|
 Təhsil
Problemləri İnstitutunda biologiya, tarix, həyat
bilgisi, Azərbaycan dili və ədəbiyyat, texnologiya
fənni üzrə 8, 9, 10, 14, 15 oktyabr tarixlərində işçi
qrupların görüşü keçirilmişdir. İnstitutun direktoru,
hüquq üzrə fəlsəfə doktoru Qulu Novruzov, institutun
şöbə müdirləri və bir qrup institut əməkdaşının iştirak
etdiyi görüşdə Azərbaycan təhsil sistemində mövcud fənn
kurikulumları, adıçəkilən fənlərin ali və orta ixtisas
məktəblərində tədrisinin mövcud vəziyyəti, yüksək
keyfiyyətli tədrisin həyata keçirilməsində biologiya,
tarix, həyat bilgisi, Azərbaycan dili və ədəbiyyat,
texnologiya və digər fənn kurikulumlarının məzmunu və
müasir tələblərə uyğun məzmunda ediləcək
təkmilləşdirmələrin, həmin fənni tədris edən
müəllimlərin peşəkarlıq səviyyələrinin artırılması və s.
məsələlər ətrafında geniş məlumat verdi.
Natiq görüşdə iştirak edən işçi qrupların qarşısında
duran vəzifələrdən söhbət açdı. Lazımi resursların məhz
tədrislə məşğul olan azərbaycanlı müəllimlər tərəfindən
hazırlanmasını vurğuladı. Xarici mənbələrdən yox, daha
çox öz müəllimlərimizin çalışdığı məktəbinin tələbinə
uyğun dərs resurslarının hazırlanmasına diqqət
vermələrini bildirdi.
Qulu Novruzov "Azərbaycan Respublikasında təhsilin
inkişafı üzrə Dövlət Strategiyası"ndan irəli gələn
məsələlərdən danışdı, həmçinin 12 illik təhsilə keçid və
onunla bağlı olaraq bütün fənlərdə yeniliklərin
olacağını vurğuladı. Bildirildi ki, gələcəkdə 12 illik
təhsil sisteminə keçidin olmasını nəzərə alsaq
kurikulumun məzmununda müəyyən dəyişikliklərin edilməsi
qaçılmazdır. Bu işdə də müəllimlərin, xüsusilə də həmin
fənni tədris edən, ixtisasını mükəmməl bilən
müəllimlərin üzərinə böyük iş və məsuliyyət düşür.
Təhsilin məzmununun Azərbaycan müəlliminin inkişafındakı
rolundan danışan Qulu Novruzov müasir dərslərin
keçilməsi zamanı görünən boşluqları məhz müəllimlərin
dolduracağını bildirdi. Bu sahədə intellektual təhsil
üçün məhz yeni məzmunu hiss edən qabaqcıl müəllimlərin
böyük rolunun olduğunu bir daha vurğulandı.
Görüşdə iştirak edən biologiya, tarix, həyat bilgisi,
Azərbaycan dili və ədəbiyyat, texnologiya fənni üzrə
işçi qruplarının üzvləri, fənn mütəxəssisləri, DYP
nümayəndəsi, ali və orta ixtisas müəllimləri, dərslik
həmmüəllifləri və bu sahənin alimləri mövzu ətrafında
çıxışlar etdilər və təkliflərini söylədilər. |
