|
 Ötən
həftə Azərbaycan Milli Kitabxanasında Azərbaycan
Respublikasının Mədəniyyət və Turizm Nazirliyi
tərəfindən nəşr olunmuş "Naxçıvan-90" kitab-albomun
təqdimat mərasimi keçirilib. Tədbirdə hökumət
nümayəndələri, Milli Məclisin deputatları, tanınmış elm
xadimləri iştirak ediblər.
Qeyd edək ki, "Naxçıvan-90" kitab-albomu Azərbaycan
Respublikasının Prezidenti cənab İlham Əliyevin
"Naxçıvan Muxtar Respublikasının 90 illik yubileyinin
keçirilməsi haqqında" 2014-cü il 14 yanvar tarixli
Sərəncamının icrası ilə bağlı Azərbaycan Respublikasının
Mədəniyyət və Turizm, Xarici İşlər, Təhsil nazirlikləri,
Azərbaycan Respublikasının Diasporla İş üzrə Dövlət
Komitəsi və Azərbaycan Milli Elmlər Akademiyasının birgə
hazırladıqları tədbirlər planına əsasən nəşr olunub.
Mərasimi Milli Kitabxananın direktoru Kərim Tahirov
açaraq tədbir iştirakçılarını salamlayıb. Sonra söz
mədəniyyət və turizm nazirinin birinci müavini Vaqif
Əliyevə verilib. Naxçıvanın tarixi haqqında geniş
danışan nazir müavini muxtar respublikanın bugünkü
inkişaf səviyyəsinə çatmasının ulu öndər Heydər Əliyevin
adı ilə sıx bağlı olduğunu bildirib.
Naxçıvan Muxtar Respublikasının Bakıdakı daimi
nümayəndəliyinin rəhbəri Bəxtiyar Əsgərov Azərbaycan
Respublikasının Prezidenti cənab İlham Əliyevin müvafiq
Sərəncamına əsasən qeyd olunan Naxçıvan Muxtar
Respublikasının 90 illik yubileyi ilə bağlı silsilə
tədbirlərin bu qədim diyarın tarixinin öyrənilməsində,
müasir inkişafının təbliği baxımından mühüm rol
oynadığını deyib.
Təhsil nazirinin müavini Firudin Qurbanov bugunkü
tədbirin əhəmiyyətini xüsusi vurğulayaraq Naxçıvan
Muxtar Respublikasında təhsilin inkişafından, bu tarixi
diyarın ölkəmizə bəxş etdiyi görkəmli şəxsiyyətlərdən
söz açıb. Ümummilli lider Heydər Əliyevin hakimiyyətə
yenidən qayıdışı ilə ölkəmizdə, eyni zamanda Naxçıvanda
həyata keçirilən irimiqyaslı layihələrdən bəhs edən
nazir müavini Firudin Qurbanov bu gün ulu öndərin siyasi
kursunun layiqli davamçısı, ölkə başçısı cənab İlham
Əliyevin Azərbaycanın ayrılmaz tərkib hissəsi Naxçıvan
Muxtar Respublikasına olan diqqət və qayğısından
danışıb. Təqdimatı keçirilən "Naxçıvan-90" kitab-albomda
Naxçıvan Muxtar Respublikasının tarixinin və mədəniyyət
abidələrinin, turizm potensialının, bu qədim diyarın
müasir inkişafının, füsunkar təbiətinin dolğun əksini
tapmasının təqdirəlayiq olduğunu söyləyib.
Digər çıxış edənlər - AMEA-nın vitse-prezidenti,
akademik İsa Həbibbəyli, Milli Məclisin deputatları
Eldar İbrahimov, Elmira Axundova Naxçıvan Muxtar
Respublikasının milli dövlətçilik tariximizin, elmi,
ədəbi-mədəni irsimizin formalaşmasında, zənginləşməsində
mühüm rol oynamasından, aparılan irimiqyaslı quruculuq,
abadlıq işlərindən söz açıblar.
Tədbirin sonunda iştirakçılar "Naxçıvan-90" adlı geniş
kitab sərgisi ilə tanış olublar.
Samirə KƏRİMOVA,
"Azərbaycan müəllimi" |
