|
 Bakı
Dövlət Universiteti Tələbə Həmkarlar İttifaqı
Komitəsinin (THİK) təşkilatçılığı ilə universitetdə
kimya şousu keçirilib. Tədbirdə BDU THİK-in əməkdaşları
və fakültə tələbələri iştirak ediblər.
BDU THİK sədri Daşqın Qənbərov dəqiq və təbiət
elmlərinin öyrənilməsinin vacibliyini vurğulayaraq Bakı
Dövlət Universitetində yaradılan imkanlardan söz açıb.
Qeyd olunub ki, "Azərbaycanda bütün elmlərin inkişafı
üçün müxtəlif işlər görülür. Ölkəmizdə ilk dəfə
keçirilən Elm festivalı bunun bariz nümunəsidir. Elm
dedikdə daha çox fundamental təbiət elmlərini nəzərdə
tuturuq. Ölkədə hər hansı texnoloji inkişaf və elmi
tərəqqiyə nail olmaq üçün dəqiq və təbiət elmlərinə
ehtiyac vardır. Bugünkü tədbirdə iştirak edən
tələbələrimizə, gələcəyin alimlərinə Azərbaycan elminin
inkişafının bir hissəsi olmağı arzu edirəm. BDU
məzunlarının elmə verdiyi töhfələrin bundan sonra da
davam etməsi məhz sizlərdən asılıdır", - deyə Daşqın
Qənbərov çıxışında bildirib.
Sonra kimya fakültəsi üzrə THT-nın sədri Abdulla Hacıyev
tələbələrə kimya şousu və fakültədə yaradılan şərait
barədə məlumat verib.
Kimyanın tədrisi metodikası kafedrasının müdiri Eyyub
Əzizov çıxış edərək tələbələrə uğurlar arzulayıb.
Tədbirin rəsmi hissəsi bitdikdən sonra tələbələrin kimya
şousu başlayıb.
Kimya fakültəsinin III kurs tələbəsi digər tələbələrin
iştirakı ilə müxtəlif reaksiyalar nümayiş etdirib.
Rəşid MUSTAFAZADƏ,
BDU THİK İctimaiyyətlə əlaqələr departamentinin rəhbəri
|
