Oktyabrı 31-də Azərbaycan Respublikası Təhsil
Problemləri İnstitutu ilə Qazaxıstan Respublikası
Təhsil və Elm Nazirliyinin "Bobek" Milli elmi-praktiki
təhsil və sağlamlıq mərkəzi" arasında birgə əməkdaşlıq
haqqında Memorandum imzalanmışdır.
Anlaşma Memorandumunda hər iki müəssisənin fəaliyyətdə
olan Nizamnaməsinə uyğun olaraq, Azərbaycan Respublikası
ilə Qazaxıstan Respublikası arasında təhsil və elm
sahəsində mövcud əməkdaşlıq çərçivəsində alimlər,
müəllimlər, şagirdlər və tələbələr arasında əməkdaşlığı
gücləndirmək, mənəvi və əxlaqi təhsil sahəsində sosial
proqramlar və müasir təhsilin problemlərinə həsr
olunmuş layihələr həyata keçirmək nəzərdə tutulub.
Təhsil Problemləri İnstitutu ilə birgə əməkdaşlıq
haqqında Memorandumda uşaq və gənclərin şəxsiyyətyönümlü
və intellektual inkişafına xidmət edən, təhsildə
mənəvi-əxlaqi dəyərlərə əsaslanan vahid səmərəli
sistemin yaradılması məqsədilə birgə tədqiqatların,
sosial proqram və layihələrın həyata keçirilməsi,
təhsildə mənəvi-əxlaqi keyfiyyətlərin
yaxşılaşdırılmasına yönəlmiş birgə seminarların təşkili
və s. məsələlər öz əksini tapmışdır.
Eyni zamanda hər iki müəssisə arasında videokonfrans və
forumların, "dəyirmi masa" və görüşlərin keçirilməsi,
pedaqoji kadr hazırlığı, sosial-pedaqoji fəaliyyət,
mənəvi-əxlaqi təhsil sisteminə informasiya
texnologiyalarının tətbiqi, ən yaxşı müəllimlərin
təcrübə mübadiləsi, mənəvi və əxlaqi təhsil ilə məşğul
olan alim və mütəxəssislər üçün stajkeçmə və təkmilləşmə
kurslarının təşkili, mənəvi və əxlaqi təhsil sahəsində
vaxtaşırı nəşr olunan pedaqoji ədəbiyyatın, eləcə də
elmi-metodiki vəsait və təlim-tədris materiallarının
mübadiləsivə s. məsələlər də sənəddə yer alıb.
Məlumat üçün bildiririk ki, Qazaxıstan Respublikası
Təhsil və Elm Nazirliyinin ""Bobek" Milli elmi-praktiki
təhsil və sağlamlıq mərkəzi" 1995-ci ildə Qazaxıstanın
birinci xanımı Sara Nazarbayevanın təşəbbüsü və təklifi
ilə fəaliyyətə başlayıb. Məhz bu ideyadan irəli gələrək
1997-ci ildən Almatı şəhərində Qazaxıstanın bütün
regionlarını əhatə edən və zəif uşaqların sağlamlığının
möhkəmləndirilməsi üçün ilk "respublika uşaq sağlamlıq
və reabilitasiya mərkəzi" açılmışdı. 2002-ci ildə isə bu
mərkəz Qazaxıstanın Elm və Təhsil Nazirliyinin İnsanın
Harmonik İnkişafı İnstitutu ilə birləşdi. Qazaxıstan
Respublikası hökumətinin 2004-cü ildə müvafiq qərarı ilə
bu təsisat "Bobek" Milli elmi-praktiki təhsil və
sağlamlıq mərkəzi" adlı mərkəzə çevrilmişdir.
Beynəlxalq Əməkdaşlıq və informasiya şöbəsi |