|
Noyabrın 28-də Azərbaycan Dövlət Pedaqoji
Universitetində (ADPU) görkəmli kimyaçı alim, professor
Allahverdi Verdizadənin 100 illik yubileyinə həsr
edilmiş "Üzvi reagentlər analitik kimyada" mövzusunda II
respublika elmi konfransı keçirilib.
ADPU-nun Azərbaycan Milli Elmlər Akademiyası (AMEA) və
Təhsil Nazirliyi ilə birgə təşkil etdiyi konfransı
rektor, AMEA-nın müxbir üzvü Yusif Məmmədov açaraq
alimin həyat və fəaliyyətindən, kimya elminə verdiyi
töhfələrdən danışıb.
Diqqətə çatdırılıb ki, bu ali təhsil ocağında indi də
uğurla fəaliyyət göstərən analitik və fiziki kimya
kafedrasını 1969-cu ildə professor A.Verdizadə yaradıb
və ömrünün sonunadək həmin kafedranın müdiri olub.
Hazırda kafedraya alimin övladı və yetirməsi olan
professor Nailə Verdizadə rəhbərlik edir.
AMEA-nın Neft-Kimya Prosesləri İnstitutunun direktoru,
akademik Vaqif Abbasov "Professor Allahverdi
Verdizadənin həyat və elmi-pedaqoji fəaliyyəti"
mövzusunda çıxış edib. Bildirib ki, professor
A.Verdizadə həm elmi tədqiqatçı alim, həm də pedaqoq
kimi zəngin və parlaq həyat yolu keçib.
Konfransda alimlərin "Kimyanın tədrisində "Təhsildə
dinamik fəzavi təfəkkür" nəzəriyyəsinin metodiki
istifadə yolları" və "Bəzi d-elementlərinin -O, -S, -N
tərkibli liqandlarla müxtəlifliqandlı komplekslərinin
analitik xassələri" mövzularında elmi məruzələri
dinlənilib.
Sonra işini 7 bölmədə davam etdirən konfransda 167
məruzə dinlənilib, müzakirələr aparılıb.
Rəşad RAMAZANOĞLU,
"Azərbaycan müəllimi" |
