesabına inkişaf etdirilməsi xüsusi maraq doğurmuşdur. Səfər zamanı qonaqlar paytaxt Seul şəhəri ilə yanaşı Kimçonq, Qyunju, Bulquska şəhərlərində, Qyungbok sarayında olmuş, Koreya Milli Muzeyinə və digər tarixi yerlərə ekskursiya etmiş, ölkənin tarixi, şəhərsalma mədəniyyəti, sosial şəraiti ilə tanış olmuşlar.

Yekun tədbirdə KOICA şirkətinin  sertifikatları təqdim olunmuş, layihənin uğurla gerçəkləşməsi, əməkdaşlığımızın davamlı olması ilə bağlı fikirlər səsləndirilmişdir.  

Mehriban SULTAN,
NDU-nun Mətbuat şöbəsinin müdiri

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov