|
 Oktyabrın
10-11-də Təhsil Nazirliyinin təşkilatçılığı ilə ilk dəfə
olaraq Bakıdakı "Jumeriah" otelində 1-ci SABAH Forumu
keçirilib. 2 gün davam edən forumda ölkənin müxtəlif ali
təhsil müəssisələrinin SABAH qruplarında təhsil alan 250
nəfərə yaxın tələbə iştirak edib. Qeyd edək ki, SABAH
qrupları 33 ixtisas üzrə elmi-pedaqoji potensialı,
tədris laboratoriya və maddi-texniki bazası yüksək olan
7 ali məktəbdə yaradılıb. 688 tələbənin təhsil aldığı bu
qruplarda 158 müəllim dərs deyir. SABAH qruplarında
tədris fərqli proqram əsasında keçirilir və tələbələrə
xüsusi təqaüd verilir, eyni zamanda aztəminatlı
ailələrdən olanlar yataqxana ilə təmin olunur.
Forumun keçirilməsində əsas məqsəd ölkə təhsilinin
strateji hədəfləri barədə ətraflı məlumatların
verilməsi, müasir dövrün tələblərinə uyğun yüksək biliyə
malik cəmiyyətin qurulmasında tələbələrin rolunun
müəyyənləşdirilməsi, tələbələr arasında dialoqun
yaradılmasından ibarət idi. Əyləncəli proqramların da
daxil olduğu forumun ilk günündə tələbələr üçün şam
yeməyi, diskoteka təşkil olunub.
Forumun açılışında çıxış edən təhsil naziri Mikayıl
Cabbarov bildirib ki, qloballaşan dünyanın yeni
çağırışları və ölkədə yüksək biliyə malik cəmiyyətin
qurulması zərurəti Azərbaycan gəncliyi qarşısında
tamamilə yeni tələblər qoyur. Bu baxımdan ölkə
təhsilinin strateji hədəflərindən biri də "Azərbaycan
Respublikasında təhsilin inkişafı üzrə Dövlət
Strategiyası"na uyğun olaraq, gənclərin potensialının
inkişaf etdirilməsidir. SABAH qrupları layihəsi də bu
istiqamətdə həyata keçirilən tədbirlərdən biridir.
Dövlət başçısının qeyd etdiyi kimi, Azərbaycan
vətəndaşları müasir dövrdə yüksək keyfiyyətli təhsili
xarici ölkələrlə yanaşı öz ali təhsil müəssisələrimizdə
də ala bilər. Bu gün müasir təhsili qloballaşan dünyaya
uyğun çeviklik, peşəkarlıq, yeni texnologiyalar olmadan,
xarici dillərin öyrənilməsindən kənar təsəvvür etmək çox
çətindir. Bu proseslərin hər biri yeni yaradılan SABAH
qruplarında özünü əks etdirir.
Oktyabrın 11-də - forumun ikinci iş günündə tələbələr
üçün "ustad dərsləri" keçirilib. Tanınmış ictimaiyyət
nümayəndələri "Karyera inkişafı", "Liderliyə
layiqsənmi?", "Sən də bir brendsən" və "Vaxtına sahib
çıx" mövzularında məruzələrlə çıxış ediblər. Bundan
sonra təhsil naziri Mikayıl Cabbarovun, Dövlət Neft
Fondunun icraçı direktoru Şahmar Mövsümovun, Qiymətli
Kağızlar üzrə Dövlət Komitəsinin sədri Rüfət Aslanovun,
UNİ bankın idarə heyəti sədrinin birinci müavini Xalid
Əhədovun, BDU-nun dekan müavini Gündüz Kərimovun,
tanınmış şoumen Murad Dadaşovun iştirakı ilə müzakirələr
başlayıb. Tələbələri daha çox maraqlandıran məsələlər
səsvermə yolu ilə müəyyənləşdirilib və müzakirələr
konkret istiqamətdə aparılıb. Bu istiqamətlər liderlik
keyfiyyəti, qərar qəbuletmə, karyera inkişafı,
məsuliyyətin bölüşdürülməsi və bilik, bacarıq və
qabiliyyət formulunda təhsil konsepti mövzularını əhatə
edib.
Daha sonra tədbir idman və əyləncə xarakterli yarışlarla
davam etdirilib. Forumun bağlanış mərasimində fərqlənən
tələbələrə müxtəlif nominasiyalar üzrə sertifikatlar
təqdim olunub, eləcə də tədbirdən bəhs edən film nümayiş
etdirilib.
Niyazi RƏHİMOV,
"Azərbaycan müəllimi" |
