|
 "Azərbaycan"
komandası Təhsil Nazirliyinin təsis etdiyi "Bilik
kuboku" uğrunda breyn-rinq intellektual oyununun noyabr
ayı üzrə birinciliyində iştirak edəcək. Bu, ötən
həftənin bazar günü "Baku Crustal Hall"da keçirilən və
AzTV kanalı ilə yayımlanan növbəti oyundan sonra məlum
olub. Noyabr ayı üzrə dördüncü seçim oyunu kimi təqdim
olunan həmin yarışma əvvəlki seçim oyunlarından bir
qədər fərqli şəkildə, xüsusi qaydada keçirilib. Belə ki,
əvvəlki seçim oyunlarının hərəsi iki seçim və iki final
görüşündən ibarət olurdusa və 4 komanda arasında
keçirilirdisə, dördüncü seçim oyunu "uduzan çıxır"
prinsipi ilə təşkil olunub və oyunda 11 komanda
mübarizə aparıb. Komandalar sentyabrın 7-dən başlayaraq
keçirilən yarışmada daha az iştirak etmiş (hərəyə bir
oyun) 16 komanda arasından seçilib.
Oyunun digər bir fərqi komandalar arasında görüşlərin
onlardan birinin 3 xal toplamasınadək davam etməsi olub.
Oyun "Qafqaz Universitet" və "Mərdəkan" komandalarının
görüşü ilə başlayıb. Tələbələr 3:0 hesabı ilə qalib
gəliblər. Oyunun qaydalarına əsasən "Qafqaz
Universiteti" növbəti rəqibini özü seçib. Bu, "Şəki"
komandası olub. Tələbələr bu komandanı da məğlub
ediblər: 3:2. İki komandanı yarış masasından qaldıran
"Qafqaz Universiteti" növbəti tərəf-müqabili olan
"Siyəzən" komandasına da 3:0 hesabı ilə üstün gəlib.
Dördüncü görüşdə "Qafqaz Universiteti" ilə "Xızı"
qarşılaşıblar. Gərgin keçən mübarizədə xızılılar
rəqiblərinin ardıcıl qələbə seriyasına son qoyublar:
5:1.
"Xızı" növbəti görüşə "Qəbələ"ni dəvət edib və 3:2
hesabı ilə qalib gəlib.
Altıncı görüş "Xızı" və "Lənkəran" komandaları arasında
keçirilib. Bu dəfə lənkəranlılar üstün (3:0) gəliblər.
"Lənkəran" və "Bakı Dövlət Universiteti" komandaları
arasında baş tutan növbəti görüş də (VII görüş) "BDU"
komandasının qələbəsi ilə başa çatıb: 4:1.
Səkkizinci görüşdə "Bakı Dövlət Universiteti" "Milli
Aviasiya Akademiyası" ilə oynayıb və 2:3 hesabı ilə
uduzub.
Sayca doqquzuncu olan görüşdə "Milli Aviasiya
Akademiyası" və "Azərbaycan" komandaları qarşılaşıblar.
Bu oyunda "Azərbaycan" üstün gəlib: 3:1.
Seçim oyununun son görüşü "Azərbaycan" və "Orion"
komandaları arasında baş tutub. Rəqibinə 4:1 hesabı ilə
üstün gələn "Azərbaycan" komandası noyabr ayının
birinciliyinə vəsiqə qazanıb. Bu komandanın üzvləri
noyabrın 30-da keçiriləcək həmin oyunda "Bakı Ali Neft
Məktəbi", "Sumqayıt" və "NUR" komandaları ilə
oynayacaqlar.
Yusif ƏLİYEV,
"Azərbaycan müəllimi" |
