Akademik Milli Dram Teatrı Təhsil Nazirliyi ilə birgə
"Məktəb və teatr" adlı yeni layihə həyata keçirir.
Sözügedən layihə ətrafında müzakirələr aparmaq,
əməkdaşlıq əlaqələrinin perspektivlərini
müəyyənləşdirmək məqsədi ilə oktyabrın 25-də Bakı
məktəblərini təmsil edən valideyn komitələrinin
nümayəndələri və təhsil müəssisələrində çalışan
məktəbdənkənar iş üzrə mütəxəssislərin iştirakı ilə
Akademik Milli Dram Teatrında toplantı keçirilib.
Toplantıda çıxış edən Akademik Milli Dram Teatrının
direktoru, sənətşünaslıq doktoru, professor İsrafil
İsrafilov müstəqillik illərində gənc nəslin mənəvi
tərbiyəsində təhsilin əhəmiyyətindən danışıb. Dövlət
quruculuğu işində təhsil və mədəniyyət işçilərinin
üzərinə düşən məsuliyyəti xüsusi qeyd edən İ.İsrafilov
"Məktəb və teatr" layihəsinin yeniyetmə və gənclər
arasında milli mədəniyyətimizin və incəsənətimizin
təbliğində, məktəblilərdə teatr sənətinə marağın
artırılmasında mühüm əhəmiyyət kəsb edəcəyini
vurğulayıb.
Layihənin mahiyyəti, məqsəd və vəzifələri haqqında
məlumat verən İ.İsrafilov hər məktəbdə açılacaq
məktəblinin teatr guşəsində Akademik Milli Dram
Teatrının aylıq repertuarı ilə yanaşı, ölkənin teatr
həyatında baş verən önəmli yeniliklər, görkəmli teatr
xadimləri - dramaturqlar, rejissorlar, aktyorlar
haqqında mütəmadi şəkildə məlumatlar yerləşdiriləcəyini
bildirib.
Layihədə məktəblərdə fəaliyyət göstərən dram, bədii
qiraət, rəqs, pantomim dərnəklərinin işində iştirak edən
şagirdlərə teatrda çalışan mütəxəssislər tərəfindən
peşəkar yardımın göstərilməsi də nəzərdə tutulur.
Layihəyə əsasən yaradıcı heyətin məktəblilərlə görüşünün
təşkili, göstərilən tamaşaların müzakirəsi də nəzərdə
tutulur. Əldə olunan razılığa əsasən, tamaşaya baxdıqdan
sonra şagirdlərlə birlikdə tamaşanın müzakirəsi
aparılacaq. Bu zaman şagirdlər öz təəssüratlarını
yaradıcı heyətlə bölüşmək, onları maraqlandıran sənət
məsələlərini müzakirə etmək imkanı qazanacaqlar.
İ.İsrafilov çıxışının sonunda bu layihəni dəstəklədiyi
üçün təhsil naziri cənab Mikayıl Cabbarova təşəkkürünü
bildirib, Akademik Milli Dram Teatrınin təhsil işçiləri
ilə hər cür əməkdaşlığa hazır olduğunu, milli mədəniyyət
və incəsənətimizin, təhsilimizin inkişafına yönəlmiş hər
bir konstruktiv təklifin teatr rəhbərliyi tərəfindən
müsbət qarşılanacağını söyləyib.
Elçin CƏFƏROV,
Akademik Milli Dram Teatrının mətbuat katibi |