ADMİU-da
sentyabr ayından mütəmadi olaraq keçirilən "Ustad
dərsləri" layihəsi davam edir. Növbəti dərsi 25 ildir
ki, Türkiyədə yaşayıb, fəaliyyət göstərən, Azərbaycan
milli xalq çalğı aləti olan balabanı dünyaya tanıdan,
virtuoz ifaçı Əlixan Səmədov verib. Elə dərsinin
əvvəlindən "Bildiklərimi öyrətməyə, bilmədiyim sirləri
isə öyrənməyə gəlmişəm" deyən musiqiçi ilə görüş
qarşılıqlı fikir mübadiləsi, təcrübə bölüşməsi ilə
davam edib. Tələbələrin maraqla dinlədiyi dərsdə
universitetin və Azərbaycan Milli Konservatoriyasının
müəllim və tələbələri, tanınmış balaban ifaçıları,
əməkdar artistlər Şirzad Fətəliyev, İlham Nəcəfov və
onların tələbələri də iştirak edirdi.
Görüşdə Əlixan Səmədov balaban alətinin strukturu,
incəlikləri, ifa texnikası haqda geniş danışaraq bütün
bunlara nəzəri və praktiki şəkildə aydınlıq gətirib.
***
ADMİU-da "Ustad dərsləri" layihəsi çərçivəsində
Gürcüstan İncəsənət Akademiyasının qrim üzrə
mütəxəssisi, bir çox tanınmış beynəlxalq layihələrin
qrim ustası olan Anuka Murvanidze 4 gün ərzində nəzəri
və praktiki məşğələlər keçib. 22 il bu sahədə çalışan
Anuka Murvanidze tələbələrə qrim sənətinin tarixi, kino,
teatr, səhnə, şou və televiziya üçün qrim və vizaj,
kosmetik vasitələr və onlardan düzgün istifadə haqqında
geniş məlumat verib. Məşğələlərdə universitetin
rəssamlıq fakültəsinin IV kurs tələbələri və eləcə də
Rus Dram Teatrının, Gənc Tamaşaçılar və Musiqili
Komediya teatrının qrim mütəxəssisləri də iştirak
ediblər. Praktiki məşğələlərdə tələbələr səhnə vizajı,
üzdə yaşlı adam effektinin, teatr obrazlarının
yaradılması texnikasını öyrənərək öz üzərlərində tətbiq
ediblər. |