Javascript DHTML Drop Down Menu Powered by dhtml-menu-builder.com

ARXİV

7 Noyabr 2014 - №43

 

"ADA" Universiteti və Amerika Dövlətləri Təşkilatı arasında əməkdaşlıq sazişi imzalanıb

 

Böyütmək üçün şəkili seçinVaşinqtonda "ADA" Universiteti və Amerika Dövlətləri Təşkilatı (ADT) arasında əməkdaşlıq haqqında saziş imzalanıb. Sazişi "ADA" Universitetinin rektoru Hafiz Paşayev və ADT-nin icraçı katibi xanım Şeri Tros imzalayıblar.

AzərTAc xəbər verir ki, bu sənəd ADT-nin müvafiq dəstəyi əsasında "ADA" Universiteti və təşkilata üzv dövlətlərdə yerləşən təhsil ocaqları arasında tələbə və müəllim mübadiləsini, birgə tədqiqat layihələrinin həyata keçirilməsini, eləcə də qarşılıqlı mədəni proqramlarda iştirakı nəzərdə tutur.

Hafiz Paşayev imzalanmış sənədin dünyanın bu bölgəsini təmsil edən tələbələrin "ADA" Universitetinə daha geniş şəkildə cəlb edilməsinə imkan yaradacağını söyləyib. Rektor əlavə edib ki, ADT ilə əməkdaşlıq, eyni zamanda, Azərbaycanın bu tədris ocağını gələcəyin liderlərini hazırlayan və faydalı əməkdaşlıqları təşviq edən bir təsisat kimi tanıdacaq. Hafiz Paşayev ADT təmsilçilərini "ADA" Universitetinin fəaliyyəti haqqında məlumatlandırıb. Bildirilib ki, Azərbaycanın ən qabaqcıl və dinamik təhsil ocaqlarından olan "ADA" Universiteti təsis edildiyi gündən beynəlxalq əməkdaşlıq əlaqələrinin inkişafı və yeni tərəfdaşlıqların təsis edilməsinə davamlı şəkildə əhəmiyyət verib. Hazırda universitet yüksək dünya standartlarına cavab verən təhsil proqramları tədris etməkdədir.

Amerika Dövlətləri Təşkilatının inkişaf üzrə icraçı katibi Şeri Tros və beynəlxalq münasibətlər üzrə katib Alfonso Qinonez ADT və Azərbaycan arasında əlaqələrdən danışıb, "ADA" Universiteti ilə imzalanmış sazişin bu əlaqələrə verəcəyi töhfəni qeyd edib. O, əməkdaşlıq sazişi vasitəsilə Azərbaycanın ADT-yə üzv dövlətlərdə insan kapitalının inkişafına verəcəyi dəstəyin əhəmiyyətini vurğulayıb.

1889-cu ildə təsis edilmiş Amerika Respublikalarının Beynəlxalq İttifaqının varisi olan ADT-nin 35 üzvü var. Təşkilat Amerika qitəsinin bütün müstəqil dövlətlərini özündə birləşdirir. Bu baxımdan "ADA" Universitetinin imzaladığı əməkdaşlıq sazişi Azərbaycan və geniş coğrafiyanı əhatə edən ADT-yə üzv dövlətlər arasında uzunmüddətli insan bağlarının qurulması baxımından mühüm rol oynayacaq. Saziş bir neçə ildən bəri "ADA" Universitetinin Amerika qitəsi ölkələri ilə apardığı fəaliyyətləri daha da gücləndirəcək. Bu günədək Azərbaycan Xarici İşlər Nazirliyinin verdiyi təqaüdlər əsasında Meksika, Argentina, Ekvador və Baham adalarından olan tələbələr "ADA" Universitetində təhsil alıblar, bəzi Latın Amerikası ölkələrinin diplomatları isə qısamüddətli təlimdən bəhrələniblər. Universitet Argentina və Kolumbiya təhsil təsisatları ilə anlaşma memorandumları imzalayıb, Braziliya, Kuba və Argentinadan müəllim heyətini  mühazirələr oxumağa dəvət edib və arzu edən tələbələrə ispan dilinin tədrisini təmin edib.

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov