Azərbaycan Respublikası təhsil nazirinin
15 dekabr 2014-cü il tarixli 1261 nömrəli əmri ilə
təsdiq edilib
1. Ümumi müddəalar
1.1. Azərbaycan Respublikasının paytaxtı Bakı şəhərində
keçiriləcək 47-ci Beynəlxalq Kimya Olimpiadasında çıxış
edəcək milli komandaya namizədlərin seçilməsi məqsədi
ilə ümumtəhsil müəssisələrinin şagirdləri arasında kimya
fənni üzrə seçim turları keçirilir.
1.2. Ümumi təhsil müəssisələrinin rəhbərləri, yerli
təhsili idarəetmə orqanları istedadlı şagirdlərin
müəyyənləşdirilməsi və seçim turlarının bu Qaydalara
uyğun keçirilməsi üçün birbaşa məsuliyyət daşıyırlar.
1.3. Kimya fənni üzrə seçim turlarına X-XI sinif
şagirdləri cəlb edilir.
1.4. Seçim turlarının yekun mərhələnin qalibləri
M.V.Lomonosov adına Moskva Dövlət Universitetinin Bakı
filialında təşkil olunacaq Beynəlxaq Kimya Olimpiadasına
hazırlıq məşğələlərində iştirak edirlər.
2. Seçim turlarının təşkili
2.1. Azərbaycan Respublikası Təhsil Nazirliyinin
20.06.2014-cü il tarixli 739 nömrəli əmrinə əsasən 47-ci
Beynəlxalq Kimya Olimpiadası ilə əlaqədar yaradılmış
Təşkilat Komitəsi kimya fənni üzrə seçim turlarının
şəffaf və obyektiv keçirilməsini təmin edir. Təşkilat
Komitəsi seçim turlarının bu Əsasnaməyə uyğun qaydada
keçirilməsi üçün lazımi tədbirlər görür.
2.2. Rayon (şəhər) təhsil şöbəsi (idarəsi) rəhbərlərinin
vəzifələri:
2.2.1. Seçim turlarının rayon (şəhər) mərhələsinin
keçirilməsi üçün sualların və cavab kartlarının
müsabiqənin keçiriləcəyi tarixdən 2 gün əvvəl Təhsil
Nazirliyindən qəbul edir;
2.2.2. Şagirdlərin rayon (şəhər) mərhələsinin cavab
kartlarının Təhsil Nazirliyinə göndərilməsini təmin edir.
2.3. Təşkilat Komitəsinin vəzifələri:
2.3.1. Seçim turlarında tapşırıqların və cavab
kartlarının hazırlanmasını, rayon (şəhər) təhsil
şöbələrinə (idarələrinə) çatdırılmasını, cavab
kartlarının oxunmasını təşkil edir;
2.3.2. Seçim turlarının hazırlıq işlərinin vaxtında başa
çatdırılmasını təmin edir;
2.3.3. Seçim turlarının son nəticələrini ümümiləşdirərək
təhlil edir və yekun hesabatı hazırlayır.
3. Seçim turlarının keçirilməsi
3.0.1. Seçim turları 3 (üç)-rayon (şəhər), zona və
respublika mərhələlərindən ibarətdir.
3.1. Seçim turlarının rayon (şəhər) mərhələsi
3.1.1. Bu mərhələdə suallar M.V.Lomonosov adına Moskva
Dövlət Universitetinin Bakı filialının mütəxəssisləri
tərəfindən siniflər üzrə məktəb proqramına uyğun olaraq
qapalı test formatında hazırlanır.
3.1.2. Rayon (şəhər) mərhələsində şagirdlərə 30 (otuz)
sual təqdim edilir və cavablandırılması üçün 3 (üç) saat
vaxt ayrılır.
3.1.3 Təhsil Nazirliyi tabeliyindəki lisey və
gimnaziyaların, özəl məktəblərin şagirdləri rayon
(şəhər) mərhələsində ərazi üzrə yerləşdikləri rayonda
(şəhərdə) iştirak edirlər.
3.1.4. Ümumi təhsil müəssisələrinin, Təhsil Nazirliyinin
tabeliyindəki lisey və gimnaziyaların, özəl məktəblərin
direktorları rayon (şəhər) mərhələsində iştirak edəcək
şagirdlərin adlı siyahısını müvafiq rayon (şəhər) təhsil
şöbəsinə (idarəsinə) təqdim edirlər. Bu turda
iştirakçıların sayına məhdudiyyət qoyulmur.
3.1.5. Rayon (şəhər) turunda iştirak edən şagirdlərin
cavab kartları ən geci imtahan keçirilən tarixdən 1 (bir)
gün sonra təhsil şöbəsi (idarəsi) tərəfindən Təhsil
Nazirliyinə təqdim olunur.
3.2. Seçim turunun zona mərhələsi
3.2.1. Seçim turunun zona mərhələsi Təşkilat Komitəsi
tərəfindən müəyyən edilmiş mərkəzlərdə keçirilir. Bu
mərkəzlər ölkənin müxtəlif bölgələrində yerləşən ümumi
təhsil müəssisələrindən seçilir.
3.2.2. Zona mərhələsində iştirak edəcək şagirdlər rayon
(şəhər) mərhələsinin nəticələrinə əsasən Təşkilat
Komitəsinin qərarı ilə müəyyənləşdirilir.
3.2.3. Təşkilat Komitəsi zona mərhələsində iştirak
edəcək şagirdlərin adlı siyahısını rayon (şəhər) təhsil
şöbələrinə (idarələrinə) turun keçiriləcəyi tarixdən 1 (bir)
həftə əvvəl göndərir.
3.2.4. Bu mərhələdə suallar M.V.Lomonosov adına Moskva
Dövlət Universitetinin Bakı filialının mütəxəssisləri
tərəfindən məktəb proqramına uyğun və nisbətən
çətinləşdirilmiş qapalı test və açıq tipli suallar
formatında hazırlanır.
3.2.5. Zona mərhələsində şagirdlərə 30 (otuz) sual
təqdim edilir və cavablandırılması üçün 4 (dörd) saat
vaxt ayrılır.
3.2.6. Təşkilat Komitəsi zona mərhələsinin cavab
kartlarının oxunmasını, qiymətləndirilməsini və
nəticələrin rayon (şəhər) təhsil şöbələrinə
(idarələrinə) çatdırılmasını təmin edir.
3.3. Seçim turunun respublika mərhələsi
3.3.1. Seçim turunun respublika mərhələsi M.V.Lomonosov
adına Moskva Dövlət Universitetinin Bakı filialında
keçirilir.
3.3.2. Respublika mərhələsində iştirak edəcək şagirdlər
zona mərhələsinin nəticələrinə əsasən Təşkilat
Komitəsinin qərarı ilə müəyyənləşdirilir.
3.3.3. Respublika mərhələsinin sualları M.V.Lomonosov
adına Moskva Dövlət Universitetinin Bakı filialının
mütəxəssisləri tərəfindən məktəb proqramına uyğun olaraq
çətinləşdirilmiş qapalı test və açıq tipli suallar
formatında hazırlanır.
3.3.4. Respublika mərhələsində şagirdlərə 20 (iyirmi)
sual təqdim edilir və imtahan üçün 4 (dörd) saat vaxt
ayrılır.
3.3.5. Respublika mərhələsinin nəticələri imtahan başa
çatdıqdan 5 gün sonra elan edilir.
3.3.6 Nəticələr məlum olduqdan sonra apelyasiya günü
müəyyən edilir. Nəticələrindən narazı qalmış
iştirakçılar öz işlərinə yenidən baxılması üçün Təşkilat
Komitəsinə müraciət edə bilərlər. Belə müraciətlərə
M.V.Lomonosov adına Moskva Dövlət Universitetinin Bakı
filialının mütəxəssislərinin iştirakı ilə baxılır.
4. Seçim turlarının maliyyələşdirilməsi
4.1. Seçim turlarının rayon (şəhər), habelə zona və
respublika mərhələsi iştirakçılarının ezamiyyə xərcləri
yerli təhsil orqanları tərəfindən ödənilir.
4.2. Seçim turlarının zona və respublika mərhələlərinin
keçirilməsi ilə əlaqədar bütün xərclər Təhsil Nazirliyi
tərəfindən ödənilir. |