|
 Dekabrın
22-də Bakı Dövlət Universitetində görkəmli alim və
mətbuat tədqiqatçısı, Prezident təqaüdçüsü, BDU-nun
mətbuat tarixi və ideoloji iş metodları kafedrasının
professoru, Azərbaycan jurnalistikasının görkəmli
simalarından biri Şirməmməd Hüseynovun 90 illik
yubileyinə həsr olunmuş mərasim keçirilib.
BDU-nun jurnalistika fakültəsinin tələbə-müəllim
heyətinin və müxtəlif qonaqların iştirak etdiyi tədbiri
giriş sözü ilə universitetin rektoru, akademik Abel
Məhərrəmov açıb. O, yubilyarı təbrik edərək, ona uğurlar
arzulayıb. Ş.Hüseynovu Azərbaycan jurnalistlərinin
müəllimi kimi xarakterizə edən cəhətlərdən söz açan
rektor qeyd edib ki, Azərbaycan mətbuat tarixinin
patriarxı Ş.Hüseynov hamının müəllimidir. Vurğulanıb ki,
Azərbaycan Prezidenti İlham Əliyevin imzaladığı
sərəncamla Şirməmməd Hüseynovun "Şərəf" ordeni ilə
təltif edilməsi qürurverici hadisədir.
BDU-nun jurnalistika fakültəsinin dekanı Şamil Vəliyev
çıxış edərək Ş.Hüseynovun həyat və yaradıcılığı ilə
bağlı məlumat verib.
Jurnalistika fakültəsinin kafedra müdiri Cahangir
Məmmədli çıxışında Azərbaycan Xalq Cümhuriyyətinin
tarixi şəxsiyyətləri ilə bağlı tədqiqatlardakı spesifik
məqamlardan, onları səciyyələndirən milli təəssübkeşlik
xüsusiyyətlərindən, dövlətçilik ənənələrimizə sədaqət
ruhunu yaşatmalarından söz açıb, tariximizin
zənginləşməsinə layiqli töhfə olan Azərbaycan Xalq
Cümhuriyyətinin banisi Məmməd Əmin Rəsulzadənin irsinin
öyrənilməsi sahəsində xidmətlərinə toxunub. Azərbaycan
jurnalistikasında müəllimliyi, tədqiqatçılığı və
publisistikanı yeni məktəb səviyyəsinə yüksəldən
Şirməmməd Hüseynovun yaradıcılığının peşəkar jurnalist
nəslinin söykəndiyi ən etibarlı mənbə kimi qiymətli
olduğunu deyən Cahangir Məmmədli ölkə ictimaiyyətinin də
Şirməmməd müəllimin yaradıcılıq fəaliyyətini yüksək
qiymətləndirdiyini bildirib.
Sonra çıxış edən qonaqlar Ş.Hüseynovun həyat və
yaradıcılığından, Azərbaycan mətbuat tarixinin
tədqiqində əvəzedilməz rolundan danışdılar.
Tədbirin sonunda Şirməmməd Hüseynov çıxış edərək
apardığı tədqiqatlardan danışıb, tədbirdə iştirak edən
qonaqlara təşəkkürünü bildirib.
Mətbuat və informasiya şöbəsi |
