Javascript DHTML Drop Down Menu Powered by dhtml-menu-builder.com

ARXİV

7 Noyabr 2014 - №43

 

"Kiçik Akademiya"da şagirdlər istedad və bacarıqlarını nümayiş etdirirlər

 

Böyütmək üçün şəkili seçinBakıdakı Azərbaycanın Milli Qəhrəmanı Eldar Tağızadə adına 164 nömrəli tam orta məktəbdə "Kiçik akademiya"  fəaliyyət göstərir. Bu, yaradıcılıq və elmi-tədqiqat işlərinə meyil və maraq göstərən, bu  sahədə  potensial imkanları ilə fərqlənən istedadlı şagirdlərin könüllü  birliyidir. "Kiçik Akademiya" çərçivəsində istedadlı şagirdlərlə  iş üzrə nəzərdə tutulan tədbirlər, o cümlədən fənn olimpiadaları, müsabiqələr, toplantılar, elmi-təcrübi konfrans və seminarlar keçirilir.  Məktəbin  direktoru Kəmalə Qədirova "Kiçik Akademiya"nın fəaliyyətinə diqqət yetirir və onun keçirdiyi konfranslarda iştirak edir. Şagirdlərə öz tövsiyələrini verir, təcrübəli müəllimlərin bu işə cəlb olunmasına şərait yaradır.  Burada əsasən öz arzularına görə elmi-tədqiqat fəaliyyətinə meyil və maraq göstərən VII-XI sinif şagirdləri iştirak edirlər. Şagirdlər Azərbaycan dili  və  ədəbiyyat,  coğrafiya, fizika, ingilis dili, tarix  fənləri  üzrə  qruplarda  fəaliyyət göstərirlər. Müəllimlərin rəhbərliyi ilə müəyyən edilmiş istiqamətlərdə sadə elmi araşdırmalar aparır, məruzə, referat və hesabatlar hazırlayırlar. "Kiçik Akademiya" üzvləri  tez-tez  "dəyirmi masa"lar  keçirir ki, bu da şagirdlərin elmi yaradıcılığa marağını artırır, onların tədqiqatçılıq  bacarıqlarını inkişaf etdirir. Şagirdlər həm fərdi, həm də kollektiv şəkildə  tədqiqatlar  aparırlar. Şagirdlərə bu işdə dəstək olan məktəbin tədris  işləri  üzrə  direktor  müavini  Nazimə  Zeynalova və "Kiçik Akademiya"ya rəhbərlik edən  məktəbin Azərbaycan dili və ədəbiyyat müəllimi Təranə Bağırova  bu birliyin elmi-tədqiqat fəaliyyətinə meyilli olan istedadlı şagirdləri vaxtında aşkara çıxarmaqda, mövcud yaradıcı potensialları nəzərə alınmaqla onların gələcək peşə istiqamətlərini müəyyənləşdirməkdə mühüm rol oynayacağına ümid edirlər. "Kiçik Akademiya"nın üzvlərindən  Azərbaycan dili və  ədəbiyyat  qrupunda  fəaliyyət  göstərən  Zeynal Rəşidli, Aysel Qarayeva ali məktəblərə qəbul  imtahanlarında  yüksək nəticələr əldə ediblər.

Noyabrın 3-də "Kiçik Akademiya"nın  üzvləri 9 noyabr  - Dövlət Bayrağı Gününə həsr  edilmiş  növbəti  tədbirlərini  keçiriblər.  Tədbir Azərbaycan Respublikasının  Dövlət himni ilə başlayıb. Şagirdlər  ay-ulduzlu bayrağımıza  həsr etdikləri təsviri  esselərini,  rəsmlərini  təqdim  ediblər. Üçrəngli bayrağımız önündə  hamı duyğulanıb. Tədbir  şagirdlərdə  xoş təəssürat yaradıb.  

Sifai SƏFƏROVA,
"Azərbaycan müəllimi"

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov